ମୁମ୍ବାଇ:ଆସନ୍ତାକାଲି ରିଲିଜ ହେବ ଶାହରୁଖ ଖାନଙ୍କ ଅଭିନୀତ ପଠାନ ଫିଲ୍ମ । ଏହି ଫିଲ୍ମକୁ ନେଇ ବିବାଦ ଥମୁନଥିବା ବେଳେ କିଙ୍ଗ ଖାନଙ୍କ କମ୍ବ୍ୟାକ ଦେଖିବାକୁ ପ୍ରଶଂସକ ଓ ଦର୍ଶକଙ୍କ ମଧ୍ୟରେ ପ୍ରବଳ ଉତ୍ସାହ ଦେଖାଯାଇଛି । ପଠାନ ଫିଲ୍ମର ଅଗ୍ରୀମ ଟିକେଟ୍ ବୁକିଂ ସବୁ ରେକର୍ଡ ଭାଙ୍ଗିଛି । ଗତକାଲି ସୁଦ୍ଧା ଏହି ଫିଲ୍ମର ଅଗ୍ରୀମ ବୁକିଂ ୨୦ କୋଟି ଟଙ୍କା ପାର୍ କରିଛି । ତେବେ ପଠାନ କେବଳ ହିନ୍ଦୀ ଭାଷାଭାଷୀ ଅଞ୍ଚଳରେ ନୁହେଁ ଦକ୍ଷିଣ ଭାରତରେ ମଧ୍ୟ ଏକ ବ୍ଲକବଷ୍ଟର ଯାଉଛି । କାରଣ ଏହାର ଅଗ୍ରୀମ ବୁକିଂ କ୍ଷେତ୍ରରେ ଦକ୍ଷିଣ ଭାରତର ଏକ ବଡ ଯୋଗଦାନ ରହିଛି ।
ଦୀର୍ଘ ୪ ବର୍ଷ ପରେ ବଲିଉଡର କିଙ୍ଗ ଖାନ ଶାହରୁଖ ପଠାନ ଫିଲ୍ମ ଜରିଆରେ ବଡ ପରଦାରେ କମ୍ବ୍ୟାକ କରିଛନ୍ତି । ୟସ୍ରାଜ ପ୍ରଡକ୍ସନ ଦ୍ବାରା ନିର୍ମିତ ଏହି ଫିଲ୍ମରେ ଦୀପିକା ପାଦୁକୋନଙ୍କ ସହିତ ଜନ ଆବ୍ରାହିମ୍ ଅଭିନୟ କରିଛନ୍ତି । ତେବେ ପଠାନର ଟିଜର ଓ ବେଶରମ୍ ରଙ୍ଗ ଗୀତ ରିଲିଜ ପରେ ଦେଶବ୍ୟାପୀ ବିବାଦ ମୁଣ୍ଡ ଟେକିଥିଲା । ବିଭିନ୍ନ ସ୍ଥାନରେ ଫିଲ୍ମ ବ୍ୟାନ କରିବାକୁ ଦାବି ହୋଇଥିଲା । ହେଲେ ବିବାଦ ସତ୍ତ୍ବେ ମଧ୍ୟ ପଠାନର ଅଗ୍ରୀମ ବୁକିଂ ସମସ୍ତଙ୍କୁ ଚମକାଇ ଦେଇଛି । ଅନଲାଇନ ଟିକେଟ୍ ପ୍ଲାଟଫର୍ମରେ ଟିକେଟ ବିକ୍ରି ବୃଦ୍ଧି ପାଇବାରେ ଲାଗିଛି ।