ଢାକା: ବାଂଲାଦେଶକୁ ଗ୍ରାସିବାରେ ଲାଗିଛି ବନ୍ୟା ପ୍ରଭାବ । ଅର୍ଦ୍ଧାଧିକ ଦେଶ ଏବେ ଜଳମଗ୍ନ ରହିଥିବାବେଳେ ଏପର୍ଯ୍ୟନ୍ତ ବନ୍ୟା ପ୍ରଭାବରେ 119 ଜଣଙ୍କ ମୃତ୍ୟୁ ହୋଇ ସାରିଥିବା ଜଣାପଡିଛି । ଏନେଇ ବିପର୍ଯ୍ୟୟ ବିଭାଗରେ ଦୈନିକ ରିପୋର୍ଟରେ ପ୍ରକାଶ କରାଯାଇଛି କି ଦେଶର 64ରୁ 21ଟି ଜିଲ୍ଲାରେ ଜୁନ 30ରୁ ବର୍ତ୍ତମାନ ମଧ୍ୟରେ ଏହି ମୃତ୍ୟୁ ସଂଖ୍ୟା ରେକର୍ଡ କରାଯାଇଛି । ଏମାନଙ୍କ ମଧ୍ୟରୁ 96 ଜଣ ବନ୍ୟା ଜଳରେ ବୁଡି ପ୍ରାଣ ହରାଇଥିବାବେଳେ ସାପ କାମୁଡାରେ 13 ଜଣ, ବଜ୍ରାଘାତରେ 8 ଓ ଡାଇରିଆରେ ଜଣଙ୍କର ମୃତ୍ୟୁ ହୋଇଛି ।
ଏନେଇ ଜାତୀୟ ବିପର୍ଯ୍ୟୟ ମୁକାବିଲା ସମନ୍ବୟ କେନ୍ଦ୍ର(ଏନଡିଆରସିସି) ଦ୍ବାରା ପ୍ରକାଶିତ ଅନ୍ୟ ଏକ ରିପୋର୍ଟ ଅନୁଯାୟୀ ବନ୍ୟା ଦ୍ବାରା ଦେଶରେ ପ୍ରାୟ 5 ମିଲିୟନ ଲୋକେ ପ୍ରଭାବିତ ହୋଇଛନ୍ତି । ସେପଟେ ବନ୍ୟା ଜଳ ପଶିଯିବାରୁ ପ୍ରାୟ ହଜାର ହଜାର ପରିବାର ଅନ୍ୟତ୍ର ସ୍ଥାନାନ୍ତର ହୋଇଛନ୍ତି । ଏଥିସହ ଦେଶର 64ରୁ 31 ଜିଲ୍ଲାର 43,78,732 ଲୋକେ ଏବେ ବି ବନ୍ୟା ଜଳ ଘେରରେ ରହିଥିବା ଜଣାପଡିଛି ।
ବନ୍ୟାର ପ୍ରଭାବ ଏତେ ଅଧିକ ରହିଛି କି ସାଧାରଣ ଜନଜୀବନ, ଚାଷ ଜମି, ରାସ୍ତା ଘାଟ ଆଦି ଧୋଇ ହୋଇଯାଇଛି । ଦେଶରେ ପ୍ରବାହିତ ଅଧିକାଂଶ ନଦୀ ଓ ହ୍ରଦ ଆଦି ଫୁଲିବା ଆରମ୍ଭ ହେବାରୁ ଦେଶରେ ଅର୍ଦ୍ଧାଧିକ ସ୍ଥାନ ଏବେ ବି ଜଳମଗ୍ନ ରହିଛି । ଅନ୍ୟପଟେ ଭାରତୀୟ ସୀମା ଦେଇ ପାହାଡିଆ ଅଞ୍ଚଳରୁ ଜଳ ଗଡି ଆସି ମଧ୍ୟ ଦେଶର ସ୍ଥିତି ବିଗାଡିବାରେ ଲାଗିଛି ।
ଦେଶରେ ବନ୍ୟା ସ୍ଥିତି ନେଇ ରାଜ୍ୟ ବିପର୍ଯ୍ୟୟ ମୁକାବିଲା ଓ ରିଲିଫ ବିଭାଗ ମନ୍ତ୍ରୀ ମହମ୍ମଦ ଏନାମୁର ରେହମାନ କହିଛନ୍ତି ବିଭିନ୍ନ ସ୍ଥାନରେ ଉଦ୍ଧାର କାର୍ଯ୍ୟ ଜୋରଦାର ଜାରି ରହିଛି । ଏଥିସହ ବନ୍ୟା ପ୍ରଭାବିତ ଅଞ୍ଚଳମାନଙ୍କୁ ପ୍ରଭାବିତ ଲୋକମାନଙ୍କୁ ଉଦ୍ଧାର କରି ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ସେପଟେ ପ୍ରଧାନମନ୍ତ୍ରୀ ଶେଖ ହସିନା ସମସ୍ତ ବିଭାଗୀୟ ଅଧିକାରୀଙ୍କୁ ସତର୍କ ରହିବା ପାଇଁ ନିର୍ଦ୍ଦେଶ ଦେଇଛନ୍ତି । ଏଥିସହ କୋରୋନା ସଂକ୍ରମଣକୁ କିପରି ବନ୍ୟା ସ୍ଥିତି ମଧ୍ୟରେ ନିୟନ୍ତ୍ରଣ କରିହେବ ସେନେଇ ମଧ୍ୟ ଧ୍ୟାନ ଦେବା ପାଇଁ ନିର୍ଦ୍ଦେଶ ଦେଇଛନ୍ତି ।
@IANS
