ଢାକା: ଜେଲରୁ ମୁକ୍ତ ହୋଇ ନିଜ ବାସଭବନରେ ଚିକିତ୍ସିତ ଅଛନ୍ତି ବାଂଲାଦେଶ ପୂର୍ବତନ ପ୍ରଧାନମନ୍ତ୍ରୀ ଖଲିଦା ଜିଆ । ଦୁଇଟି ଦୁର୍ନୀତି ମାମଲାରେ ଫସି ସେ 25 ମାସର କାରାଦଣ୍ଡ ଭୋଗିଥିଲେ । ଏହାପରେ ତାଙ୍କୁ ମାର୍ଚ୍ଚ 25ରେ ମୁକ୍ତ କରାୟିବା ପରେ ଜେଲରୁ ସିଧା ତାଙ୍କ ବାସଭବନ ‘ଫେରୋଜା’କୁ ନିଆଯାଇଥିଲା । ହେଲେ ଅସୁସ୍ଥତା ପାଇଁ ଚିକିତ୍ସା ଜାରି ରହିଥିବାରୁ ୟୁନାଇଟେଡ ହସ୍ପିଟାଲରେ ତାଙ୍କୁ ଭର୍ତ୍ତି କରିବା ପାଇଁ ବାଂଲାଦେଶ ନ୍ୟାସନାଲିଷ୍ଟ ପାର୍ଟିର ନେତାମାନେ ଅନୁରୋଧ କରିଥିଲେ ।
ହେଲେ କୋରୋନା ସଂକ୍ରମଣ ପାଇଁ ବର୍ତ୍ତମାନ ତାଙ୍କୁ ୟୁନାଇଟେଡ ହସ୍ପିଟାଲ ସ୍ଥାନାନ୍ତର କରିବା ସମ୍ଭବ ନୁହେଁ । ତେଣୁ ତାଙ୍କୁ ଚିକିତ୍ସା ପାଇଁ ପ୍ରସ୍ତୁତ ହୋଇଥିବା ଏକ୍ସପର୍ଟ ଫିଜିସିଆନଙ୍କ ଟିମ ଘରେ ହିଁ ତାଙ୍କର ଚିକିତ୍ସା ଜାରି ରଖିଛନ୍ତି । ଏନେଇ ଗଣମାଧ୍ୟମକୁ ସୂଚନା ଦେଇଛନ୍ତି ଖଲିଦାଙ୍କ ଭଉଣୀ ସେଲିମା ଇସଲାମ । ଖଲିଦା ଜେଲରୁ ମୁକ୍ତ ହେବା ଦିନଠାରୁ ହୋମ କ୍ବାରେଣ୍ଟାଇନରେ ହିଁ ରହିଛନ୍ତି । ବର୍ତ୍ତମାନ ତାଙ୍କ ସ୍ବାସ୍ଥ୍ୟାବସ୍ଥାରେ କିଛିଟା ସୁଧାର ଆସିଥିବା ସେଲିମା କହିଥିଲେ ।