ବେଜିଂ: ବର୍ତ୍ତମାନ ବିଶ୍ବର ସବୁଠୁ ବୃହତ ଜନବହୁଳ ରାଷ୍ଟ୍ରର ଶୀର୍ଷ ତାଲିକାରେ ରହିଛି ଚୀନ । ଏହି କ୍ରମରେ ଭାରତର ସ୍ଥାନ ଦ୍ବିତୀୟ । ହେଲେ ମାତ୍ର କିଛି ବର୍ଷ ମଧ୍ୟରେ ଭାରତ ଚୀନକୁ ଅତିକ୍ରମ କରି ସର୍ବବୃହତ ଜନବହୁଳ ରାଷ୍ଟ୍ରରେ ପରିଣତ ହେବ ବୋଲି କହିଛନ୍ତି ଚୀନର ଜନସଂଖ୍ୟା ବିଜ୍ଞାନୀ । ତାଙ୍କ କହିବାନୁଯାୟୀ, ମିଳିତ ଜାତିସଙ୍ଘର 2027 ମସିହା ପ୍ରୋଜେକ୍ଟ ଆକଳନର ବହୁପୂର୍ବରୁ ଭାରତ ଚୀନ ଜନସଂଖ୍ୟାକୁ ଅତିକ୍ରମ କରିବ । ତେବେ ଗତ କିଛି ବର୍ଷ ଧରି ଚୀନର ଜନ୍ମହାରରେ ହ୍ରାସ ରେକର୍ଡ କରାଯାଇଛି ।
ଭାରତର ବର୍ତ୍ତମାନ ଜନସଂଖ୍ୟା ଯାହା ରହିଛି, ଆସନ୍ତା 2050 ମସିହା ସୁଦ୍ଧା ଏଥିରେ ଆହୁରି 273 ମିଲିୟନ ନୂଆ ସଂଖ୍ୟା ଯୋଡି ହେବ । 2019ରେ ମିଳିତ ଜାତିସଂଘର ଏକ ରିପୋର୍ଟ ପ୍ରକାଶ ପାଇଥିଲା । ଯେଉଁଥିରେ ପୂର୍ବାନୁମାନ କରାଯାଇଥିଲା ଯେ 2027 ମସିହା ସୁଦ୍ଧା ଭାରତ ଚୀନକୁ ପଛରେ ପକାଇ ସର୍ବାଧିକ ଜନସଂଖ୍ୟା ବିଶିଷ୍ଟ ରାଷ୍ଟ୍ରରେ ପରିଣତ ହେବ ଏବଂ ଏହି ଶତାବ୍ଦୀର ଶେଷ ଯାଏଁ ଭାରତର ଜନସଂଖ୍ୟା ସ୍ଥିତି ଶୀର୍ଷ ସ୍ଥାନରେ ବଜାୟ ରହିବ । 2019 ମସିହା ସୁଦ୍ଧା ଭାରତରେ 1.37 ବିଲିୟନ ଜନସଂଖ୍ୟା ରେକର୍ଡ କରାଯାଇଥିବାବେଳେ ଚୀନର 1.43 ବିଲିୟନ ରେକର୍ଡ କରାଯାଇଥିଲା, ଯାହା ମିଳିତ ଜାତିସଂଘର ତଥ୍ୟ ବୟାନ କରୁଛି ।