ସାକ୍ରାମେଣ୍ଟୋ: କାଲିଫର୍ଣ୍ଣିଆରେ ବଢୁଥିବା କୋରୋନା ସଂକ୍ରମଣରୁ ବାଦ ପଡିପାରିନି ବିଧାନସଭା । ଏନେଇ ବିଧାନସଭା ଅଧିବେଶନକୁ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ସ୍ଥଗିତ ରଖାଯାଇଛି । ସେପଟେ ରାଜ୍ୟରେ ବଢୁଥିବା ସଂକ୍ରମଣକୁ ନଜରରେ ରଖି ବାର, ପବ୍ ଓ ରେସ୍ତୋରାଁ ଗୁଡିକ ଉପରେ କଟକଣା କଡାକଡି କରାଯାଇଛି । ବାଚସ୍ପତି ଆନ୍ଥୋନୀ ରେଣ୍ଡେନଙ୍କ କାର୍ଯ୍ୟାଳୟ ପକ୍ଷରୁ ଏସମ୍ପର୍କରେ ସୂଚନା ଦିଆଯାଇ କୁହାଯାଇଛି କି ବର୍ତ୍ତମାନ ସୁଦ୍ଧା ବିଧାନସଭାରୁ 5 ଜଣ ସଦସ୍ୟ କୋରୋନା ସଂକ୍ରମିତ ହୋଇଥିବା ଚିହ୍ନଟ ହୋଇଛନ୍ତି ।
ବିଧାନସଭାରୁ ଚିହ୍ନଟ ଆକ୍ରାନ୍ତଙ୍କ ମଧ୍ୟରେ ରହିଛନ୍ତି ମହିଳା ସଦସ୍ୟ ତଥା କୂଟନୀତିଜ୍ଞ ଅଟମ୍ନ ବର୍କେ । ଗତମାସରେ ହୋଇଥିବା ବଜେଟ ଅଧିବେଶନରେ ସେ ଜନୈକ ସଂକ୍ରମିତ ଆଇନଜୀବୀଙ୍କ ସଂସ୍ପର୍ଶରେ ଆସି ଆକ୍ରାନ୍ତ ହୋଇଥିବା ଅନୁମାନ କରାଯାଉଛି । ତେବେ ଆସନ୍ତା ଜୁଲାଇ 13ରେ ବିଧାନସଭା ଅଧିବେଶନ ହେବା ନେଇ ନିର୍ଦ୍ଧାରିତ ହୋଇଥିବା ବେଳେ କୋରୋନା ସଂକ୍ରମଣ ପାଇଁ ଏହାକୁ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖାଯାଇଛି ।