ହାଇଦ୍ରାବାଦ:ଚଳିତ ବର୍ଷ ରିଲିଜ ହୋଇଥିବା ଶାହାରୁଖ ଖାନଙ୍କ ଚଳଚ୍ଚିତ୍ର ପଠାନ 1000କୋଟିରୁ ଅଧିକ ଆୟ କରି ଏକ ରେକର୍ଡ ସୃଷ୍ଟି କରିଥିଲା। ଏବଂ ଏହି ଚଳଚ୍ଚିତ୍ର ଏକ ବ୍ଲକବଷ୍ଟର ପ୍ରମାଣିତ ହୋଇଥିଲା । ବର୍ତ୍ତମାନ ଜବାନ ସହ ପୁଣି ଧମାକା କରିବାକୁ ଯାଉଛନ୍ତି ଶାହାରୁଖ । ଏପର୍ଯ୍ୟନ୍ତ ଟ୍ରେଲର ରିଲିଜ୍ ହୋଇନାହିଁ କିନ୍ତୁ ଫିଲ୍ମ ଖୁବ ରୋଜଗାର କରିବା ଆରମ୍ଭ କରିସାରିଲାଣି । ସେପ୍ଟେମ୍ବର 7ରେ ରିଲିଜ ହେବାକୁ ଥିବା ଫିଲ୍ମର ଆଡଭାନ୍ସ ବୁକିଂ ଆରମ୍ଭ ହୋଇସାରିଛି । ଯଦିଓ ବୁକିଂ କେବଳ ଆମେରିକା ଏବଂ ଦୁବାଇରେ ଆରମ୍ଭ ହୋଇଛି । ତେବେ ରିଲିଜ ପୂର୍ବରୁ ଯବାନ କିଛି ଦିନ ମଧ୍ୟରେ କୋଟି ମୂଲ୍ୟର ବ୍ୟବସାୟ କରିସାରିଲାଣି ।
ଶାହାରୁଖଙ୍କ ପ୍ରଶଂସକ ସାରା ବିଶ୍ବରେ ରହିଛନ୍ତି । ଏଣୁ ଅଭିନେତାଙ୍କ ଫିଲ୍ମର କ୍ରେଜ ସାରା ଦେଶରେ ଦେଖିବାକୁ ମିଳିଥାଏ । ବର୍ତ୍ତମାନ ଜବାନ ପୁଣି ବକ୍ସ ଅଫିସରେ ଜଲୱା ଦେଖାଇବାକୁ ପ୍ରସ୍ତୁତ ଅଛନ୍ତି ଶାହାରୁଖ । ଫିଲ୍ମର ଆଡଭାନ୍ସ ବୁକିଂ ଆରମ୍ଭ ହୋଇଥିବା ବେଳେ ବମ୍ପର କଲେକ୍ସନ ହୋଇଥିବା କୁହାଯାଉଛି । ଆମେରିକାରେ ଜବାନର ଅଗ୍ରୀମ ବୁକିଂ ରିପୋର୍ଟକୁ ବାଣିଜ୍ୟ ବିଶ୍ଳେଷକ ମନୋବାଲା ବିଜୟବାଲାନ ସେୟାର କରିଛନ୍ତି । ରିପୋର୍ଟ ଅନୁଯାୟୀ, ଅଗଷ୍ଟ 25 ତାରିଖ ସକାଳ ସୁଦ୍ଧା ଜବାନ ପାଇଁ 10,000ରୁ ଅଧିକ ଟିକେଟ ବିକ୍ରି ହୋଇଛି । ଏହାସହ ଫିଲ୍ମ 1.5 କୋଟିରୁ ଅଧିକ କଲେକ୍ସନ୍ କରିଥିବା ଜଣାପଡ଼ିଛି ।