ହାଇଦ୍ରାବାଦ:ଫିଲ୍ମ 'ଲିଓ' ପରେ ସାଉଥ୍ ସୁପରଷ୍ଟାର ଥାଲାପତି ବିଜୟ ଫିଲ୍ମ 'ଦ ଗ୍ରେଟେଷ୍ଟ ଅଫ୍ ଅଲ୍ ଟାଇମ'ରେ ନଜର ଆସିବାକୁ ଯାଉଛନ୍ତି । ନୂଆବର୍ଷରେ ଫ୍ୟାନ୍ସଙ୍କୁ ଭେଟି ଦେଇଛନ୍ତି ଅଭିନେତା । ତେବେ ନୂଆବର୍ଷରେ ସେଲିବ୍ରିଟି ନିଜ ନିଜ ଅନ୍ଦାଜରେ ଫ୍ୟାନ୍ସଙ୍କୁ ନୂଆବର୍ଷର ଶୁଭେଚ୍ଛା ଜଣାଇବା ସହିତ ସେଲିବ୍ରେଟ କରିଛନ୍ତି । ଏହାରି ମଧ୍ୟରେ ଗତ ବର୍ଷର ବ୍ଲକବଷ୍ଟର ଫିଲ୍ମ 'ଲିଓ'ର ସୁପରଷ୍ଟାର ଥାଲାପତି ବିଜୟ ତାଙ୍କର ଆଗାମୀ ଚଳଚ୍ଚିତ୍ର 'ଦ ଗ୍ରେଟେଷ୍ଟ ଅଫ୍ ଅଲ୍ ଟାଇମ୍' ପ୍ରଥମ ପୋଷ୍ଟର ଫ୍ୟାନ୍ସଙ୍କ ସହ ସେୟାର କରିଛନ୍ତି । ଯେଉଁଥିରେ ତାଙ୍କୁ ଏକ ଆକ୍ସନ୍ ଲୁକରେ ଦେଖିବାକୁ ମିଳିଛି ।
ସୂଚନା ମୁତାବକ, 'ଦ ଗ୍ରେଟେଷ୍ଟ ଅଫ୍ ଅଲ୍ ଟାଇମ୍' ଚଳିତ ବର୍ଷର ବହୁ ପ୍ରତୀକ୍ଷିତ ଫିଲ୍ମ ମଧ୍ୟରୁ ଅଟେ । ଡିସେମ୍ବର 31ରେ ଅଭିନେତା ଫିଲ୍ମର ପ୍ରଥମ ପୋଷ୍ଟର ସେୟାର କରିଥିଲେ । ଯେଉଁଥିରେ ସେ ଡବଲ୍ ରୋଲ କରିଥିବା ଜଣାପଡିଛି । ସେହିପରି ଥାଲାପତି ବିଜୟ ଗତକାଲି ଅର୍ଥାତ ଜାନୁଆରୀ 1ରେ ପ୍ରଶଂସକଙ୍କ ପାଇଁ ଫିଲ୍ମର ଦ୍ବିତୀୟ ପୋଷ୍ଟର ପ୍ରକାଶ କରିଛନ୍ତି । ନୂତନ ପୋଷ୍ଟରରେ ଥାଲାପତି ବିଜୟ ଏକାଠି ଦୁଇଟି ଚରିତ୍ରରେ ଅଭିନୟ କରୁଥିବା ନଜର ଆସିଛନ୍ତି | ପୋଷ୍ଟରରେ ସେ ବାଇକରେ ବସି ବନ୍ଧୁକରୁ ଗୁଳି ଚଳାଉଥିବାର ନଜର ଆସିଛନ୍ତି ।