‘କୋରୋନା ମୁକାବିଲାରେ ଏହାଠାରୁ ଭଲ ମୁଁ କିଛି କରିପାରିନଥାନ୍ତି’

ଆମେରିକାରେ ଅସମ୍ଭାଳ କୋରୋନା ପରିସ୍ଥିତି । ସେପଟେ ହ୍ବାଇଟହାଉସ କୋରୋନା ଭାଇରସ ଟାସ୍କ ଫୋର୍ସ ବିବରଣୀରେ ପ୍ରତିଦିନ ନୂଆ ନୂଆ ବାହାନା ନେଇ ନଜର ଆସୁଛନ୍ତି ରାଷ୍ଟ୍ରପତି ଟ୍ରମ୍ପ ।

ନ୍ୟୁୟର୍କ: ଆମେରିକାରେ ଅସମ୍ଭାଳ କୋରୋନା ପରିସ୍ଥିତି । ବିଗତ 48 ଘଣ୍ଟାରେ ଗଡିଲାଣି ପ୍ରାୟ 4 ହଜାର ମୁଣ୍ଡ । ଏମିତିରେ ନିଜ ଦୋଷ ସ୍ବୀକାର କରିବା ବଦଳରେ ଅନ୍ୟ ମୁଣ୍ଡରେ ଅଠା ବୋଳିବାରେ ବ୍ୟସ୍ତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ପ୍ରଥମେ ଗଣମାଧ୍ୟମ, ଏବେ ଗଣତାନ୍ତ୍ରିକ ପ୍ରତିନିଧି ଓ ବିଶ୍ବ ସ୍ବାସ୍ଥ୍ୟ ସଙ୍ଗଠନକୁ ବି ଆଙ୍ଗୁଠି ଉଠାଇବାକୁ ପଛାଇ ନାହାନ୍ତି ଟ୍ରମ୍ପ ।

ଏମିତିରେ ହ୍ବାଇଟହାଉସ କୋରୋନା ଭାଇରସ ଟାସ୍କ ଫୋର୍ସ ବିବରଣୀ ଏକପ୍ରକାର ଦୋଷ ଲଦା ବିବରଣୀରେ ପରିଣତ ହୋଇଛି । ପ୍ରତିଦିନ ନୂଆ ନୂଆ ବାହାନା ନେଇ ରାଷ୍ଟ୍ରପତି ଟ୍ରମ୍ପ ନଜର ଆସୁଛନ୍ତି । ହେଲେ ନିଜ ଦୋଷକୁ ଅଣଦେଖା କରିବାର ସମ୍ଭବ ପ୍ରୟାସ ଜାରି ରଖିଛନ୍ତି ସେ । ଯାହାକୁ କେତେକ ବୁଦ୍ଧିଜୀବୀ ପୁରୁଣା ରାଜନୈତିକ ରଣନୀତି ବୋଲି ଆଖ୍ୟା ଦେଇଛନ୍ତି ।

ତେବେ ଦେଶରେ କୋରୋନାର ପ୍ରକୋପ ପାଇଁ ରାଷ୍ଟ୍ରପତି ଟ୍ରମ୍ପ ପ୍ରସ୍ତୁତ କରିଥିବା ଦୋଷୀ ତାଲିକାରେ ସର୍ବପ୍ରଥମେ ରହିଥିଲା ଚୀନ । କାରଣ ଚୀନରେ ଏହାର ଉତ୍ପତ୍ତି ହୋଇଥିବା ଅନୁମାନ କରାଯାଉଥିବା ବେଳେ ଚୀନ ଏହାକୁ ସଠିକ୍‌ ଭାବେ ନିୟନ୍ତ୍ରଣ କରିନଥିବାରୁ ସାରା ବିଶ୍ବକୁ ଏହା ଗ୍ରାସିଛି ବୋଲି ସିଧାସଳଖ ଆକ୍ଷେପ କରିଛନ୍ତି ଡୋନାଲ୍ଡ ଟ୍ରମ୍ପ । ଅନ୍ୟପଟେ ସେ ଏହା ମଧ୍ୟ କହିବାକୁ ପଛାଇ ନାହାନ୍ତି କି ଦେଶରେ କୋରୋନା ସଂକ୍ରମଣ ନିୟନ୍ତ୍ରଣ ପାଇଁ ଏହାଠାରୁ ଭଲ ସେ କିଛି କରିପାରିନଥା'ନ୍ତେ ।

ଗୋଟିଏ ଦେଶରେ ନିଆଁ ବେଗରେ ବ୍ୟାପୁଛି କୋରୋନା ସଂକ୍ରମଣ, ଅନ୍ୟପଟେ ଟ୍ରମ୍ପଙ୍କ ମନମୋଟା ଭାବକୁ ନେଇ ଏବେ ଏକପ୍ରକାର ଚିନ୍ତିତ ଦେଶବାସୀ ।