ହାଇଦ୍ରାବାଦ: ସଲମାନ ଖାନ ଏବଂ କ୍ୟାଟ୍ରିନା କୈଫଙ୍କ ବହୁ ପ୍ରତୀକ୍ଷିତ ଚଳଚ୍ଚିତ୍ର 'ଟାଇଗର' ୩' ରିଲିଜ ହୋଇଛି । ଫିଲ୍ମ ଘୋଷଣା ହେବା ଦିନ ଠାରୁ ପ୍ରେକ୍ଷାଳୟରେ ମୁକ୍ତିଲାଭ କରିବାକୁ ପ୍ରଶଂସକମାନେ ଅପେକ୍ଷା କରିଥିଲେ । ତେବେ ଆଜି ଅର୍ଥାତ ଦିୱାଲୀରେ ଫିଲ୍ମ ରିଲିଜ ହୋଇଥିବା ବେଳେ ଏହି ଚଳଚ୍ଚିତ୍ର ଦର୍ଶକଙ୍କ ଠାରୁ ଭଲ ପ୍ରତିକ୍ରିୟା ପାଉଛି । 'ଟାଇଗର ୩'ର ପ୍ରଥମ ଶୋ' ସକାଳ 6 ଟାରୁ ଆରମ୍ଭ ହୋଇଛି । ତେବେ ଥିଏଟରରେ ପ୍ରବଳ ଭିଡ ଜମିଥିବା ବେଳେ ଫିଲ୍ମ ରିଲିଜକୁ ନେଇ ଥିଏଟର ବାହାରେ ସେଲିବ୍ରେସନ କରିଛନ୍ତି ଫ୍ୟାନ୍ସ । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି ।
ୟଶ ରାଜ ସ୍ପାଏ ୟୁନିଭର୍ସର ଫିଲ୍ମ 'ଟାଇଗର ୩'ରେ ସଲମାନ ଏବଂ କ୍ୟାଟ୍ରିନାଙ୍କ ମଧ୍ୟରେ ଆକର୍ଷଣୀୟ ଆକ୍ସନ ସିନ ରହିଛି । ଦେଶ ତଥା ପରିବାରକୁ ବଞ୍ଚାଇବା ପାଇଁ ସଂଗ୍ରାମ କରୁଥିବା ଅବିନାଶ ସିଂ ରାଠୋର (ସଲମାନ ଖାନ) ଏବଂ ଜୋୟା (କ୍ୟାଟ୍ରିନା କୈଫ)ଙ୍କ ଆକ୍ସନ ସିନର ଲୋକେ ଭୂୟଶୀ ପ୍ରଶଂସା କରୁଛନ୍ତି । ଫିଲ୍ମଟି ସୋସିଆଲ ମିଡିଆ ଏକ୍ସରେ ଭଲ ପ୍ରତିକ୍ରିୟା ପାଉଛି । ଏଥିସହ ଥିଏଟର ବାହାରେ ସଲମାନଙ୍କ ଫ୍ୟାନ୍ସମାନେ ଫିଲ୍ମ ରିଲିଜକୁ ନେଇ ସେଲିବ୍ରେସନ କରିଥିବା ବେଳେ ଢୋଲ ବାଜାରେ ନାଚିଥିବା ଦେଖିବାକୁ ମିଳିଛି । କେବଳ ଏତିକି ନୁହେଁ ଫ୍ୟାନ୍ସମାନେ ଥିଏଟର ବାହାରେ 'ଭାଇଜାନ'ଙ୍କ ନାରା ଲଗାଉଥିବା ମଧ୍ୟ ଦେଖିବାକୁ ମିଳିଛି ।