ସାନ ଫ୍ରାନ୍ସିସ୍କୋ: କୋରୋନା ମହାମାରୀ ପାଇଁ ସିନେମା ହଲ ଆଗରେ ତାଲା ପଡିଥିବା ବେଳେ ରାତାରାତି ଆକାଶଛୁଆଁ ଚାହିଦା ସାଉଣ୍ଟିଛି ଅନଲାଇନ ପ୍ଲାଟଫର୍ମ । ଏମିତିରେ ଅନେକ ପ୍ରଡକ୍ସନ ହାଉସ ମଧ୍ୟ ନିଜ ପ୍ରୋଜେକ୍ଟ ସହ ଅନଲାଇନ ପ୍ଲାଟଫର୍ମ ମୁହାଁ ହେଉଥିବା ଦେଖାଯାଉଛି । ଏପରି ସ୍ଥିତିରେ ନିଜର ଘରୋଇ ଭିଡିଓ ସ୍ମାର୍ଡ ଡିଭାଇସ ନେଷ୍ଟ ହବ୍ ଓ ନେଷ୍ଟ ହବ୍ ମ୍ୟାକ୍ସରେ ନେଟଫ୍ଲିକ୍ସକୁ ଆଡ କରିଛି ଗୁଗଲ । ଏନେଇ ମଙ୍ଗଳବାର ବିଧିବଦ୍ଧ ଭାବେ ଗୁଗୁଲ ଘୋଷଣା କରିଛି ।
ତେବେ ସାରା ବିଶ୍ବରେ ସମସ୍ତ ନେଷ୍ଟ ସ୍ମାର୍ଟ ଡିସପ୍ଲେରେ ନେଟଫ୍ଲିକ୍ସ ରୋଲ ଆଉଟ ହୋଇଥିବା ନେଇ ଗୁଗଲ ଏହି ଘୋଷଣାରେ ସ୍ପଷ୍ଟ କରିଛି । ଯଦି କୌଣସି ୟୁଜର୍ସଙ୍କର ନିଜସ୍ବ ନେଟଫ୍ଲିକ୍ସ ଆକାଉଣ୍ଟ ରହିଛି ତେବେ ସେ ନିଜ ଆକାଉଣ୍ଟ ସହ ଏବେ ନିଜ ନେଷ୍ଟ ସ୍ମାର୍ଟ ଡିସପ୍ଲେରେ ଲିଙ୍କ କରିପାରିବେ ବୋଲି ଜଣା ପଡିଛି । ଅଧିକ ଲାଭ ପାଇପାରିବା ପାଇଁ ଗୁଗଲ ହୋମ କିମ୍ବା ଆସିଷ୍ଟାଣ୍ଟ ଆପ୍ରେ ନିଜ ଆକାଉଣ୍ଟକୁ ୟୁଜର୍ସ ଲିଙ୍କ କରିପାରିବେ । ଏହାପରେ ୟୁଜର୍ସ ନେଟଫ୍ଲିକ୍ସ ମୁଭି, ଟିଭି ଶୋ’ ଓ ଡକ୍ୟୁମେଣ୍ଟାରୀ ଆଦିର ମଜା ଉଠାଇପାରିବେ ।