ମୁମ୍ବାଇ: ରିଲିଜ ହେବା ପରେ ହଲରେ ଧମାଲ ମଚାଉଛି ଶାହାରୁଖ ଖାନଙ୍କ ଅଭିନିତ ଫିଲ୍ମ ପଠାନ। ରିଲିଜର ପ୍ରଥମ ଦିନରୁ ଦର୍ଶକ ଫିଲ୍ମଟିକୁ ବେଶ ପ୍ରଶଂସା କରୁଛନ୍ତି । ଗତ ବୁଧବାର କିଙ୍ଗ ଖାନଙ୍କ ପଠାନ ଫିଲ୍ମ ରିଲିଜ ହୋଇଥିବା ବେଳେ ତିନି ଦିନରେ ୩ଶହ କୋଟି ଟଙ୍କା ଆୟ କରି ବକ୍ସ ଅଫିସରେ ରେକର୍ଡ କରିଛି । ଅନେକ ବର୍ଷର ବ୍ୟବଧାନ ପରେ ଶାହରୁଖ ବଡ ପରଦାରେ ନଜର ଆସିଥିବାରୁ ଫିଲ୍ମଟି ଦର୍ଶକଙ୍କୁ ବେଶ ପସନ୍ଦ ଆସୁଛି । ଏନେଇ ଫିଲ୍ମ ବାଣିଜ୍ୟ ବିଶ୍ଳେଷକ ରମେଶ ବାଲା ଟ୍ବିଟ କରି କହିଛନ୍ତି ଯେ , "ଫିଲ୍ମ ପଠାନ ଓ୍ବାଲ୍ଡ ଓ୍ବାଇଡ ବକ୍ସ ଅଫିସରେ ୩୦୦ କୋଟି ଟଙ୍କା ଅତିକ୍ରମ କରିଛି ।"
ଫିଲ୍ମ ପଠାନ ରିଲିଜର ପ୍ରଥମ ଦିନରେ ୧୦୦କୋଟି ଆୟ କରିଥିବା ବେଳେ ଦ୍ବତୀୟ ଦିନରେ ୨୩୫ କୋଟି ଆୟ କରିଥିବା କୁହାଯାଉଥିଲା । ଯାହା ତୃତୀୟ ଦିନରେ ଓ୍ବାଲ୍ଡ ଓ୍ବାଇଡ ୩ଶହ କୋଟି ଅତିକ୍ରମ କରିଛି । ଫିଲ୍ମଟି ରିଲିଜ ହେବା ପୂର୍ବୁର ବେସରମ ଗୀତକୁ ନେଇ ବିବାଦକୁ ଆସିଥିଲା । ବିବାଦ ପରେ ବି ଦର୍ଶକମାନେ ଫିଲ୍ମଟିକୁ ବେଶ ପସନ୍ଦ କରୁଛନ୍ତି ।
ଦୀର୍ଘ ୪ ବର୍ଷ ପରେ ବଲିଉଡର କିଙ୍ଗ୍ ଖାନ ଶାହରୁଖ ପଠାନ ଫିଲ୍ମ ଜରିଆରେ ବଡ ପରଦାରେ କମ୍ବ୍ୟାକ କରିଛନ୍ତି । ୟସ୍ରାଜ ପ୍ରଡକ୍ସନ ଦ୍ବାରା ନିର୍ମିତ ଏହି ଫିଲ୍ମରେ ଦୀପିକା ପାଦୁକୋନଙ୍କ ସହିତ ଜନ ଆବ୍ରାହିମ୍ ଅଭିନୟ କରିଛନ୍ତି । ତେବେ ପଠାନର ଟିଜର ଓ ବେଶରମ୍ ରଙ୍ଗ ଗୀତ ରିଲିଜ ପରେ ଦେଶବ୍ୟାପୀ ବିବାଦ ମୁଣ୍ଡ ଟେକିଥିଲା । ବିଭିନ୍ନ ସ୍ଥାନରେ ଫିଲ୍ମ ବ୍ୟାନ କରିବାକୁ ଦାବି ହୋଇଥିଲା । କିନ୍ତୁ ରିଲିଜ ପରେ ବକ୍ସ ଅଫିସରେ ରେକର୍ଡ ପରେ ରେକର୍ଡ ହାସଲ କରିଚାଲିଛି ପଠାନ । ୨୫୦ କୋଟି ଟଙ୍କା ବଜେଟରେ 'ପଠାନ' ପ୍ରସ୍ତୁତ କରାଯାଇଛି ଏବଂ ଫିଲ୍ମଟି ବକ୍ସ ଅଫିସରେ ଭଲ କାମ କରିବ ବୋଲି ଆଶା କରାଯାଉଥିବା ବେଳେ ତାହା ସତ ପ୍ରତିପାଦିତ ହୋଇଛି ।
ଯେତେବେଳେ ଏହି ଫିଲ୍ମର ପ୍ରଥମ ଗୀତ ବେସରମ ରିଲିଜ ହୋଇଥିଲା ସେତେବେଳେ ବିବାଦ ଆରମ୍ଭ ହୋଇଥିଲା । ଏହାପରେ ଏକ ଗୀତ ‘ଝୁମେ ଜୋ ପଠାନ’ ମୁକ୍ତିଲାଭ କରିଥିଲା । ବିବାଦ ଭିତରେ ବି ପ୍ରଶଂସକମାନେ ଏହି ଗୀତକୁ ଖୁବ୍ ପସନ୍ଦ କରିଥିଲେ । ଏହାପରେ ଫିଲ୍ମର ଟ୍ରେଲର ରିଲିଜ ପରେ ଗତ ୨୫ ତାରିଖରେ ଫିଲ୍ମ ରିଲିଜ ହୋଇଥିଲା ।
