ମୁମ୍ବାଇ:ଲମ୍ବା ସମୟ ଧରି ଚାଲିଥିବା ଦୁଃସାହସିକ ରିଆଲିଟି ଶୋ' ଖତରୋଁ କେ ଖିଲାଡି ଶେଷ ହୋଇଛି । ଶୋ'କୁ ତାର ବିଜେତା ମିଳିଛି । ଡ୍ୟାନ୍ସ କୋରିଓ ଗ୍ରାଫର ତୁଷାର କାଲିଆ ସିଜିନର ବିଜେତା ହୋଇଛନ୍ତି । ଫୈଜଲ ଶେଖ ଓ ମୋହିତ ମଲିକଙ୍କୁ ହରାଇ ଟ୍ରଫି ହାତେଇଛନ୍ତି ତୁଷାର । ଏହି ଟ୍ରଫି ଜିତିବା ପରେ ତୁଷାର ବେଶ ଖୁସିଥିବା କହିଛନ୍ତି ।
ଶୋ'ର ଜଣେ ଦମଦାର ପ୍ରତିଯୋଗୀ ଥିଲେ ତୁଷାର । ଆରମ୍ଭରୁ ହିଁ ସମସ୍ତ ବାଧା ବିଘ୍ନ ପରେ ବି ଷ୍ଟଣ୍ଟ ଶେଷ କରୁଥିଲେ । ଏହି ରିଆଲିଟି ଶୋ'କୁ ଫିଲ୍ମ ନିର୍ଦ୍ଦେଶକ ରୋହିତ ସେଟ୍ଟୀ ହୋଷ୍ଟ କରୁଥିଲେ । ଫାଇନାଲରେ ଫୈସଲ ଶେଖ ଓ ଅଭିନେତା ମୋହିତ ମଲିକ ରହିଥିଲେ । ତାଙ୍କ ସହ ବିଗବସ 15 ବିଜେତା ରୁବିନା ଦଲିକ ଏବଂ ଜନ୍ନତ ଜୁବେର ମଧ୍ୟ ଫାଇନାଲରେ ପହଞ୍ଚିଥିଲେ । ବିଜେତା ତୁଷାରଙ୍କୁ ଟ୍ରଫି ସହ 20 ଲକ୍ଷ ଟଙ୍କାର ପୁରସ୍କାର ରାଶି ମିଳିଛି । ରବିବାର ଅନୁଷ୍ଠିତ ଫାଇନାଲରେ ଶୋ'ର ପୂର୍ବ ପ୍ରତିଯୋଗୀଙ୍କ ସମେତ ଅଭିନେତା ରଣବୀର ସିଂ, ପୂଜା ହେଗଡେ ଏବଂ ଜନି ଲିବର ଉପସ୍ଥିତ ଥିଲେ । ସିଜିନରେ ତୁଷାର ସବୁ ଷ୍ଟଣ୍ଡରେ ଶତ ପ୍ରତିଶତ ପ୍ରଦର୍ଶନ କରିଥିଲେ । ସେ ହିଁ ବିଜେତା ହେବେ ବୋଲି ଆକଳନ କରାଯାଉଥିଲା ।