ୱାଶିଂଟନ: ଆମେରିକାରେ ରାଷ୍ଟ୍ରପତି ନିର୍ବାଚନକୁ ନେଇ ଥମୁନି ଉତ୍ତେଜନା । ୱାଶିଂଟନରେ ଦେଖାଦେଇଛି ହିଂସା । ସେପଟେ ହିଂସାକୁ ଉସୁକାଇବା ଅଭିଯୋଗରେ 12 ଘଣ୍ଟା ପାଇଁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଆକାଉଣ୍ଟକୁ ବନ୍ଦ କରିଛି ଟ୍ବିଟର । ବୁଧବାର ଟ୍ବିଟର ପକ୍ଷରୁ ଏପରି ନିଷ୍ପତ୍ତି ନିଆଯାଇଛି ।
ଏହାସହ ୱାଶିଂଟନ ସ୍ଥିତି ଉପରେ ଟ୍ରମ୍ପ କରିଥିବା 3ଟି ଟ୍ବିଟ୍କୁ ମଧ୍ୟ ହଟାଇଦେଇଛି ଟ୍ବିଟର । ଏପରି ଟ୍ବିଟ୍ ୱାଶିଂଟନରେ ପରିସ୍ଥିତି ବିଗାଡୁଥିବା ଦର୍ଶାଇ ଟ୍ବିଟର ପକ୍ଷରୁ ଏପରି ପଦକ୍ଷେପ ଗ୍ରହଣ କରାଯାଇଛି । ହିଂସାତ୍ମକ ପରିସ୍ଥିତିକୁ ଦେଖି ଟ୍ରମ୍ପଙ୍କୁ 3ଟି ଟ୍ବିଟ୍କୁ ହଟାଇବାକୁ ନିଷ୍ପତ୍ତି ନେଲୁ ବୋଲି ଟ୍ବିଟର ପକ୍ଷରୁ ଟ୍ବିଟ କରି ସୂଚନା ଦିଆଯାଇଛି ।
ଏହାସହ ଟ୍ବିଟର ଗାଇଡ ଲାଇନ ଅନୁସାରେ ଏପରି କରାଯାଇଥିବା ଟ୍ବିଟର ପକ୍ଷରୁ କୁହାଯାଇଛି । ଏହାସହ ଯଦି ଏହି ତିନୋଟି ଟ୍ବିଟକୁ ହଟାଇ ଦେଇନଥାନ୍ତୁ ତେବେ ଗାଇଡଲାଇନ ଅନୁସାରେ ଟ୍ରମ୍ପଙ୍କ ଆକାଉଣ୍ଟ ସମ୍ପୂର୍ଣ୍ଣ ବନ୍ଦ ହୋଇଯାଇଥାନ୍ତା ବୋଲି ଅନ୍ୟ ଏକ ଟ୍ବିଟ୍ କରି ଟ୍ବିଟର ପକ୍ଷରୁ କୁହାଯାଇଛି ।
ସୂଚନାଥାଉକି, ନିର୍ବାଚନ ଫଳାଫଳ ଉପରେ ଆମେରିକା ସଂସଦର ବୈଠକ ପୂର୍ବରୁ ହ୍ବାଇଟ ହାଉସ ଏବଂ ଆମେରିକାର କ୍ୟାପିଟାଲ ବିଲ୍ଡିଂରେ ଟ୍ରମ୍ପ ସମର୍ଥକଙ୍କ ଜୋରଦାର୍ ହଙ୍ଗାମା କରିଛନ୍ତି। ନିର୍ବାଚନ ଫଳାଫଳକୁ ନେଇ ଟ୍ରମ୍ପ ସମର୍ଥକ ହ୍ବାଇଟ ହାଉସ ଓ କ୍ୟାପିଟାଲ ବିଲ୍ଡିଂ ବାହାରେ ଜୋରଦାର ବିରୋଧ ପ୍ରଦର୍ଶନ କରିଛନ୍ତି । ଫଳରେ ପୋଲିସ ଓ ବିକ୍ଷୋଭକାରୀଙ୍କ ମଧ୍ୟରେ ସଂଘର୍ଷ ହୋଇଛି । ଯାହାଦ୍ବାରା ସମଗ୍ର ୱାଶିଂଟନରେ କର୍ଫ୍ୟୁ ଲାଗୁ କରାଯାଇଛି । ବିକ୍ଷୋଭକାରୀଙ୍କୁ ହଟାଇବା ପାଇଁ ଲୁହାବୁହା ଗ୍ୟାସ ପ୍ରୟୋଗ କରାଯିବା ସହ ଏବେ ସୁଦ୍ଧା 13 ଜଣଙ୍କୁ ଗିରଫ କରାଯାଇଛି । ସେପଟେ ଗୁଳି ଚାଳନାରେ ଜଣେ ମହିଳାଙ୍କ ମୃତ୍ୟୁ ହୋଇଥିବା ଜଣାପଡିଛି ।
ଆଉ ଦିନ କେଇଟା ପରେ ଦାୟିତ୍ବ ନେବେ ଆମେରିକାର ନବନିର୍ବାଚିତ ରାଷ୍ଟ୍ରପତି ଜୋ ବିଡେନ । ଏହା ପୂର୍ବରୁ ବୁଧବାର ସନ୍ଧ୍ୟାରେ ୱାଶି୍ଂଟନ ଡିସିରେ ହିଂସାତ୍ମକ ପରିସ୍ଥିତି ଉପୁଜିଛି । ଡେମୋକ୍ରାଟ ନେତା ଜୋ ବିଡେନଙ୍କ ବିଜୟକୁ ସହଜରେ ଗ୍ରହଣ କରିପାରୁନାହାନ୍ତି ଟ୍ରମ୍ପଙ୍କ ସମର୍ଥକ । ନିର୍ବାଚନ ପରେ ଟ୍ରମ୍ପ ବାରମ୍ବାର ନିର୍ବାଚନରେ ଜାଲିଆତି ହୋଇଥିବା ନେଇ ଅଭିଯୋଗ କରିଆସୁଛନ୍ତି ।
ସେପଟେ ଏହି ଘଟଣାକୁ ତୀବ୍ର ନିନ୍ଦା କରିଛନ୍ତି ଆମେରିକା ନବନିର୍ବାଚିତ ରାଷ୍ଟ୍ରପତି ଜୋ ବିଡେନ । ସେ କହିଛନ୍ତି ଯେ ମୁଁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ତାଙ୍କ ଶପଥ ପୂରଣ କରିବାକୁ ଏବଂ ସମ୍ବିଧାନର ସୁରକ୍ଷା କରିବାକୁ ଆହ୍ବାନ କରୁଛି । ଏହି ଅବରୋଧକୁ ଶେଷ କରିବାକୁ ଦାବି କରୁଛି । କ୍ୟାପିଟାଲ ବିଲଡିଂ ସାମନାରେ ହୋଇଥିବା ଏହି ସଂଘର୍ଷ ଦେଶଦ୍ରୋହ ସହ ସମାନ ବୋଲି କହିଛନ୍ତି ବିଡେନ ।
ବ୍ୟୁରୋ ରିପୋର୍ଟ, ଇଟିଭି ଭାରତ
