ହାଇଦ୍ରାବାଦ: ସୋସିଆଲ ମିଡିଆ ପୋଷ୍ଟ ପାଇଁ ଚର୍ଚ୍ଚାରେ ଶିଳ୍ପା ସେଟ୍ଟୀଙ୍କ ସ୍ୱାମୀ ରାଜ କୁନ୍ଦ୍ରା । ନିକଟରେ ନିର୍ମାତା ତଥା ଅଭିନେତା ରାଜ କୁନ୍ଦ୍ରା ଏକ କ୍ରିପ୍ଟିକ ପୋଷ୍ଟ ସେୟାର କରିଥିଲେ ଯେଉଁଥିରେ ସେ 'ଆମେ ଅଲଗା ହେଉଛୁ' ବୋଲି କହିଥିଲେ । ଏଥିପାଇଁ ଶିଳ୍ପା ସେଟ୍ଟୀ ଏବଂ ରାଜ ଅଲଗା ହେବା ନେଇ ଚର୍ଚ୍ଚା ଜୋର ଧରିଥିଲା । ଏହାରି ମଧ୍ୟରେ ବର୍ତ୍ତମାନ ରାଜ କୁନ୍ଦ୍ରା ଆଉ ଏକ ପୋଷ୍ଟ ସେୟାର କରି ଏହି ଗୁଜବ ଖବରର ଅନ୍ତ କରିଛନ୍ତି । ସେ କହିଛନ୍ତି ମୁଁ କେଉଁ ବ୍ୟକ୍ତିଙ୍କ ଠାରୁ ନୁହେଁ ବରଂ ମୋ ମାସ୍କ ଠାରୁ ଅଲଗା ହେଉଛି ।
ପୂର୍ବରୁ ରାଜ କୁନ୍ଦ୍ରା ଏକ୍ସରେ ଏକ ପୋଷ୍ଟ ସେୟାର କରିଥିଲେ । ଯେଉଁଥିରେ ସେ ଲେଖିଥିଲେ, 'ଆମେ ଅଲଗା ହେଉଛୁ ଏବଂ ଏହିପରି କଠିନ ପରିସ୍ଥିତିରେ ଆପଣଙ୍କୁ ଅନୁରୋଧ କରୁଛି ଆମକୁ ସମୟ ଦିଅ । ଏହି ଟ୍ବିଟ ବେଶ ଭାଇରାଲ ହୋଇଥିଲା । ଏବଂ ରାଜଙ୍କ ଏହି ପୋଷ୍ଟ ଦେଖି ୟୁଜର୍ସ ଆଶ୍ଚର୍ଯ୍ୟ ହେବା ସହ ଶିଳ୍ପା ସେଟ୍ଟୀଙ୍କ ଏବଂ ରାଜଙ୍କ ବିବାହ ବିଚ୍ଛେଦ ନେଇ ଚର୍ଚ୍ଚା ଜୋର ଧରିଥିଲା । ଏହା ପରେ ବର୍ତ୍ତମାନ ରାଜ ଆଉ ଏକ ପୋଷ୍ଟ ସେୟାର କରି ସ୍ପଷ୍ଟୀକରଣ ରଖିଛନ୍ତି । ଅଭିନେତା ଏକ୍ସରେ ପୋଷ୍ଟ କରି ସ୍ପଷ୍ଟ କରିଛନ୍ତି ଯେ, "ବିଦାୟ ମାସ୍କ... ବର୍ତ୍ତମାନ ଆମେ ଅଲଗା ହେବାର ସମୟ ଆସିଛି । ଗତ ଦୁଇ ବର୍ଷ ମଧ୍ୟରେ ମୋତେ ସୁରକ୍ଷିତ ରଖିଥିବାରୁ ଧନ୍ୟବାଦ । ପରବର୍ତ୍ତୀ ପର୍ଯ୍ୟାୟରେ ମୋର ଯାତ୍ରା UT69 ।''