ନୂଆଦିଲ୍ଲୀ: ଜାନୁଆରୀ ୧୨ରେ ରିଲିଜ ହୋଇଥିବା ସାଉଥ ଫିଲ୍ମ ହନୁମାନ ବକ୍ସ ଅଫିସରେ ଧମାକା କରୁଛି । ଏହି ଫିଲ୍ମକୁ ଦର୍ଶକ ବେଶ ପସନ୍ଦ କରୁଛନ୍ତି । କମ ବଜେଟରେ ହୋଇଥିଲେ ସୁଦ୍ଧା ଏହି ଫିଲ୍ମ ରିଲିଜର ୬ ଦିନ ମଧ୍ୟରେ ୮୦ କୋଟିରୁ ଅଧିକ ଆୟ କରିଛି । ତେବେ ଏହି ଫିଲ୍ମକୁ ନେଇ ସମସ୍ତେ ବେଶ ପ୍ରଶଂସା କରୁଥିବା ବେଳେ ବର୍ତ୍ତମାନ କେନ୍ଦ୍ରମନ୍ତ୍ରୀ ଜି କିଶନ ରେଡ୍ଡୀ ଏବଂ ଅନୁରାଗ ଠାକୁର ମଧ୍ୟ ଫିଲ୍ମ ଦେଖି ପ୍ରଭାବିତ ହୋଇଛନ୍ତି । ଏହି ସମୟରେ ଉଭୟ କେନ୍ଦ୍ରମନ୍ତ୍ରୀ ହନୁମାନ ଫେମ ତାରକା ତେଜାସଜ୍ଜାଙ୍କୁ ନୂଆଦିଲ୍ଲୀରେ ଭେଟି ଫିଲ୍ମର ପ୍ରଶଂସା କରିବା ସହ ଫିଲ୍ମର ସଫଳତା ପାଇଁ ତାଙ୍କୁ ଏବଂ ପୂରା ଟିମକୁ ଅଭିନନ୍ଦନ ଜଣାଇଛନ୍ତି । ସୋସିଆଲ ମିଡିଆରେ ଅଭିନେତାଙ୍କ ସହ କିଛି ଫଟୋ ସେୟାର କରି ଫିଲ୍ମର ପ୍ରଶଂସା କରିଛନ୍ତି କେନ୍ଦ୍ର ମନ୍ତ୍ରୀ ।
କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରୀ ଅନୁରାଗ ଠାକୁର ଏକ୍ସରେ ତେଜାସଜ୍ଜାଙ୍କ ସହ ଏକ ଫଟୋ ସେୟାର କରିଛନ୍ତି । ଯେଉଁଥିରେ ସେ ଅଭିନେତାଙ୍କୁ ଫୁଲତୋଡା ଦେଇ ସମ୍ବର୍ଦ୍ଧିତ କରୁଥିବା ଦେଖିବାକୁ ମିଳିଛି । ଏହାକୁ ସେୟାର କରି ସେ ଲେଖିଛନ୍ତି, ହନୁମାନ, ଆମର ସନାତନ ଧର୍ମକୁ ଦେଖାଇଛି । ଦମଦାର ସିନ ସହ ସିନେମାଟିକ ମାଷ୍ଟରପିସ ଅଟେ । ଫିଲ୍ମରେ ସିଜିଆଇ ଏବଂ VFX ବହୁତ ସୁନ୍ଦର ଅଟେ । ଫିଲ୍ମର ନିର୍ମାତାଙ୍କ ପରିଶ୍ରମ ଏଥିରେ ଦେଖାଯାଉଛି । ଏହି ଦମଦାର ଫିଲ୍ମ ପାଇଁ ନିର୍ମାତା ପ୍ରଶାନ୍ତ ବର୍ମା, ତେଜା ସଜ୍ଜା, ନିରାନ ରେଡ୍ଡି ଏବଂ ଫିଲ୍ମର ସଫଳତା ପାଇଁ ପୁରା ଟିମକୁ ଅଭିନନ୍ଦନ । କେନ୍ଦ୍ର ମନ୍ତ୍ରୀଙ୍କ ଏହି ପୋଷ୍ଟକୁ ରିପୋଷ୍ଟ କରି ଅଭିନେତା ମଧ୍ୟ ଧନ୍ୟବାଦ ଜଣାଇଛନ୍ତି । ସେ ଲେଖିଛନ୍ତି, ସାର୍, ଆପଣଙ୍କ ପ୍ରଶଂସା ପାଇଁ ଧନ୍ୟବାଦ । ଏହା ଆମ ପାଇଁ ବହୁତ କିଛି ।