ୱାଶିଂଟନ: ରେକର୍ଡ ସୃଷ୍ଟି କରିବାରେ ଲାଗିଛି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଆପ୍ରୁଭାଲ ରେଟିଂ । କ୍ରମଶଃ ଏହି ରେଟିଂ ହାର ହ୍ରାସ ପାଇବାରେ ଲାଗିଥିବା ବେଳେ ଏବେ ସର୍ବନିମ୍ନ ସ୍ତରରେ ପହଞ୍ଚି ରେକର୍ଡ ସୃଷ୍ଟି କରିଛି ଏହି ଆପ୍ରୁଭାଲ ରେଟିଂ । ତେବେ କେବଳ ଗୋଟିଏ ନୁହେଁ 6ଟି ରାଜ୍ୟରେ ଏହି ହାର 45 ପ୍ରତିଶତକୁ ଖସିଥିବା ଦେଖିବାକୁ ମିଳିଛି । ଯାହା ଏଯାବତ୍ ରେକର୍ଡ ହୋଇଥିବା ଆପ୍ରୁଭାଲ ରେଟିଂ ମଧ୍ୟରେ ଟ୍ରମ୍ପଙ୍କ ପାଇଁ ସର୍ବନିମ୍ନ ସାବ୍ୟସ୍ତ ହୋଇଛି ।
ଏନେଇ ସିଏନବିସି ଦ୍ବାରା ହୋଇଥିବା ଚେଞ୍ଜ ରିସର୍ଚ୍ଚ ପୋଲ ସର୍ଭେରୁ ଏହା ସ୍ପଷ୍ଟ ହୋଇଛି । ଏଥିରେ ଦେଶର କୋଣ ଅନୁକୋଣରୁ ପ୍ରାୟ 1258 ସମ୍ଭାବ୍ୟ ମତଦାତାଙ୍କୁ ସାମିଲ କରାଯାଇଥିଲା । ଏଥିସହ 6ଟି ନିର୍ବାଚନ କ୍ଷେତ୍ର ଯଥା ଆରିଜୋନା, ଫ୍ଲୋରିଡା, ମିଚିଗାନ, ଉତ୍ତର କ୍ୟାରୋଲିନା, ପେନସିଲଭାନିଆ ଓ ୱିସ୍କୋନସିନରୁ 4322 ଜଣ ଭୋଟରଙ୍କୁ ସର୍ଭେରେ ସାମିଲ କରାଯାଇଥିଲା ।
ବୁଧବାର ଏହି ସର୍ଭେ ଅନୁଷ୍ଠିତ ହୋଇଥିଲା । ଯେଉଁଥିରେ ମାତ୍ର 45 ପ୍ରତିଶତ ନାଗରିକ ଟ୍ରମ୍ପଙ୍କ କାର୍ଯ୍ୟଶୈଳୀ ଓ ବର୍ତ୍ତମାନ ସୁଦ୍ଧାର କାର୍ଯ୍ୟ ପ୍ରଣାଳୀକୁ ସମର୍ଥନ କରିଥିବା ଦେଖାଯାଇଥିଲା । ପ୍ରତିବଦଳରେ 55 ପ୍ରତିଶତ ନାଗରିକ ଟ୍ରମ୍ପଙ୍କ କାର୍ଯ୍ୟଶୈଳୀରେ ଖୁସି ନଥିବା ପ୍ରକାଶ କରିଥିଲେ । ସେପଟେ ଏହି ସର୍ଭେରେ ସାମିଲ 59 ପ୍ରତିଶତ ନାଗରିକ ଏହା କହିଥିଲେ କି ଦେଶରେ କୋରୋନା ପରିସ୍ଥିତି ଗତ ଦୁଇ ସପ୍ତାହ ତୁଳନାରେ ଅଧିକ ବିଗିଡିବାରେ ଲାଗିଛି । ଯାହା ପାଇଁ ଟ୍ରମ୍ପଙ୍କ ନିଷ୍ପତ୍ତି ଓ ଶାସନ ପ୍ରକ୍ରିୟା ଅନେକାଂଶରେ ଦାୟୀ ।
ତେବେ ଟ୍ରମ୍ପଙ୍କ ଆପ୍ରୁଭାଲ ରେଟିଂ କମ ହେବା ପଛରେ କୋରୋନା ସ୍ଥିତି ମୁକାବିଲାରେ ବିଫଳତା ମୁଖ୍ୟ ଦାୟୀ ବୋଲି ଆକଳନ କରାଯାଉଛି । କୋରୋନା ମୁକାବିଲାରେ ସାମିଲ ପ୍ରାୟ 54 ପ୍ରତିଶତ ନାଗରିକ ଏପରି ମଧ୍ୟ ମତ ଦେଇଥିଲେ କି ଟ୍ରମ୍ପଙ୍କ ସ୍ଥାନରେ ପୂର୍ବତନ ଉପରାଷ୍ଟ୍ରପତି ଜୋ ବିଡେନ କିମ୍ବା ଅନ୍ୟ ଗଣତନ୍ତ୍ରର ଶାସକ ଥିଲେ ପରିସ୍ଥିତି ଅଧିକ ଭଲ ଭାବେ ପରିଚାଳିତ ହୋଇ ପାରିଥାଆନ୍ତା ।
@IANS
