‘କୋରୋନା ଆକ୍ରମଣର ଶିକାର ହୋଇଛି ଆମେରିକା’

ବିଶ୍ବର ସବୁଠାରୁ ଶକ୍ତିଶାଳୀ ରାଷ୍ଟ୍ର ଭାବେ ଗତ ତିନି ବର୍ଷ ହେବ ନିଜ ସ୍ଥାନ ବଜାୟ ରଖିଛି ଯୁକ୍ତରାଷ୍ଟ୍ର ଆମେରିକା । ହେଲେ 1917ର ଫ୍ଲୁ ପରେ ଏବେ କୋରୋନା ରାଷ୍ଟ୍ର ପାଇଁ ଦ୍ବିତୀୟ ସର୍ବବୃହତ କ୍ଷତି ଭାବେ ପରିଣତ ହୋଇଛି ।

ୱାଶିଂଟନ: ବିଶ୍ବର ସବୁଠାରୁ ଶକ୍ତିଶାଳୀ ରାଷ୍ଟ୍ର ଭାବେ ଗତ ତିନି ବର୍ଷ ହେବ ନିଜ ସ୍ଥାନ ବଜାୟ ରଖିଛି ଯୁକ୍ତରାଷ୍ଟ୍ର ଆମେରିକା । ହେଲେ 1917ର ଫ୍ଲୁ ପରେ ଏବେ କୋରୋନା ରାଷ୍ଟ୍ର ପାଇଁ ଦ୍ବିତୀୟ ସର୍ବବୃହତ କ୍ଷତି ଭାବେ ପରିଣତ ହୋଇଛି । କିଛି ଦିନ ତଳେ ଆମେରିକା ନିଜର ସବୁଠାରୁ ଭଲ ବର୍ଷ ଦେଖିବା ଆରମ୍ଭ କରିଥିବା ବେଳେ ହଠାତ୍‌ କୋରୋନା ମାଡ ଦେଶର ଅର୍ଥନୈତିକ ଅଣ୍ଟାକୁ ଦୁର୍ବଳ କରିଦେଇଛି । ଗୁରୁବାର ହ୍ବାଇଟହାଉସରେ ବିବରଣୀ ଦେଇ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ବୟାନ ଦେଇଛନ୍ତି ।

ସେ କହିଛନ୍ତି କି ଏଥିରେ ଟିକେ ବି ସନ୍ଦେହ ନାହିଁ କି ଚୀନ ଓ ଜାପାନ ଅପେକ୍ଷା ଆମେରିକା ଗତ 3 ବର୍ଷ ମଧ୍ୟରେ ଅନେକ ଉନ୍ନତି ଦେଖିଛି । ଅନେକ ବଡ ବଡ କମ୍ପାନୀ ବଜାରରେ ନିଜକୁ ପ୍ରତିଷ୍ଠା କରିବା ସହ ଆଧିପତ୍ୟ ପ୍ରସ୍ତୁତ କରିଥିଲେ । ହେଲେ କିଛି ବହିରାଗତ ବ୍ୟକ୍ତିଙ୍କ ପାଇଁ ଆଜି ବିଶ୍ବର ସବୁଠାରୁ ଶକ୍ତିଶାଳୀ ରାଷ୍ଟ୍ର ଆଣ୍ଠେଇ ପଡିଛି । ହେଲେ ଚିନ୍ତା ନାହିଁ । ରାଷ୍ଟ୍ର ପୁଣି ନିଜ ସ୍ଥିତିକୁ ଫେରିବ ।

ହେଲେ ଏଥିପାଇଁ କିଛି ଦିନ ଧୈର୍ଯ୍ୟର ସହ ଅପେକ୍ଷା କରିବାକୁ ହେବ । ଏଥିସହ କିଛି ଆର୍ଥିକ ସହାୟତାର ଆବଶ୍ୟକତା ମଧ୍ୟ ରହିଛି । ତେବେ କୋରୋନାକୁ ଦୃଷ୍ଟିରେ ରଖି ରାଷ୍ଟ୍ରର ସବୁଠାରୁ ଅଗ୍ରଣୀ କେତୋଟି କମ୍ପାନୀକୁ ସମ୍ପୂର୍ଣ୍ଣ ବନ୍ଦ କରିବାକୁ ପଡିଛି । ଯାହାକୁ ପୁଣି ନିଜ ସ୍ଥାନକୁ ଫେରିବା ପାଇଁ କିଛି ସମୟ ଆବଶ୍ୟକ । ହେଲେ ଆମେ ହାର ମାନିନୁ । ରାଷ୍ଟ୍ରରେ ବର୍ତ୍ତମାନ ନୂଆ କୋରୋନା ଆକ୍ରାନ୍ତଙ୍କ ସଂଖ୍ୟା କ୍ରମଶଃ ହ୍ରାସ ପାଇବାରେ ଲାଗିଛି । ଏଥିସହ ଏବେ ଆମେରିକାରେ କୋରୋନା ମୃତ୍ୟୁ ସଂଖ୍ୟା 47 ହଜାରରେ ପହଞ୍ଚିଛି ଓ ଆକ୍ରାନ୍ତଙ୍କ ସଂଖ୍ୟା 8,52,000ରୁ ଊର୍ଦ୍ଧ୍ବରେ ରହିଛି ।