ହାଇଦ୍ରାବାଦ:ସଞ୍ଜୟ ଦତ୍ତଙ୍କ ଫିଲ୍ମ 'ମୁନ୍ନା ଭାଇ ଏମବିବିଏସ୍' ତାଙ୍କ କ୍ୟାରିୟରର ସ୍ମରଣୀୟ ଚଳଚ୍ଚିତ୍ର ମଧ୍ୟରୁ ଅନ୍ୟତମ । ରାଜକୁମାର ହିରାନୀଙ୍କ ନିର୍ଦ୍ଦେଶିତ ଏହି କମେଡି ଚଳଚ୍ଚିତ୍ରଟି ସଞ୍ଜୟ ଦତ୍ତ ଏବଂ ଅର୍ଶଦ ୱାର୍ସିଙ୍କ ଯୋଡି ବଲିଉଡର ଶ୍ରେଷ୍ଠ ଯୋଡି ହୋଇଥିଲା । ଦୁହେଁ ମୁନ୍ନା ଏବଂ ସର୍କିଟ ହୋଇ ଲୋକଙ୍କୁ ହସାଇ ବେଦମ କରିଥିଲେ । ତେବେ ଆଜି ମୁନ୍ନା ଭାଇ ଏମବିବିଏସକୁ ୨୦ ବର୍ଷ ପୂରିଛି । ଲୋକଙ୍କ ପାଇଁ ଆଜି ବି କିନ୍ତୁ ଏହି ଫିଲ୍ମ ଏଭରଗ୍ରୀନ ହୋଇ ରହିଛି । ଏହାରି ମଧ୍ୟରେ ଫିଲ୍ମର ଆଉ ଏକ ସିକ୍ବେଲକୁ ନେଇ ଉତ୍ସାହର ସହ ଅପେକ୍ଷା କରିଥିବା ବେଳେ ଫିଲ୍ମର ୨୦ ବର୍ଷ ପୂର୍ତ୍ତି ଅବସରରେ ସଞ୍ଜୟ ଦତ୍ତ ୩ୟ ଭାଗ ଆସିବା ନେଇ ହିଣ୍ଟ ଦେଇଛନ୍ତି ।
ମୁନ୍ନା ଭାଇ ଏମବିବିଏସର ୨୦ବର୍ଷ ଏବଂ ଦୁଇ ଦଶନ୍ଧି ସମାପ୍ତ ହେବା ପରେ, ସମସ୍ତଙ୍କ ପ୍ରିୟ ସଞ୍ଜୟ ଦତ୍ତ ଓରଫ ମୁନ୍ନା ଏକ୍ସରେ ଏକ ଭିଡିଓ ସେୟାର କରିଛନ୍ତି । ଏହି ଭିଡିଓରେ ସେ ଫିଲ୍ମର କିଛି କ୍ଲିପ୍ ସେୟାର କରିଛନ୍ତି ଯେଉଁଥିରେ ତାଙ୍କ ପିତା ସୁନୀଲ ଦତ୍ତଙ୍କ ଠାରୁ ଆରମ୍ଭ କରି ତାଙ୍କର ଶ୍ରେଷ୍ଠ ବନ୍ଧୁ ଅର୍ଶଦ ୱାର୍ସି ଏବଂ ଫିଲ୍ମର ମୁଖ୍ୟ ଅଭିନେତ୍ରୀ ଗ୍ରେସି ସିଂଙ୍କ ସମସ୍ତେ ନଜର ଆସିଛନ୍ତି । ଏହି ଭିଡିଓ ସେୟାର କରି ସେ ଲେଖିଛନ୍ତି, 'ହସ, ଭାବନା ଏବଂ ଅନେକ ଭଳପାଇବା ସହ ଫିଲ୍ମର ଦୁଇ ଦଶନ୍ଧି ପୁରା ହୋଇଛି । ମୁନ୍ନା ଭାଇ ଏମବିବିଏସର ୨୦ ବର୍ଷ ପୂର୍ତ୍ତି ହେବା ସେଲିବ୍ରେସନ, ଯାହା କେବେ ଭୁଲି ହେବନି । ଏହି ଫିଲ୍ମ ପାଇଁ ଏତେ ପରିମାଣର ଭଲପାଇବା ଏବଂ ସମର୍ଥନ ପାଇଁ ମୁଁ କୃତଜ୍ଞ । ଆଶା କରୁଛି ମୁନ୍ନା ଭାଇ ୩ ଶୀଘ୍ର ଆସିବ।'