ମୁମ୍ବାଇ: ବଲିଉଡ ଜଗତ ପାଇଁ ପୁଣି ଏକ ଦୁଃଖଦ ଖବର । ଆଉ ନାହାନ୍ତି ବଲିଉଡ ଫିଲ୍ମର ପ୍ରସିଦ୍ଧ ହାସ୍ୟ କଳାକାର ତଥା ବରିଷ୍ଠ ଅଭିନେତା ବିରବଲ ଖୋସଲା । ମଙ୍ଗଳବାର ବିଳମ୍ବିତ ରାତିରେ ଶେଷ ନିଶ୍ବାସ ତ୍ୟାଗ କରିଛନ୍ତି ବିରବଲ ଖୋସଲା । ତାଙ୍କୁ 84 ବର୍ଷ ବୟସ ହୋଇଥିଲା । ମୁମ୍ବାଇର ଚାର ବଙ୍ଗଳା ସ୍ଥିତ ନିଜ ବାସଭବନରେ ତାଙ୍କର ପରଲୋକ ହୋଇଛି । ହୃଦଘାତରେ ତାଙ୍କକ ଦେହାନ୍ତ ହୋଇଥିବା ପରିବାର ଲୋକ ଜଣାଇଛନ୍ତି । ଉଭୟ ଫିଲ୍ମ ଓ ଟେଲିଭିଜନ ଇଣ୍ଡଷ୍ଟ୍ରିରେ ଅଭିନୟର ଛାପ ଛାଡିଛନ୍ତି ବିରବଲ । ବିରବଲଙ୍କ ବିୟୋଗ ଖବର ଶୁଣି ବଲିଉଡ ଜଗତରେ ଶୋକର ଛାୟା ଖେଳିଯାଇଛି ।
ବିରବଲ ଖୋସଲାଙ୍କ ପ୍ରକୃତ ନାମ ସତିନ୍ଦର କୁମାର ଖୋସଲା । ତାଙ୍କୁ ସମସ୍ତେ ବିରବଲ ଭାବରେ ଜାଣନ୍ତି । 1938ରେ ପଞ୍ଜାବର ଗୁରୁଦାସପୁରରେ ଜନ୍ମଗ୍ରହଣ କରିଥିଲେ ବିରବଲ । ତାଙ୍କ ବାପାଙ୍କର ଏକ ପ୍ରିଣ୍ଟିଂ ପ୍ରେସ ରହିଥିଲା । ବଡ ହେଲେ ପୁଅ ବାପାଙ୍କ ବ୍ୟବସାୟ ସମ୍ଭାଳିବେ ବୋଲି ପରିବାର ଆଶା କରିଥିଲେ । ହେଲେ ବିରବଲ ଅଭିନୟରେ ନାଁ କରିବାକୁ ସ୍ବପ୍ନ ଦେଖିଥିଲେ । 1967ରେ ଫିଲ୍ମ ମନୋଜ କୁମାରଙ୍କ ଫିଲ୍ମ 'ଉପକାର'ରେ ଡେବ୍ୟୁ କରିଥିଲେ । ଏହାପରେ ଆଉ ପଛକୁ ଫେରିନଥିଲେ । ଗୋଟିଏ ପରେ ଗୋଟିଏ ଫିଲ୍ମରେ ଅଭିନୟ ଯାଦୁ ଦେଖାଇଥିଲେ ବିରବଲ । ହିନ୍ଦୀ, ପଞ୍ଜାବୀ, ଭୋଜପୁରୀ ଓ ମରାଠୀ ଭାଷାରେ ଏକାଧିକ ଫିଲ୍ମ କରିଛନ୍ତି ସେ । ହିନ୍ଦୀ ଚଳଚ୍ଚିତ୍ର ଉପକାର, ରୋଟି କପଡା ଅର ମକାନ, ଅମୀର ଗରିବ, ରାସ୍ତେ କା ପଥର, ସୁନ ମେରି ଲୈଲା, ଇନସାନ, ଏକ ମହଲ କା ସପନା ହୈ, କ୍ରାନ୍ତି, ନସିବ, ୟାରାନା, ହମ ହେ ରାହି ପ୍ୟାର କେ, ଅନଜାମ ଭଳି ଏକାଧିକ ଫିଲ୍ମରେ କାମ କରିଛନ୍ତି । ବିରବଲ ତାଙ୍କ କ୍ୟାରିୟରରେ 500ରୁ ଅଧିକ ଫିଲ୍ମରେ ଅଭିୟନ କରିଛନ୍ତି ।