ମୁମ୍ବାଇ: 1960 ଏବଂ 70 ଦଶକର ଲୋକପ୍ରିୟ ବଲିଉଡ ଚଳଚ୍ଚିତ୍ରରେ 'ମାତା' ଭୂମିକାରେ ଅଭିନୟ କରିଥିବା ଅଭିନେତ୍ରୀ ସୁଲୋଚନା ଲତକରଙ୍କ ରବିବାର ଦେହାନ୍ତ ହୋଇଛି । ସୂଚନା ଅନୁଯାୟୀ, ସେ କିଛି ଦିନ ଅସୁସ୍ଥ ଥିଲେ । ତାଙ୍କର ନିଶ୍ବାସ ପ୍ରଶ୍ବାସରେ ଅସୁବିଧା ଏବଂ ଅନ୍ୟାନ୍ୟ ଶାରୀରିକ ସମସ୍ୟା ଥିବାରୁ ତାଙ୍କୁ ଦାଦର ସୁଶ୍ରୁଶା ଡାକ୍ତରଖାନାରେ ଭର୍ତ୍ତି କରାଯାଇଥିଲା । ତେବେ ଚିକିତ୍ସାଧୀନ ଅବସ୍ଥାରେ ସେ ଶେଷ ନିଃଶ୍ବାସ ତ୍ୟାଗ କରିଛନ୍ତି । ମୃତ୍ୟୁବେଳକୁ ତାଙ୍କୁ 94 ବର୍ଷ ହୋଇଥିଲା । ଅଭିନେତ୍ରୀଙ୍କ ପୁତୁରା ତାଙ୍କୁ ଦେହାନ୍ତ ନେଇ ସୂଚନା ଦେଇଥିଲେ । ତେବେ ତାଙ୍କ ବିୟୋଗରେ ପୁରା ଇଣ୍ଡଷ୍ଟ୍ରିରେ ଶୋକର ଛାୟା ଖେଳିଯାଇଛି । ସେପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମେତ ବଲିଉଡ ସେଲିବ୍ରିଟିମାନେ ତାଙ୍କ ଦେହାନ୍ତରେ ଶୋକ ପ୍ରକାଶ କରିବା ସହ ସମବେଦନା ଜଣାଇଛନ୍ତି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭେଟେରାନ ଅଭିନେତ୍ରୀ ସୁଲୋଚନା ଲତକରଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି । କହିଛନ୍ତି, ସୁଲୋଚନା ଲତକରଙ୍କ ମୃତ୍ୟୁ ଭାରତୀୟ ସିନେମା ଜଗତରେ ଏକ ବଡ଼ ଶୂନ୍ୟସ୍ଥାନ ସୃଷ୍ଟି କରିଛି । ତାଙ୍କର ଅବିସ୍ମରଣୀୟ ଅଭିନୟ ଆଜି ବି ଲୋକଙ୍କ ମନରେ ପ୍ରିୟ ହୋଇ ରହିଛି । ତାଙ୍କ କଳା ମାଧ୍ୟମରେ ତାଙ୍କ ସିନେମାଗୁଡିକ ସବୁବେଳେ ବଞ୍ଚି ରହିବ। ତାଙ୍କ ପରିବାର ପ୍ରତି ସମବେଦନା ଜଣାଉଛି । ଓମ୍ ଶାନ୍ତି ।"
ଏଥିସହିତ ବଲିଉଡ ଅଭିନେତ୍ରୀ ମାଧୁରୀ ଦୀକ୍ଷିତ ମଧ୍ୟ ସୁଲୋଚନା ଲତକରଙ୍କ ବିୟୋଗରେ ଶୋକ ପ୍ରକାଶ କରିଛନ୍ତି । ଲେଖିଛନ୍ତି, "ସୁଲୋଚାନା ତାଇ ଚଳଚ୍ଚିତ୍ର ଜଗତର ସବୁଠାରୁ ସୁନ୍ଦର ଅଭିନେତ୍ରୀ ଥିଲେ । ତାଙ୍କ ଦ୍ୱାରା ଅଭିନୀତ ପ୍ରତ୍ୟେକ ଚରିତ୍ର ସ୍ମରଣୀୟ ହେବ । ଆମ ମଧ୍ୟରେ ହୋଇଥିବା ସମସ୍ତ କଥା ମୋର ମନେ ରହିବ । ଆପଣ ଯେଉଁଠାରେ ଥାଆନ୍ତୁ ଶାନ୍ତିରେ ରୁହନ୍ତୁ ।