2020 ପ୍ରଥମାର୍ଦ୍ଧରେ କମିଛି ଆଫଗାନୀ ନାଗରିକଙ୍କ ମୃତ୍ୟୁ ହାର: ୟୁଏନ

ନାଗରିକଙ୍କ ପାଇଁ ବିଶ୍ବରେ ସବୁଠାରୁ ଭୟଙ୍କର ସ୍ଥାନ ଭାବେ ଆଫଗାନିସ୍ତାନର ନାମ ସର୍ବାଗ୍ରେ ଆସେ । ଏଠାରେ ଲାଗି ରହିଥିବା ୟୁଦ୍ଧ ପରିସ୍ଥିତି ପାଇଁ ପ୍ରତିବର୍ଷ ହଜାର ହଜାର ନାଗରିକ ବିନା ଦୋଷରେ ଆଖି ବୁଜନ୍ତି । ତେବେ ଚଳିତବର୍ଷ ଏହି ମୃତ୍ୟୁହାରକୁ ନଇ ଏକ ରିପୋର୍ଟ ପ୍ରସ୍ତୁତ କରିଛି ଜାତିସଂଘର ସ୍ବତନ୍ତ୍ର ମିଶନ ।

କାବୁଲ: ନାଗରିକଙ୍କ ପାଇଁ ବିଶ୍ବରେ ସବୁଠାରୁ ଭୟଙ୍କର ସ୍ଥାନ ଭାବେ ଆଫଗାନିସ୍ତାନର ନାମ ସର୍ବାଗ୍ରେ ଆସେ । ଏଠାରେ ଲାଗି ରହିଥିବା ୟୁଦ୍ଧ ପରିସ୍ଥିତି ପାଇଁ ପ୍ରତିବର୍ଷ ହଜାର ହଜାର ନାଗରିକ ବିନା ଦୋଷରେ ଆଖି ବୁଜନ୍ତି । ତେବେ ଚଳିତବର୍ଷ ଏହି ମୃତ୍ୟୁହାରକୁ ନଇ ଏକ ରିପୋର୍ଟ ପ୍ରସ୍ତୁତ କରିଛି ଜାତିସଂଘର ସ୍ବତନ୍ତ୍ର ମିଶନ । ଯେଉଁଥିରେ ଜଣା ପଡିଛି କି ଗତବର୍ଷ ତୁଳନାରେ ଚଳିତବର୍ଷ ଦେଶରେ ନାଗରିକଙ୍କ ମୃତ୍ୟୁ ସଂଖ୍ୟା ହ୍ରାସ ପାଇଛି ।

ଏନେଇ ଆଫଗାନିସ୍ତାନରେ କାର୍ଯ୍ୟରତ ୟୁଏନ ଆସିଷ୍ଟାନ୍ସ ମିଶନ(ୟୁଏନଏଏମଏ) ସୂଚନା ଦେଇ କହିଛି କି ଗତ ବର୍ଷ ତୁଳନାରେ ଚଳିତବର୍ଷ ପ୍ରଥମାର୍ଦ୍ଧରେ ଆଫଗାନିସ୍ତାନରେ ନାଗରିକଙ୍କ ମୃତ୍ୟୁ ସଂଖ୍ୟା 13 ପ୍ରତିଶତ ହ୍ରାସ ପାଇଛି । ଏହା ପଛରେ ମୁଖ୍ୟ କାରଣ ହେଉଛି ଆମେରିକା ଦ୍ବାରା ପରିଚାଳିତ ଫୋର୍ସ ନାଟୋର ଅପେକ୍ଷାକୃତ କମ୍‌ ସକ୍ରିୟ ସ୍ଥିତି ଓ ଇସଲାମିକ ଷ୍ଟେଟ୍ସ ବା ଆଇଏସ ଦ୍ବାରା ଆକ୍ରମଣର ମାତ୍ରା ହ୍ରାସ । ହେଲେ ଅନ୍ୟପଟେ ତାଲିବାନ ଓ ଆଫଗାନ ଜାତୀୟ ସୁରକ୍ଷା ଫୋର୍ସ ମଧ୍ୟରେ ଜାରି ରହିଥିବା ସଂଘର୍ଷ ଯୋଗୁଁ ନାଗରିକଙ୍କ ମୃତ୍ୟୁ ସଂଖ୍ୟା ବଢିବାରେ ଲାଗିଥିବା ଜଣା ପଡିଛି ।

ଏହି ମାମଲାରେ ୟୁଏନର ସ୍ବତନ୍ତ୍ର ଦୂତ ତଥା ୟୁଏନ ମିଶନର ମୁଖ୍ୟ ଦେବୋରାହ ଲିଏନ୍ସ ପ୍ରକାଶ କରିଛନ୍ତି କି ତାଲିବାନ ଓ ଆଫଗାନିସ୍ତାନ ଶାନ୍ତି ସ୍ଥିତି ସୃଷ୍ଟି ପାଇଁ ଏକାଠି ହୋଇ ଆଲୋଚନା କରୁଛନ୍ତି ସତ । ହେଲେ ବାସ୍ତବ ଚିତ୍ର ସମ୍ପୂର୍ଣ୍ଣ ଓଲଟା । ଏବେ ବି ଉଭୟ ରାଷ୍ଟ୍ର ମଧ୍ୟରେ ସଂଘର୍ଷ ଜାରି ରହିଥିବା ଏହାର ପ୍ରଭାବରେ ପ୍ରତ୍ୟେକ ଦିନ ଆଖି ବୁଜୁଛନ୍ତି ସାଧାରଣ ନାଗରିକ । ତେଣୁ ପ୍ରଚଳିତ ହିଂସାରେ ଲଗାମ ଲଗାଇ ଉଭୟ ଦେଶ ଏହାର ଆଫଗାନ ନାଗରିକଙ୍କ ଉପରେ ପଡୁଥିବା ପ୍ରଭାବକୁ ନିରିଖେଇ ଦେଖିବା ଦରକାର ବୋଲି ସେ ପରାମର୍ଶ ଦେଇଛନ୍ତି ।

ତେବେ ବର୍ତ୍ତମାନ ସୁଦ୍ଧା ଦେଶରେ 1282 ଜଣ ନାଗରିକଙ୍କ ମୃତ୍ୟୁ ହୋଇସାରିଥିବା ବେଳେ 2176 ଜଣ ନାଗରିକ ଆହତ ହୋଇଥଛନ୍ତି । ଏହା ପଛରେ ଅଜାଣତ ଗୁଳି ବର୍ଷଣ ବା ମୁଖ୍ୟତଃ ଜନବସତି ଅଞ୍ଚଳରେ ବୋମା ମାଡ ମୁଖ୍ୟ କାରଣ ବୋଲି ରିପୋର୍ଟରେ ଦର୍ଶାଯାଇଛି । ଅନ୍ୟପଟେ ମାରାତ୍ମକ ବିସ୍ଫୋରକ ବା ଆତ୍ମଘାତୀ ବିସ୍ଫୋରକ ମଧ୍ୟ ଏହା ପଛରେ ଅନ୍ୟ ଏକ ବଡ କାରଣ ବୋଲି ଦର୍ଶାଯାଇଛି ।

@IANS