ୱାଶିଂଟନ: ଦେଶରେ ପ୍ରଥମ କରୋନା ଭାଇରସ୍ ଜନିତ ମୃତ୍ୟୁ ଘୋଷଣା ହେବାପରେ ନୂତନ ଟ୍ରାଭେଲ ଆଜଭାଇଜରୀ ଜାରି କରିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଏହି ଆଡଭାଇଜରୀରେ ଇରାନ, ଇଟାଲୀ ଏବଂ ଦକ୍ଷିଣ କୋରିଆ ଯାତ୍ରା ନକରିବାକୁ ନାଗରିକଙ୍କୁ ପରାମର୍ଶ ଦିଆଯାଇଛି । ବର୍ତ୍ତମାନ କୋରୋନା ଭାଇରସ ବିପଦ ଆମେରିକା ପାଇଁ କମ୍ ରହିଥିଲେ ମଧ୍ୟ ଏହା ପରବର୍ତ୍ତୀ ସମୟରେ ହଠାତ୍ ବିପଦଜନକ ସାବ୍ୟସ୍ତ ହୋଇପାରେ ବୋଲି ଟ୍ରମ୍ପ କହିଛନ୍ତି ।
ଏନେଇ ଟ୍ରମ୍ପ କହିଛନ୍ତି, ଗତ 14 ଦିନ ମଧ୍ୟରେ ଯେଉଁ ବିଦେଶୀ ନାଗରିକ ଇରାନ ଯାଇଥିବେ, ସେମାନେ ଆମେରିକାରେ ପ୍ରବେଶ କରିପାରିବେ ନାହିଁ । ସେମାନଙ୍କ ପ୍ରବେଶ ଉପରେ ଆମେ ନିଷେଧାଦେଶ ଜାରି କରିଛୁ । ଆମ ଦେଶରେ ବିଶ୍ବର ସର୍ବଶ୍ରେଷ୍ଠ ସ୍ବାସ୍ଥ୍ୟସେବା ରହିଛି । ଆମେ ଇରାନର ଲୋକମାନଙ୍କୁ ସାହାଯ୍ୟ କରିବାକୁ ଇଚ୍ଛୁକ ଅଛୁ । ସେମାନେ କହିଲେ ଆମେ ନିଶ୍ଚିତ ଭାବରେ ସାହାଯ୍ୟର ହାତ ବଢାଇବୁ ବୋଲି ଟ୍ରମ୍ପ କହିଛନ୍ତି । ଆମେରିକା-ମେକ୍ସିକୋ ସୀମା ବନ୍ଦ କରିବା ସମ୍ବନ୍ଧରେ ପଚାରିବାରୁ ଟ୍ରମ୍ପ କହିଛନ୍ତି, ଦକ୍ଷିଣ ସୀମାକୁ ନେଇ ଆମେ ଚିନ୍ତିତ ଅଛୁ । ଏନେଇ ଆମେ ଆଲୋଚନା କରିବୁ ବୋଲି ଟ୍ରମ୍ପ କହିଛନ୍ତି ।