କାର ଅଟକାଇ ଫ୍ୟାନ୍ସଙ୍କୁ ଭେଟିଲେ ରଜନୀକାନ୍ତ ହାଇଦ୍ରାବାଦ: ସୁପରଷ୍ଟାର ରଜନୀକାନ୍ତ ବର୍ତ୍ତମାନ ତାଙ୍କର ଆଗାମୀ ଚଳଚ୍ଚିତ୍ରର ସୁଟିଂରେ ବ୍ୟସ୍ତ ଅଛନ୍ତି, ଯାହାର ନାମ ହେଉଛି ଥାଲାଇୱର୍ 170 । ନିକଟରେ ସେ କେରଳରେ ଫିଲ୍ମର ଏକ ସୁଟିଂ ସମାପ୍ତ କରିଥିବା ବେଳେ ବର୍ତ୍ତମାନ ସେ ତାମିଲନାଡୁର ତିରୁନେଲବେଲିରେ ପହଞ୍ଚିଛନ୍ତି । ତିରୁନେଲବେଲିରୁ ରଜନୀକାନ୍ତଙ୍କ ଫଟୋ ଏବଂ ଭିଡିଓ ସୋସିଆଲ ମିଡିଆ ପ୍ଲାଟଫର୍ମରେ ଭାଇରାଲ ହୋଇଛି ।
2021 ମସିହାରେ ଆନ୍ନାଥେଙ୍କ ସଫଳତା ପରେ ୨୦୨୩ରେ ସେ ଜେଲର ସହ ପରଦାକୁ ଫେରିଥିଲେ । ଏହି ଫିଲ୍ମ ବେଶ ଲୋକପ୍ରିୟତା ସାଉଁଟିବା ସହ ସୁପରହିଟ୍ ହୋଇଥିଲା । ତେବେ ଜେଲର ରିଲିଜର ଦୁଇ ମାସ ପରେ ସେ ତାଙ୍କର ନୂତନ ପ୍ରୋଜେକ୍ଟ ଥାଲାଇୱର ୧୭୦ ପାଇଁ ସୁଟିଂ ଆରମ୍ଭ କରିଛନ୍ତି । ଏହି ସମୟରେ ସେ ସୁଟିଂ ପାଇଁ ତାମିଲନାଡ଼ୁ ଯାଉଥିବା ସମୟରେ ରାସ୍ତାରେ ଫ୍ୟାନ୍ସ ଅଭିନେତାଙ୍କୁ ସ୍ବାଗତ କରିଥିଲେ । ଅଭିନେତା ମଧ୍ୟ କାର ଅଟକାଇ ଫ୍ୟାନ୍ସଙ୍କୁ ଭେଟିଛନ୍ତି । ଯାହାର ଫଟୋ ଏବଂ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ଭାଇରାଲ ହେଉଥିବା ଭିଡିଓରେ, ଅଭିନେତା କାର ଅଟକାଇ ଫ୍ୟାନ୍ସଙ୍କୁ ହାତ ମିଶାଇଥିଲେ ।
ଅନେକ ଫ୍ୟାନ୍ସ ଏହି ଭିଡିଓକୁ ଲାଇକ୍ କରିବା ସହ ପ୍ରତିକ୍ରିୟା ଦେଇଛନ୍ତି । ଜଣେ ପ୍ରଶଂସକ ତାମିଲରେ ପ୍ରଶଂସା କରି ଲେଖିଛନ୍ତି, "ଯେଉଁଠାରେ ଅଭିନେତାମାନେ କିଛି ଚଳଚ୍ଚିତ୍ର ପରେ ନିଜ ପ୍ରଶଂସକଙ୍କୁ ଭୁଲିଯାଆନ୍ତି, ସେଠାରେ ରଜନୀକାନ୍ତ ତାଙ୍କ ପ୍ରଶଂସକଙ୍କ ସହ କାରକୁ ଅଟକାଇ ଅଭିବାଦନ ଜଣାଇଛନ୍ତି । ଏହି କାରଣରୁ ଆପଣ 45 ବର୍ଷ ପରେ ମଧ୍ୟ ଏକ ସୁପରଷ୍ଟାର !" ଅନେକ ଫ୍ୟାନ୍ସ ତାଙ୍କର ଏହି କାର୍ଯ୍ୟକୁ ନେଇ ପ୍ରଶଂସା କରିଛନ୍ତି ।
ଏହା ମଧ୍ୟ ପଢନ୍ତୁ: ରଜନୀକାନ୍ତଙ୍କ 171ତମ ଫିଲ୍ମର ଘୋଷଣା, ଲୋକେଶ କନଗରାଜଙ୍କ ସହ କରିବେ କାମ
ଲାଇକା ପ୍ରଡକ୍ସନ୍ସ ଦ୍ୱାରା ନିର୍ମିତ ଥାଲାଇୱର୍ 170, ମୁଖ୍ୟ ଭୂମିକାରେ ରଜନୀକାନ୍ତ, ବଲିଉଡ୍ କିମ୍ବଦନ୍ତୀ ଷ୍ଟାର୍ ଅମିତାଭ ବଚ୍ଚନ, ଫହାଦ୍ ଫାସିଲ ଏବଂ ରାଣା ଡଗଗୁବତୀ ନଜର ଆସିବେ । ଏହି ଚଳଚ୍ଚିତ୍ରର ଅନ୍ୟ କଳାକାରମାନଙ୍କ ମଧ୍ୟରେ ମଞ୍ଜୁ ୱାରିଅର୍, ଦୁଶାରା ଏବଂ ରିତିକା ସିଂ ଅଛନ୍ତି । ଏଥିସହ, ରଜନୀକାନ୍ତ ନିଜ ଝିଅ ଐଶ୍ୱର୍ଯ୍ୟାଙ୍କ ନିର୍ଦ୍ଦେଶିତ ଫିଲ୍ମ 'ଲାଲ ସଲାମ'ରେ ମଧ୍ୟ ନଜର ଆସିବେ । ଝିଅର ଫିଲ୍ମରେ ରଜନୀକାନ୍ତ ଏକ କ୍ୟାମିଓ ରୋଲରେ ନଜର ଆସିବେ । ଏହି ଫିଲ୍ମ ଚଳିତ ବର୍ଷ ଶେଷ ସୁଦ୍ଧା ରିଲିଜ କରିବ ବୋଲି କୁହାଯାଉଛି । ଲୋକେଶ କନାଗରାଜଙ୍କ ସହ ତାଙ୍କର ଆଉ ଏକ ଫିଲ୍ମ ଥଲାଇୱର୍ ୧୭୧ ମଧ୍ୟ ଆସୁଛି ।
