ମୁମ୍ବାଇ: ରାଘବ ଚଢାଙ୍କ ସହ ବିବାହ ଗୁଜବକୁ ନେଇ ଆଜିକାଲି ଶିରୋନାମାରେ ରହିଛନ୍ତି ବଲିଉଡ ଅଭିନେତ୍ରୀ ପରିଣୀତି ଚୋପ୍ରା। ପରିଣୀତିଙ୍କୁ ଅନେକ ଥର ସ୍ପଟ କରାଯାଇଥିବା ବେଳେ ବିବାହକୁ ନେଇ ପ୍ରଶ୍ନ କରାଯାଇଥାଏ। ସେହି ସମୟରେ ପରିଣୀତି ହସି ଦେଇ ଚାଲିଯାଇଥାନ୍ତି । ଏପରିକି ନିଜ ବିବାହକୁ ନେଇ ଏପର୍ଯ୍ୟନ୍ତ ପରିଣୀତି ଏବଂ ରାଘବ କୌଣସି ସ୍ପଷ୍ଟ କରିନଥିବା ବେଳେ ପୁଣି ଉଭୟଙ୍କୁ ଏକାଠି ଦେଖିବାକୁ ମିଳିଛି । ଯାହାର ଭିଡିଓ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ଯେଉଁଥିରେ ପରିଣୀତି ରାଘବ ଚଢାଙ୍କ ସହ ଷ୍ଟାଡିୟମରେ ଆଇପିଏଲ ମ୍ୟାଚ ଉପଭୋଗ କରୁଥିବାର ନଜର ଆସିଛନ୍ତି । ମ୍ୟାଚ୍ ସମୟରେ ଉଭୟଙ୍କୁ ଏକାଠି ଦେଖି ପ୍ରଶଂସକଙ୍କ ଖୁସି ଦ୍ୱିଗୁଣିତ ହୋଇଯାଇଛି ।
ମିଡିଆ ରିପୋର୍ଟ ଅନୁଯାୟୀ, ଏହି ଲଭବାର୍ଡଙ୍କ ମେ’ 13ରେ ନିର୍ବନ୍ଧ ହେବାକୁ ଯାଉଛି । ଉଭୟ ଏନେଇ କୌଣସି ବିଧିବଦ୍ଧ ଘୋଷଣା କରିନଥିବା ବେଳେ ପୁଣି ଉଭୟଙ୍କୁ ଆଇପିଏଲ୍ ଷ୍ଟାଡିୟମରେ ଏକାଠି ଦେଖିବାକୁ ମିଳିଛି । ଏହି ସମୟରେ ଷ୍ଟାଡିୟମରେ ପ୍ରଶଂସକମାନେ କ୍ରିକେଟ୍ ଅପେକ୍ଷା ଏହି ଦୁଇ ସେଲିବ୍ରେଟଙ୍କ ଉପରେ ଅଧିକ ଧ୍ୟାନ ଦେଇଥିଲେ । ମ୍ୟାଚ୍ ସମୟରେ ପ୍ରଶଂସକମାନେ ବାରମ୍ବାର 'ପରିଣୀତି ଭାବି... ପରିଣୀତି ଭାବି' କହି ଉତ୍ସାହିତ କରୁଥିଲେ।
ମ୍ୟାଚ୍ ସମୟରେ ପରିଣୀତି ଚୋପ୍ରା ଏବଂ ରାଘବ ଚଢା ସ୍ମାଇଲ ସହ ପୋଜ୍ ଦେଇ ଫଟୋ ସୁଟ୍ କରିଥିଲେ । ଉଭୟଙ୍କୁ ବ୍ଲାକ ଆଉଟଫିଟରେ ଦେଖିବାକୁ ମିଳିଥିଲା । ପରିଣୀତି ବ୍ଲାକ ଗାଉନରେ ନଜର ଆସିଥିବା ବେଳେ ରାଘବ ବ୍ଲାକ ସାର୍ଟ ପିନ୍ଧିଥିବାର ନଜର ଆସିଛନ୍ତି । ଆଇପିଏଲ୍ ମ୍ୟାଚ୍ ସମୟରେ ଯେତେବେଳେ ଫ୍ୟାନ୍ସ 'ପରିଣୀତି ଭାବି' ନାରା ଦେଉଥିଲେ ସେତେବେଳେ ଭିଆଇପି ଷ୍ଟାଣ୍ଡରୁ ହାତ ହଲାଇ ଉଭୟ ପ୍ରଶଂସକଙ୍କୁ ଅଭିବାଦନ ଜଣାଉଥିଲେ । ତେବେ ଉଭୟଙ୍କ ଏହି ଭିଡିଓ ବର୍ତ୍ତମାନ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଏନେଇ ଫ୍ୟାନ୍ସମାନେ ମଧ୍ୟ ଖୁବ ପସନ୍ଦ କରିବା ସହ କମେଣ୍ଟ ବର୍ଷା କରୁଛନ୍ତି । ଜଣେ ଫ୍ୟାନ୍ସ ଲେଖିଛନ୍ତି, 'ରାଜନୀତିରୁ ପରିଣୀତି ପର୍ଯ୍ୟନ୍ତ ଯାତ୍ରା ।'
ପରିଣୀତି ନିଜ ଇନଷ୍ଟାଗ୍ରାମ ଷ୍ଟୋରୀରେ ମ୍ୟାଚ୍ ସମୟର ଫଟୋ କଲେ ସେୟାର
ସେପଟେ ପରିଣୀତି ଚୋପ୍ରା ମଧ୍ୟ ନିଜ ଇନଷ୍ଟାଗ୍ରାମ ଷ୍ଟୋରୀରେ ଆଇପିଏଲ୍ ମ୍ୟାଚ୍ ସମୟର ଏକ ଫଟୋ ଏବଂ 3ଟି ଭିଡିଓ ସେୟାର କରିଛନ୍ତି । କିନ୍ତୁ ଏଥିରେ ସେ ରାଘବଙ୍କ ସହ ଏକାଠି ନଜର ଆସିନାହାନ୍ତି । ସେ ସେୟାର କରିଥିବା ଭିଡିଓରେ ଷ୍ଟାଡିୟମର ଦୃଶ୍ୟ ଦେଖାଇଛନ୍ତି । ପରିଣୀତିଙ୍କ ଏହି ଭିଡିଓ ଏବଂ ଫଟୋକୁ ଫ୍ୟାନ୍ସ ଲାଇକ କରି ଲାଲ ହାର୍ଟ ଏବଂ ଫାୟାର ଇମୋଜି ଦେଇଛନ୍ତି । ତେବେ ଦେଖିବାକୁ ବାକି ରହିଲା ଏହି କପଲ କେବେ ନିଜ ବିବାହ ଉପରେ ମୋହର ଲଗାଉଛନ୍ତି ।
