ହାଇଦ୍ରାବାଦ:ଆଜି ପଞ୍ଚଭୂତରେ ଲୀନ ହେଲେ ବଲିଉଡର ଖ୍ୟାତନାମା ଗାୟକ କେକେ । ମୁମ୍ବାଇ ଭରଶୋଭା ମୁକ୍ତିଧାମ ଶ୍ମଶାନରେ ସଂପନ୍ନ ହେଲା ଶେଷକୃତ୍ୟ । ଛଳଛଳ ଆଖିରେ ବିଦାୟ ଦେଲେ ବନ୍ଧୁ, ସିନେପ୍ରେମୀ, ପ୍ରଶଂସକ ଓ ପରିବାରବର୍ଗ। ଶେଷ ବିଦାୟ ନେଇ ପ୍ରସିଦ୍ଧ ଗାୟକ କେ.କେ ଓରଫ୍ କୃଷ୍ଣ କୁମାର କୁନ୍ନଥ ପରପାରିକୁ ଚାଲିଯାଇଥିବା ବେଳେ ଫିଲ୍ମ ଜଗତରେ ଏକ ଅପୂରଣୀୟ ଶୂନ୍ୟସ୍ଥାନ ସୃଷ୍ଟି କରିଯାଇଛନ୍ତି। 'ରହେଁ କଲ୍ ୟାଦ୍ ଆଏଁଗେ ୟେ ପଲ୍' ଗୀତ ଗାଇ ପ୍ରଶଂସକଙ୍କ ହୃଦୟରେ ଅମର ହୋଇଯାଇଥିବା ଗାୟକ କେ.କେ ଙ୍କର ଆଜି ମୁମ୍ବାଇରେ ଅନ୍ତିମ ସଂସ୍କାର କରାଯାଇଛି ।
ମୁମ୍ବାଇର ଭରଶୋଭା ଶ୍ମଶାନରେ ଗାୟକଙ୍କୁ ପୂର୍ଣ୍ଣ ରାଜକୀୟ ସମ୍ମାନର ସହିତ ମୁଖାଗ୍ନି ଦିଆଯାଇଛି । ଏହି ସମୟରେ, ପ୍ରସିଦ୍ଧ ଗାୟକଙ୍କ ହଜାର ହଜାର ପ୍ରଶଂସକ ଏବଂ ଚଳଚ୍ଚିତ୍ର ଇଣ୍ଡଷ୍ଟ୍ରିର ଭେଟେରାନ୍ ଅଭିନେତାଙ୍କ ଆଖି ଛଳଛଳ ହୋଇଯାଇଥିଲା । ବୁଧବାର ରାତିରେ ତାଙ୍କ ପାର୍ଥିବ ଶରୀର କୋଲକାତାରୁ ମୁମ୍ବାଇ ଅଣାଯାଇଥିଲା । କେକେଙ୍କ ପରିବାର ଲୋକେ ତାଙ୍କର ପାର୍ଥିବ ଶରୀର ଆଣିବା ପାଇଁ କୋଲକାତା ଯାଇଥିଲେ ।