ଇସ୍ରାଏଲରୁ ସୁରକ୍ଷିତ ଭାବେ ଭାରତ ଫେରିଲେ ନୁସରତ ଭରୁଚା, ମୁମ୍ବାଇ ଏୟାରପୋର୍ଟରେ ଆସିଲେ ନଜର ମୁମ୍ବାଇ: ଭାରତ ପହଞ୍ଚିଲେ ବଲିଉଡ ଅଭିନେତ୍ରୀ ନୁସରତ ଭରୁଚା । ଦୀର୍ଘ ଦିନ ଧରି ଇସ୍ରାଏଲରେ ଅଟକି ରହିବା ପରେ 'ଡ୍ରିମ୍ ଗାର୍ଲ' ଅଭିନେତ୍ରୀ ଏବେ ନିଜ ଦେଶକୁ ଫେରିଛନ୍ତି । ଆଜି (8 ଅକ୍ଟୋବର) ଅଭିନେତ୍ରୀ ମୁମ୍ବାଇ ବିମାନବନ୍ଦରରେ ସୁରକ୍ଷିତ ଭାବେ ପହଞ୍ଚିଛନ୍ତି ।
ସେ ହାଇଫା ଆନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବରେ ଯୋଗ ନେବାକୁ ଇସ୍ରାଏଲ ଯାଇଥିଲେ । ତାଙ୍କ ଚଳଚ୍ଚିତ୍ର 'ଅକେଲି' ପାଇଁ ନୁସରତ ଏହି ଉତ୍ସବରେ ସାମିଲ ହେବାକୁ ଯାଇଥିଲେ । ଯେଉଁଠାରେ ପାଲେଷ୍ଟାଇନ ସହ ଇସ୍ରାଏଲର ଯୁଦ୍ଧ ମଧ୍ୟରେ ଅଟକି ଯାଇଥିଲେ । ବର୍ତ୍ତମାନ ଅଭିନେତ୍ରୀ ସୁରକ୍ଷିତ ଭାବେ ମୁମ୍ବାଇ ପହଞ୍ଚିଛନ୍ତି । ନୁସରତଙ୍କୁ ମୁମ୍ବାଇ ବିମାନବନ୍ଦରରେ ପିଙ୍କ ରଙ୍ଗର ଆଉଟଫିଟରେ ଦେଖିବାକୁ ମିଳିଛି । ଏହି ସମୟରେ ନୁସରତଙ୍କ ଭୟଭୀତ ଦେଖାଯାଉଥିବା ବେଳେ ଗଣମାଧ୍ୟମ ସହ କଥାବାର୍ତ୍ତା କରିନଥିଲେ । କିନ୍ତୁ ସେ କହିଥିଲେ ଯେ ମୁଁ ବର୍ତ୍ତମାନ ବହୁତ ବିବ୍ରତ, ମୋତେ ଘରେ ପହଞ୍ଚିବାକୁ ଦିଅ ।
ସୂଚନା ଥାଉ କି, ପାଲେଷ୍ଟାଇନର ହମାସ୍ ଆତଙ୍କବାଦୀ ଗୋଷ୍ଠୀ ଶନିବାର ସକାଳୁ ଇସ୍ରାଏଲ ଉପରେ ଅଚାନକ ଘନ ଘନ ରକେଟ ମାଡ଼ କରିଥିଲା । ଗାଜା ଷ୍ଟ୍ରିପ୍ରୁ ୫୦୦୦ରୁ ଅଧିକ ରକେଟ ବର୍ଷା କରିବା ପରେ ଦୁଇ ଦେଶ ମଧ୍ୟରେ ଯୁଦ୍ଧ ଘନାଇବାରେ ଲାଗିଛି । ଏହି ଆକ୍ରମଣରେ ଇସ୍ରାଏଲରେ ୩୦୦ରୁ ଅଧିକ ନାଗରିକଙ୍କ ମୃତ୍ୟୁ ହୋଇଥିବା ବେଳେ ହଜାର ହଜାର ଲୋକେ ଆହତ ହୋଇଛନ୍ତି । ଏହି ୨ ଦେଶର ଯୁଦ୍ଧ ମଧ୍ୟରେ ଅଭିନେତ୍ରୀ ଇସ୍ରାଏଲରେ ଫସିଯାଇଥିଲେ । ଅଭିନେତ୍ରୀଙ୍କ ଟିମଙ୍କ ଅନୁଯାୟୀ, ସେ ଅକ୍ଟୋବର 7ରେ ଆକ୍ରମଣ ପରେ ଅଭିନେତ୍ରୀଙ୍କ ସହ ଯୋଗାଯୋଗ ହରାଇଥିଲେ । ପୂର୍ବାହ୍ନ ସାଢେ ୧୨ରେ ଟିମ ନୁସରତଙ୍କ ସହ ଯୋଗାଯୋଗ କରିଥିଲା । ସେତେବେଳେ ସେ ବେସ୍ମେଣ୍ଟରେ ସୁରକ୍ଷିତ ଥିବା କଥା ଜଣାଇଥିଲେ । ହେଲେ ଏହା ପରଠୁ ତାଙ୍କ ସହ ଯୋଗାଯୋଗ ହରାଇଥିଲେ ।
ଏହା ମଧ୍ୟ ପଢନ୍ତୁ:ଇସ୍ରାଏଲରୁ ଫେରୁଛନ୍ତି ଅଭିନେତ୍ରୀ ନୁସରତ୍ ଭରୁଚା; ଯୋଗାଯୋଗ କଲା ଦୂତାବାସ
ୱାର୍କ ଫ୍ରଣ୍ଟ କଥା କହିବାକୁ ଗଲେ, ନୁସରତ ପ୍ୟାର୍ କା ପୁଞ୍ଚନାମା ସିରିଜ୍, ସୋନୁ କି ଟିଟୁ କି ସ୍ବିଟି ଏବଂ ଛୋରୀ, ଡ୍ରିମ ଗାର୍ଲ ଭଳି ଲୋକପ୍ରିୟ ଚଳଚ୍ଚିତ୍ରରେ ଅଭିନୟ କରି ଲୋକପ୍ରିୟତା ହାସଲ କରିଛନ୍ତି । ଏଥିସହ ନିକଟରେ ସେ ଅକେଲି ଫିଲ୍ମରେ ନଜର ଆସିଥିଲେ । ଅକେଲି ଏକ ଆଇଏସଆଇଏସ ଆତଙ୍କବାଦୀ ଏବଂ ପାକିସ୍ତାନ ସହ ଜଡିତ ଥିବା କାହାଣୀ ଉପରେ ନିର୍ମିତ ଫିଲ୍ମ ଅଟେ । ଏଥିରେ ନୁସରତ ମୁଖ୍ୟ ଭୂମିକାରେ ନଜର ଆସିଛନ୍ତି ।
