ହାଇଦ୍ରାବାଦ: ବଲିଉଡ ଅଭିନେତା ସଲମାନ ଖାନ ଏବଂ ଅଭିନେତ୍ରୀ କ୍ୟାଟ୍ରିନା କୈଫଙ୍କ ଅଭିନୀତ ବହୁ ପ୍ରତୀକ୍ଷିତ ଚଳଚ୍ଚିତ୍ର 'ଟାଇଗର 3' ନଭେମ୍ବର ୧୨ରେ ରିଲିଜ ହେବ । ଯାହାକୁ ନେଇ ଫ୍ୟାନ୍ସ ଉତ୍ସାହର ସହ ଅପେକ୍ଷା କରିଥିବା ବେଳେ ବର୍ତ୍ତମାନ ଫିଲ୍ମର ଆଡଭାନ୍ସ ବୁକିଂ ଆରମ୍ଭ ହୋଇଛି । ଆଜି ଗୋଟିଏ ଦିନରେ ଆନୁମାନିକ 33,090 ଟିକେଟ୍ ବିକ୍ରି ହୋଇସାରିଲାଣି । ଯାହାର ଆୟ 1 କୋଟି ଟଙ୍କାରୁ ଅଧିକ ହୋଇଥିବା ଜଣାପଡିଛି । ଏହିପରି ଆୟ କଲେ ଫିଲ୍ମ ଆଗାମୀ ଦିନରେ ଜବାନ ସହ ଅନେକ ରେକର୍ଡ ସୃଷ୍ଟି କରିପାରେ ବୋଲି କୁହାଯାଉଛି ।
ଫିଲ୍ମ ରିଲିଜକୁ ଆଉ ମାତ୍ର ଏକ ସପ୍ତାହ ବାକି ରହିଛି । ଏହାରି ମଧ୍ୟରେ ବର୍ତ୍ତମାନ ଆଡଭାନ୍ସ ବୁକିଂ ଆରମ୍ଭ ହୋଇଥିବା ବେଳେ ଦର୍ଶକଙ୍କ ଭଲ ପ୍ରତିକ୍ରିୟା ମିଳିଛି । ଟ୍ରେଡ ଆନାଲିଷ୍ଟ ତରଣ ଆଦର୍ଶଙ୍କ ଅନୁଯାୟୀ, PVRInox ରେ 20,000 ଟିକେଟ୍ ବିକ୍ରି ହୋଇଥିବା ବେଳେ ସିନେପୋଲରେ 3,800 ବିକ୍ରି ହୋଇଛି । ତେବେ ପ୍ରଥମ ଦିନରେ ବିକ୍ରି ହୋଇଥିବା ମୋଟ ଟିକେଟ୍ 23,800 ବିକ୍ରି ହୋଇଛି । ବର୍ତ୍ତମାନ ଯଦି ଆମେ ଟାଇଗର 3କୁ ଶାହାରୁଖ ଖାନଙ୍କ ପଠାନ ଏବଂ ଜବାନ ସହ ତୁଳନା କରିବା । ତେବେ ଆଡଭାନ୍ସ ବୁକିଂ ଦୃଷ୍ଟିରୁ ପଠାନ 117 ହଜାର ଏବଂ ଜବାନ ବୁକ୍ ମାଇ ଶୋ’ରେ 254 ହଜାର ଟିକେଟ ବୁକ୍ କରିଥିଲା । ବର୍ତ୍ତମାନ ସଲମାନଙ୍କ ଫିଲ୍ମ ଶାହାରୁଖଙ୍କ ଫିଲ୍ମର ରେକର୍ଡ ଭାଙ୍ଗିପାରେ ବୋଲି ଅନୁମାନ କରାଯାଉଛି ।