ଲଣ୍ଡନ: ବ୍ରିଟେନ ରାଜପରିବାରରେ ଖୁସିର ଲହରୀ । କାରଣ ଦ୍ବିତୀୟ ଥର ବାପା ହୋଇଛନ୍ତି ପ୍ରିନ୍ସ ହ୍ୟାରୀ । ଜଣେ କନ୍ୟା ସନ୍ତାନଙ୍କୁ ଜନ୍ମ ଦେଇଛନ୍ତି ସ୍ତ୍ରୀ ମେଘାନ ମର୍କେଲ । ରବିବାର ଏହି ଦମ୍ପତି ନିଜର ଦ୍ବିତୀୟ ସନ୍ତାନ ଲିଲିବେଟ ଲିଲି ଡାଏନା ମାଉଣ୍ଟବେଟନ-ୱିଣ୍ଡସରଙ୍କୁ କରିଛନ୍ତି ସ୍ବାଗତ ।
ପ୍ରିନ୍ସ ହ୍ୟାରୀ ଓ ମେଘାନ ମାର୍କେଲ ଏକ ବୟାନ ଜାରି କରି କହିଛନ୍ତି, ତାଙ୍କ ଝିଅର ଜନ୍ମ 4 ଜୁନ ସାଣ୍ଟା ବାରବରା କଟେଜ ହସ୍ପିଟାଲରେ ହୋଇଛି । ଝିଅର ଜନ୍ମ ପରେ ମା' ଓ ଝିଅ ସମ୍ପୂର୍ଣ୍ଣ ସୁସ୍ଥ ଅଛନ୍ତି । ଆଉ ଏବେ ଏମାନେ ନିଜ ଘରେ ଅଛନ୍ତି । ତେବେ ସମସ୍ତ ପ୍ରାର୍ଥନା ପ୍ରତି ଆଭାର ପ୍ରକଟ କରିଛନ୍ତି ହ୍ୟାରୀ ଓ ମେଘାନ ।