ମୁମ୍ବାଇ: IIFA ପୁରସ୍କାର 2023 ଆବୁଧାବିରେ ଅନୁଷ୍ଠିତ ହେବାକୁ ଯାଉଛି। ଏଠାରେ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା। ଯେଉଁଥିରେ ବଲିଉଡ ଭାଇଜାନ ସଲମାନ ଖାନ, ଅଭିନେତା ଅଭିଷେକ ବଚ୍ଚନ, ବିକି କୌଶଲ, ଅଭିନେତ୍ରୀ ନୋରା ଫତେହି ଏବଂ ରକୁଲ ପ୍ରୀତ ସିଂଙ୍କ ସହ ବଲିଉଡର ଅନେକ ତାରକା ଉପସ୍ଥିତ ସାମିଲ ହୋଇଛନ୍ତି। ତେବେ ଏହି ସମୟର ଏକ ଭିଡିଓ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି। ସଲମାନ ଖାନଙ୍କ ପୂର୍ବତନ ଗର୍ଲଫ୍ରେଣ୍ଡ କ୍ୟାଟ୍ରିନା କୈଫଙ୍କ ତାରକା ସ୍ୱାମୀ ବିକି କୌଶଲ ତାଙ୍କ ପ୍ରଶଂସକଙ୍କ ସହ ସେଲଫି ନେବା ବେଳେ ସଲମାନ ଆସୁଥିବା ନେଇ ତାଙ୍କ ବଡିଗାର୍ଡ ବିକିଙ୍କୁ ସାଇଡ କରି ଦେଇଥିଲେ । ଯାହାକୁ ନେଇ ଏବେ ଫ୍ୟାନ୍ସ ବିଭିନ୍ନ ପ୍ରତିକ୍ରିୟା ଦେଇଛନ୍ତି ।
ଭାଇରାଲ ହେଉଥିବା ଏହି ଭିଡିଓରେ ଦେଖିବାକୁ ମିଳିଛି ଯେ, ସଲମାନ ଖାନ ଏକ ମେରୁନ ରଙ୍ଗର ସାର୍ଟ ସହ ବ୍ଲାକ୍ ପ୍ୟାଣ୍ଟରେ ନଜର ଆସିଛନ୍ତି । ଏହି ସମୟରେ ବିକି କୌଶଲଙ୍କୁ ମେହେନ୍ଦୀ ରଙ୍ଗର ସୁଟରେ ଦେଖିବାକୁ ମିଳୁଛି । ବିକି କୌଶଲ ପ୍ରଶଂସକଙ୍କ ସହ ସେଲ୍ଫି ନେବା ସମୟରେ ସଲମାନ ଖାନ୍ ଆଗରୁ ଆସୁଛନ୍ତି । ସଲମାନ ଖାନ ନିଜ ସୁରକ୍ଷା ବଳୟରେ ରହିଥିଲେ ଏବଂ ପରେ ବିକି କୌଶଲ ପହଞ୍ଚିବା ମାତ୍ରେ ସେ ତାଙ୍କୁ ଭେଟିଥିଲେ । ବିକି ଓ ସଲମାନ କଥା ହେଉଥିବା ବେଳେ କିଛି ଫ୍ୟାନ ବିକିଙ୍କ ସହ ସେଲ୍ଫି ନେବାକୁ ଚାହିଁଥିଲେ । ଏହି ସମୟରେ ସଲମାନଙ୍କ ନିକଟରୁ ବିକିଙ୍କୁ ଦୁରେଇ ଦେଇଥିଲେ ବଡିଗାର୍ଡ ।