ସିଓଲ: ଅନ୍ତଃକୋରିଆନ ବିବାଦର ମଞ୍ଜି ବୁଣିଥିବା ପ୍ୟୋଙ୍ଗ୍ୟାଙ୍ଗ ବିରୋଧୀ ଲିଫ୍ଲେଟ ବାଣ୍ଟିବା ପଛରେ ରହିଥିଲେ ଉତ୍ତର କୋରିଆର କିଛି ବିଶ୍ବାସଘାତକ । ସେମାନେ ଉତ୍ତର କୋରିଆ ଛାଡି ଦକ୍ଷିଣ କୋରିଆର ଶରଣ ନେଇଥିବା ବେଳେ ଉଭୟ ଦେଶ ମଧ୍ୟରେ ତିକ୍ତତା ପାଇଁ ପଠାଇଥିଲେ କିଛି ପ୍ୟୋଙ୍ଗ୍ୟୋଙ୍ଗ ବିରୋଧୀ ଲିଫ୍ଲେଟ । ଏହା 2018 ମସିହାରେ ସ୍ବାକ୍ଷରିତ ଚୁକ୍ତି ବିରୋଧୀ ହୋଇଥିବାରୁ ଉତ୍ତ୍ୟକ୍ତ ହୋଇ ଉତ୍ତର କୋରିଆ ହିଂସାତ୍ମକ ଆଚରଣ ଆପଣାଇଥିଲା । ତେବେ ଏପରି କିଛି ଉତ୍ତର କୋରିଆ ବିଶ୍ବାସଘାତକଙ୍କ ଘରେ ଚଢାଉ ପାଇଁ ପୋଲିସ ପଠାଯାଇଥିବା ଜଣା ପଡିଛି ।
ମୁକ୍ତ ଉତ୍ତର କୋରିଆ ସଂଗ୍ରାମରେ ସାମିଲ କେତେକ ସ୍ବେଚ୍ଛାସେବୀଙ୍କ ନେତୃତ୍ବ ନେଉଛନ୍ତି ପାର୍କ ସାଙ୍ଗ-ହାକ । ଦକ୍ଷିଣ କୋରିଆରେ ରହି ଏହି ଦଳ ପ୍ୟୋଙ୍ଗ୍ୟାଙ୍ଗ ବିରୋଧୀ ଲିଫ୍ଲେଟ ସୀମା ପାର ପଠାଇବା ଆରମ୍ଭ କରିଥିଲା । ତେବେ ଶୁକ୍ରବାର ସିଓଲର ମେଟ୍ରୋପୋଲିଟାନ ପୋଲିସ ଏଜେନ୍ସିର ଏକ ଦଳ ପୂର୍ବ ସିଓଲର ସୋଙ୍ଗପା ୱାର୍ଡସ୍ଥିତ ପାର୍କରେ ଘରେ ଚଢାଉ ଉଦ୍ୟମ କରିଥିଲେ । ହେଲେ ପାର୍କ ଏହାକୁ ତୀବ୍ର ବିରୋଧ କରିବାରୁ ପୋଲିସମାନେ ତାଙ୍କ ଘର ବାହାରେ ଷ୍ଟାଣ୍ଡବାଏରେ ରହିଥିଲେ । ସେମାନଙ୍କ କହିବା ଅନୁଯାୟୀ ପାର୍କ ଘରୁ ବାହାରି ଅନୁମତି ଦେଲେ ହିଁ ଘରର ତଲାସୀ ଆରମ୍ଭ ହେବ ।