ପରିସ୍ଥିତିରେ ଉନ୍ନତିର ଅର୍ଥ ନୁହେଁ ନିୟମର ଉଲ୍ଲଂଘନ

ଧିମା ହେବାରେ ଲାଗିଛି କୋରୋନାର ପ୍ରଭାବ । ସପ୍ତାହେ ପୂର୍ବରୁ ଯେଉଁ ଡାକ୍ତରଖାନାରେ ଦିନକୁ ହଜାରରୁ ଉର୍ଦ୍ଧ୍ବ ଆକ୍ରାନ୍ତ ଆସୁଥିଲେ ଆଜି ସେଠାରେ 300ରୁ କମ ଆକ୍ରାନ୍ତ ଭର୍ତ୍ତି ହେଉଛନ୍ତି ।

ନ୍ୟୁୟର୍କ: ଧିମା ହେବାରେ ଲାଗିଛି କୋରୋନାର ପ୍ରଭାବ । ସପ୍ତାହେ ପୂର୍ବରୁ ଯେଉଁ ଡାକ୍ତରଖାନାରେ ଦିନକୁ ହଜାରରୁ ଉର୍ଦ୍ଧ୍ବ ଆକ୍ରାନ୍ତ ଆସୁଥିଲେ ଆଜି ସେଠାରେ 300ରୁ କମ ଆକ୍ରାନ୍ତ ଭର୍ତ୍ତି ହେଉଛନ୍ତି । ଏ ହେଉଛି ଆମେରିକାର ନ୍ୟୁୟର୍କସ୍ଥିତ ଏକ ଡାକ୍ତରଖାନାର ଦୃଶ୍ୟ । ଯେଉଁଠାରେ ଏବେ ଧିରେ ଧିରେ କମିବାରେ ଲାଗିଛନ୍ତି ଆକ୍ରାନ୍ତଙ୍କ ସଂଖ୍ୟା ।

ଏହାକୁ ନେଇ ଅନେକ ଖୁସି ମନାଉଥିବା ବେଳେ ଅନ୍ୟପଟେ ଏହାକୁ ନେଇ ଏକ ସତର୍କ ସୂଚନା ଜାରି କରିଛନ୍ତି ଆମେରିକୀୟ ଡାକ୍ତର । ଶନିବାର ହ୍ବାଇଟହାଉସ କୋରୋନା ଭାଇରସ ଟାସ୍କ ଫୋର୍ସର ଡ଼ଃ ଡିବୋରା ବିର୍କ୍ସ ଓ ଡ଼ଃ ଆନ୍ଥୋନୀ ଫୌସିଙ୍କ କହିବା ମୁତାବକ ବର୍ତ୍ତମାନ ପରିସ୍ଥିତି ଧିରେ ଧିରେ ନିୟନ୍ତ୍ରଣକୁ ଆସୁଛି ତା' ମାନେ ନୁହେଁ ସମସ୍ତ ବଳବତ୍ତର ନିୟମକୁ ଲୋକେ ଭୁଲି ଯିବେ କିମ୍ବା ଖୁସିରେ ଆତ୍ମହରା ହୋଇ ପୂର୍ବ ପରି ଜୀବନଯାପନ କରିବା ଆରମ୍ଭ କରିବେ । ପରିସ୍ଥିତି ସୁଧୁରିବାର ମାନେ ନୁହେଁ କି ଆଗକୁ ରୋଗ ବ୍ୟାପିବାର ସମ୍ଭାବନା କମିଯାଇଛି ।

କେତେକ ଆମେରିକୀ ନାଗରିକ ସାମାଜିକ ଦୂରତା ନିୟମ ନମାନୁଥିବା ଦେଖିବାକୁ ମିଳୁଛି । ଯାହା କି ପରିସ୍ଥିତିକୁ ଅଧିକ ଗମ୍ଭୀର କରିପାରେ । ତେଣୁ ଅତି ଖୁସିରେ ଆତ୍ମହରା ହେବା ଅପେକ୍ଷା ଜଣେ ସଜାଗ ନାଗରିକ ହେବାର କର୍ତ୍ତବ୍ୟ ପାଳନ କରନ୍ତୁ ଓ ସାମାଜିକ ଦୂରତାର ପ୍ରକୃତ ତାତ୍ପର୍ଯ୍ୟ ବୁଝିବା ଦରକାର । ନିଜେ ସଜାଗ ହେବା ସହ ଆଖପାଖର ଲୋକଙ୍କୁ ମଧ୍ୟ ସଜାଗ କରିବା ଆବଶ୍ୟକ ।