ହାଇଦ୍ରାବାଦ:ତେଲୁଗୁ ସିନେ ଜଗତ ପାଇଁ ଦୁଃଖଦ ଖବର । ଆଉ ନାହାନ୍ତି ବରିଷ୍ଠ ତେଲୁଗୁ ଅଭିନେତା ଚନ୍ଦ୍ର ମୋହନ । ୭୮ ବର୍ଷ ବୟସରେ ହୃତଘାତରେ ଆଜି ତାଙ୍କର ପରଲୋକ ଘଟିଛି । ହାଇଦ୍ରାବାଦର ଆପୋଲ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ସକାଳ ୯ଟା ୪୫ ମିନିଟରେ ସେ ଶେଷ ନିଶ୍ବାସ ତ୍ୟାଗ କରିଥିବା ସୂଚନା ରହିଛି । ତେଲୁଗୁ ସିନେ ଜଗତର ଜଣେ ଜଣାଶୁଣା ଅଭିନେତା ଥିଲେ ଚନ୍ଦ୍ର ମୋହନ । ତାଙ୍କର ବିୟୋଗରେ ସିନେ ଜଗତରେ ଶୋକର ଛାୟା ଖେଳିଯାଇଛି । ସୋମବାର ଦିନ ହାଇଦ୍ରାବାଦରେ ଅଭିନେତାଙ୍କ ଅନ୍ତିମ ସଂସ୍କାର ହେବା ନେଇ ପରିବାର ପକ୍ଷରୁ ସୂଚନା ଦିଆଯାଇଛି ।
ଅଭିନେତା ଚନ୍ଦ୍ର ମୋହନଙ୍କ ବିୟୋଗରେ ତେଲେଙ୍ଗାନା ମୁଖ୍ୟମନ୍ତ୍ରୀ କେସିଆର ଗଭୀର ଶୋକ ବ୍ୟକ୍ତ କରିଛନ୍ତି । ଆରଆରଆର ଚଳଚ୍ଚିତ୍ରର ଅଭିନେତା ଜୁନିଅର ଏନଟିଆରଙ୍କ ସମେତ ବହୁ ତେଲୁଗୁ ଅଭିନେତା ମଧ୍ୟ ଦୁଃଖ ପ୍ରକାଶ କରିଛନ୍ତି । ତେଲେଙ୍ଗାନା ମୁଖ୍ୟମନ୍ତ୍ରୀ ଏକ୍ସରେ ଟ୍ବିଟ କରି କହିଛନ୍ତି ଯେ, ଚନ୍ଦ୍ର ମୋହନଙ୍କ ପ୍ରେରଣାରେ ଅନେକ ଅଭିନେତା ଓ ଅଭିନେତ୍ରୀ ଉଚ୍ଚ ସ୍ତରରେ ପହଞ୍ଚିଛନ୍ତି । କଲାମଟଲୀଙ୍କ ପ୍ରିୟ ସନ୍ତାନ ଭାବରେ ଚନ୍ଦ୍ର ମୋହନ ବହୁ ତେଲୁଗୁ ଓ ତାମିଲ ଚଳଚ୍ଚିତ୍ରରେ ଅଭିନୟ କରି ଲକ୍ଷ ଲକ୍ଷ ଲୋକଙ୍କ ପ୍ରଶଂସା ଲାଭ କରିଥିଲେ । ସେହିପରି ଅଭିନେତା ଜୁନିଅର ଏନଟିଆର ଏକ୍ସରେ କହିଛନ୍ତି, "ଅନେକ ବର୍ଷ ଧରି ଚଳଚ୍ଚିତ୍ରରେ ବିଭିନ୍ନ ଭୂମିକାରେ ଅଭିନୟ କରି ନିଜ ପାଇଁ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ଚନ୍ଦ୍ର ମୋହନଙ୍କ ଅକାଳ ମୃତ୍ୟୁ ଖବର ଅତ୍ୟନ୍ତ ଦୁଃଖଦାୟକ । ତାଙ୍କ ପରିବାର ପ୍ରତି ମୋର ଗଭୀର ସମବେଦନା । ତାଙ୍କର ଅମର ଆତ୍ମାକୁ ଶାନ୍ତି ମିଳୁ ।"