ହାଇଦ୍ରାବାଦ: ବଡ ପରଦାରେ ପୁଣି ବଲିଉଡ ଅଭିନେତା ଟାଇଗର ଶ୍ରଫ ଏବଂ ଅଭିନେତ୍ରୀ କ୍ରିତି ସାନନ ଯୋଡିଙ୍କ ଲଭ କେମେଷ୍ଟ୍ରି ଦେଖିବାକୁ ମିଳିଛି । ଉଭୟ ଷ୍ଟାରର ଫିଲ୍ମ ଗଣପଥ ଆଜି ରିଲିଜ ହୋଇଛି । ଏହି ଅବସରରେ ଫିଲ୍ମର ସଫଳତାକୁ ନେଇ ରଜନୀକାନ୍ତଙ୍କ ଠାରୁ ଆରମ୍ଭ କରି ଏହି ତାରକା ପୁରା ଟିମକୁ ଶୁଭେଚ୍ଛା ଜଣାଇଛନ୍ତି । ସୋସିଆଲ ମିଡିଆରେ ସମସ୍ତ ଷ୍ଟାର ଟାଇଗର ଏବଂ ଟିମକୁ ଶୁଭକାମନା ଜଣାଇଛନ୍ତି ।
ରଜନୀକାନ୍ତ ଏକ୍ସରେ ଏକ ପୋଷ୍ଟ ସେୟାର କରି ଶୁଭେଚ୍ଛା ଜଣାଇ ଲେଖିଛନ୍ତି, ଟାଇଗର ଶ୍ରଫ ଏବଂ ଗଣପଥର ସମସ୍ତ କାଷ୍ଟ ଏବଂ କ୍ରୁଙ୍କୁ ମୋର ଶୁଭେଚ୍ଛା । ଆପଣଙ୍କ ପାଇଁ ବହୁତ ଶୁଭକାମନା, ଏବଂ ଚଳଚ୍ଚିତ୍ରର ଏକ ବଡ ସଫଳତା କାମନା କରୁଛି ।" ସେପଟେ ରଜନୀକାନ୍ତଙ୍କ ପୋଷ୍ଟ ପରେ ଟାଇଗର ଏକ୍ସରେ ସୁପରଷ୍ଟାରଙ୍କ ପୋଷ୍ଟକୁ ରିଟ୍ବିଟ କରି ଧନ୍ୟବାଦ ଜଣାଇଛନ୍ତି । "ସର୍ବୋଚ୍ଚ ସମ୍ମାନ ଏବଂ ବହୁତ ଭଲ ପାଇବା ସାର୍, ଆପଣଙ୍କର ଏହି ଶଦ୍ଦ ଆମ ପାଇଁ ସବୁକିଛି ଖାସ କରି ମୋ ପାଇଁ । ଆପଣଙ୍କୁ ବହୁତ ବହୁତ ଧନ୍ୟବାଦ ସାର୍ ।
ସେପଟେ ନିକଟରେ ଜେଲରରେ ରଜନୀକାନ୍ତଙ୍କ ସହ ସ୍କ୍ରିନ ସେୟାର କରିଥିବା ଟାଇଗରଙ୍କ ବାପା ତଥା ଅଭିନେତା ଜ୍ୟାକି ଶ୍ରଫ ମଧ୍ୟ ଗଣପଥଙ୍କୁ ସମର୍ଥନ ନେଇ ରଜନୀକାନ୍ତଙ୍କୁ ଧନ୍ୟବାଦ ଜଣାଇଛନ୍ତି । ଜ୍ୟାକି ତାଙ୍କ ପୋଷ୍ଟରେ ଲେଖିଛନ୍ତି, "ଥଲାଇଭା ରଜନୀ ସାର୍, ମୋ ପରିବାରକୁ ସମର୍ଥନ କରିଥିବାରୁ ଧନ୍ୟବାଦ । ତୁମକୁ ଏବଂ ତୁମ ପରିବାରକୁ ମୋର ଭଲପାଇବା ଏବଂ ସମ୍ମାନ, ମୋର ଭାଇ ।"