ଢାକା: ବାଂଲାଦେଶକୁ ପୁଣି ଫେରିଛି କୋରୋନା ସଂକ୍ରମଣ । ମାତ୍ର କିଛି ଦିନର ବିରତି ପରେ ପୁଣି ଲୋକଙ୍କୁ ଭୟଭୀତ କରିଛି କୋରୋନା । ଶନିବାର ଦେଶରେ ରହୁଥିବା ରୋହିଙ୍ଗ୍ୟା ଶରଣାର୍ଥୀଙ୍କ କ୍ୟାମ୍ପ ନିକଟସ୍ଥ ଅଞ୍ଚଳଗୁଡିକୁ ରେଡ ଜୋନ ଘୋଷଣା ପରେ ରବିବା ଆଉ ଏକ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନେଇଛି ହସିନା ସରକାର । ଦେଶରେ କୋରୋନାର ସ୍ଥିତି ଦେଖି ପୁଣି ଥରେ ପର୍ଯ୍ୟାୟକ୍ରମେ ଲକଡାଉନ ଘୋଷଣା କରିବା ପାଇଁ ସରକାର ନିଷ୍ପତ୍ତି ନେଇଛନ୍ତି ।
ରବିବାର ଏସମ୍ପର୍କରେ ବରିଷ୍ଠ ସ୍ବାସ୍ଥ୍ୟ ଅଧିକାରୀ ସୂଚନା ଦେଇଛନ୍ତି । ଏହି ଘୋଷଣା ଆଧାରରେ ଦେଶର ରାଜଧାନୀ ଢାକାର କେତେକ ଅଞ୍ଚଳ ଓ ଦେଶର ଅନ୍ୟ କେତେକ ଅଞ୍ଚଳରେ ପର୍ଯ୍ୟାୟକ୍ରମେ ଲକଡାଉନ ଜାରି ହେବା ନେଇ ସ୍ପଷ୍ଟ ହୋଇଛି । ଦେଶରେ କୋଭିଡ-19 ମିଡିଆ ସେଲର ସଂଯୋଜକ ହବିବୁର ରହମାନ ଖାନ ଏନେଇ କହିଛନ୍ତି କି ଆଗାମୀ ଦୁଇ-ତିନି ଦିନ ମଧ୍ୟରେ କେଉଁ ସବୁ ଅଞ୍ଚଳରେ ଲକଡାଉନ ଲାଗୁ ହେବ ତାହା ସ୍ପଷ୍ଟ କରାଯିବ ।