ମୁମ୍ବାଇ:ବଲିଉଡର ବାଦଶାହା ଶାହରୁଖ ଖାନ (Shah Rukh Khan) ଚଳିତ ମାସ ଆରମ୍ଭରେ ତାଙ୍କ ଜନ୍ମଦିନ ପାଳନ କରିଥିଲେ । ତାଙ୍କ ଜନ୍ମଦିନ ଅବସରରେ ତାଙ୍କର ଆଗାମୀ ଚଳଚ୍ଚିତ୍ର 'ପଠାନ'ର ଟିଜର ଲଞ୍ଚ କରାଯାଇଥିଲା । ଦର୍ଶକଙ୍କ ଦ୍ବାରା ଟିଜରକୁ ଖୁବ୍ ପସନ୍ଦ କରାଯାଇଛି । ତେବେ ଏହି ସମୟରେ, ତାଙ୍କ ଖୁସି ଆହୁରି ଦ୍ବିଗୁଣିତ ହୋଇଯାଇଛି । ନିକଟରେ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ଶାହରୁଖ ଖାନଙ୍କୁ ଏକ ସମ୍ମାନରେ ସମ୍ମାନିତ କରିଛି । ସିନେମାରେ ତାଙ୍କର ଅବଦାନ ପାଇଁ ଏବଂ ଏକ ବିଶ୍ୱସ୍ତରୀୟ ଆଇକନ୍ ଭାବରେ ଏହି ପୁରସ୍କାର ପ୍ରଦାନ କରାଯାଇଛି ।
ୟୁଏଇର ଶାରଜାହ ସ୍ଥିତ ଏକ୍ସପୋ ସେଣ୍ଟରରେ ଶାରଜାହ ଆନ୍ତର୍ଜାତୀୟ ପୁସ୍ତକ ମେଳା 2022 (SIBF)ର 41 ତମ ସଂସ୍କରଣରେ ଯୋଗଦେବା ଅବସରରେ ଶାହରୁଖ ଖାନଙ୍କୁ ଗୋଟିଏ ଦିନ ପୂର୍ବରୁ ଗ୍ଲୋବାଲ ଆଇକନ୍ ଅଫ୍ ସିନେମା ଆଣ୍ଡ କଲ୍ଚର ନେରେଟିଭ୍ (Global Icon of Cinema and Cultural Narrative award) ସମ୍ମାନରେ ସମ୍ମାନିତ କରାଯାଇଥିଲା । ଏହି କାର୍ଯ୍ୟକ୍ରମରେ ତାଙ୍କର ବହୁ ସଂଖ୍ୟକ ପ୍ରଶଂସକ ଅଂଶଗ୍ରହଣ କରିଥିଲେ । କାର୍ଯ୍ୟକ୍ରମର ଭିଡିଓ ଏବଂ ଫଟୋ ବର୍ତ୍ତମାନ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
ଏକ ଫ୍ୟାନ୍ ପେଜ୍ ଏହାର ଏକ ଭିଡିଓ ସେୟାର କରିଛି । ଭିଡିଓରେ ଶାହାରୁଖ ଖାନ ବ୍ଲାକ୍ ଲୁ୍କ୍ରେ ନଜର ଆସିଥିଲେ । ଭିଡିଓରେ ଶାହାରୁଖ ବ୍ୟାଖ୍ୟା କରିଛନ୍ତି ଯେ 'ସାସ୍କୃତିକ ପରିଦୃଶ୍ୟରେ ଯୋଗଦାନ ଓ ଲିଖନ ଏବଂ ରଚନାତ୍ମକତା କ୍ଷେତ୍ରରେ ବିକାଶ'ରେ ଦେଇଥିବା ଯୋଗଦାନ ପାଇଁ ଏହି ପୁରସ୍କାର ମିଳିଛି ।