କାବୁଲ: ଗତ ଫେବୃଆରୀରେ ଆମେରିକା ଓ ତାଲିବାନ ମଧ୍ୟରେ ସ୍ବାକ୍ଷରିତ ହୋଇଥିବା ଶାନ୍ତି ଚୁକ୍ତି ଅନୁଯାୟୀ ଖୁବଶୀଘ୍ର ଆୟୋଜିତ ହେବାକୁ ଯାଉଛି ଇଣ୍ଟ୍ରା-ଆଫଗାନ ଚୁକ୍ତି । ଏହି ଚୁକ୍ତିର ଆୟୋଜନ ପାଇଁ ବର୍ତ୍ତମାନ ସୁଦ୍ଧା 12ଟି ରାଷ୍ଟ୍ର ଇଚ୍ଛା ପ୍ରକାଶ କରିଥିବା ସ୍ପଷ୍ଟ କରିଛନ୍ତି ଆଫଗାନ ମନ୍ତ୍ରୀ । ଗୁରୁବାର ଗଣମାଧ୍ୟମକୁ ସୂଚନା ଦେଇ ବୈଦେଶିକ ମନ୍ତ୍ରୀ ମହମ୍ମଦ ହନିଫ ଆତ୍ମର ଏହା ପ୍ରକାଶ କରିଛନ୍ତି ।
ହନିଫଙ୍କ କହିବା ଅନୁଯାୟୀ ତୁର୍କମେନିସ୍ତାନ, କାଜାଖସ୍ତାନ, ଚୀନ, ଋଷିଆ, ତୁର୍କୀ, ଇରାନ, କତାର, ଇଣ୍ଡୋନେସିଆ ଓ ଜାପାନ ସମେତ 12ଟି ରାଷ୍ଟ୍ର ଇଣ୍ଟ୍ରା-ଆଫଗାନ ଚୁକ୍ତିର ଆୟୋଜନ କରିବା ନେଇ ସ୍ପଷ୍ଟ କରିଛନ୍ତି । ସେପଟେ ଚୁକ୍ତି ମୁତାବକ ଆଫଗାନିସ୍ତାନ 5000 ତାଲିବାନୀ ବନ୍ଦୀଙ୍କୁ ମୁକ୍ତ କରିବା ପାଇଁ ସିଦ୍ଧ ହୋଇଥିଲା । ହେଲେ ଏଯାବତ୍ ମାତ୍ର 4400 ବନ୍ଦୀଙ୍କୁ ମୁକ୍ତ କରାଯାଇଛି । କିଛି ଗମ୍ଭୀର ସମସ୍ୟା ପାଇଁ ବଳକା 600 ବନ୍ଦୀଙ୍କୁ ମୁକ୍ତ କରାଯାଇପାରିନାହିଁ ବୋଲି ଆଫଗାନିସ୍ତାନ ସ୍ପଷ୍ଟ କରିଛି ।
ଆଗାମୀ ପର୍ଯ୍ୟାୟରେ ମୁକ୍ତ ହେବାକୁ ଥିବା 600 ବନ୍ଦୀଙ୍କ ତାଲିକା ପଠାଇବା ପାଇଁ ତାଲିବାନକୁ ସୂଚିତ କରାଯାଇଛି । ଏହି ପଦକ୍ଷେପ ଇଣ୍ଟ୍ରା-ଆଫଗାନ ଚୁକ୍ତିକୁ ଏକ ସୁରୁଖୁରୁରେ ଆରମ୍ଭ କରିବ ବୋଲି ହନିଫ ପ୍ରକାଶ କରିଛନ୍ତି । ପ୍ରତିବଦଳରେ ବୁଧବାର ହେଲମଣ୍ଡ ପ୍ରାନ୍ତରେ ତାଲିବାନ 30 ଆଫଗାନ ବନ୍ଦୀଙ୍କୁ ମୁକ୍ତ କରିଥିବା ଜଣା ପଡିଛି । ଏହାକୁ ମିଶାଇ ବର୍ତ୍ତମାନ ସୁଦ୍ଧା ତାଲିବାନ 845 ବନ୍ଦୀଙ୍କୁ ମୁକ୍ତ କରିସାରିଛି ।