ହାଇଦ୍ରାବାଦ: ସୁଶାନ୍ତ ସିଂ ରାଜପୁତ ଏବଂ ରିୟା ଚକ୍ରବର୍ତ୍ତୀ ଡ୍ରମ୍ସ ମାମଲାର ଯାଞ୍ଚ କରିଥିବା ମୁମ୍ବାଇର ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନସିବି) ର ଇଣ୍ଟେଲିଜେନ୍ସ ଅଧିକାରୀ ବିଶ୍ୱନାଥ ତିୱାରୀଙ୍କୁ ଚାକିରୀରୁ ବରଖାସ୍ତ କରାଯାଇଛି । ବିଶ୍ୱନାଥ ତିୱାରୀଙ୍କ ନାଁରେ ବିନା ଅନୁମତିରେ ବିଦେଶ ଯାତ୍ରା କରିବା ଏବଂ କଳା ଟଙ୍କା ଗ୍ରହଣ କରିଥିବା ଅଭିଯୋଗ ହୋଇଛି ।
ସୂଚନା ଥାଉକି, ସୁଶାନ୍ତଙ୍କ ମୃତ୍ୟୁ ପରେ ବିଶ୍ୱନାଥ ତିୱାରୀ ଏହି ମାମଲା ସହ ଜଡିତ ସେଲିବ୍ରିଟିଙ୍କ ଯାଞ୍ଚ କରୁଥିଲେ । ବର୍ତ୍ତମାନ ଏହି ମାମଲା ସାମ୍ନାକୁ ଆସିବା ପରେ ଭିଜିଲାନ୍ସ ଯାଞ୍ଚ କରାଯାଇଥିଲା ଏବଂ ତଥ୍ୟ ଆଧାରରେ ଦିଲ୍ଲୀ ଏନସିବି ମୁଖ୍ୟାଳୟରୁ ତିୱାରୀଙ୍କୁ ବରଖାସ୍ତ ପାଇଁ ନିର୍ଦ୍ଦେଶ ଜାରି କରାଯାଇଥିଲା ।
ଆର୍ଯ୍ୟନ୍ ଖାନ ଡ୍ରଗ୍ସ ମାମଲା
ଅନ୍ୟପକ୍ଷରେ ଗୁରୁବାର ଆର୍ଯ୍ୟନ୍ ଡ୍ରଗ୍ସ ମାମଲାରେ ଏକ ବଡ ଅପଡେଟ ସାମ୍ନାକୁ ଆସିଛି । ଆର୍ଯ୍ୟନ୍ ଖାନ୍ ମାମଲାରେ ଚାର୍ଜସିଟ୍ ଦାଖଲ କରିବାକୁ NCBକୁ 60 ଦିନ ସମୟ ମିଳିଛି । ଏନସିବି ମୁମ୍ବାଇ କୋର୍ଟରେ ଆବେଦନ କରି 90 ଦିନ ଆଉ ସମୟ ମାଗିଥିଲା । କିନ୍ତୁ କୋର୍ଟ 60 ଦିନ ସମୟ ଦେଇଛନ୍ତି ।
ଏପ୍ରିଲ୍ 2ରେ, ଆର୍ଯ୍ୟନ୍ ଖାନଙ୍କ ଡ୍ରଗ୍ସ ମାମଲାର 180 ଦିନ ଶେଷ ହୋଇଛି। ନିୟମ ଅନୁଯାୟୀ, 180 ଦିନ ମଧ୍ୟରେ ଚାର୍ଜସିଟ୍ ଦାଖଲ କରିବାକୁ ପଡିବ । କିନ୍ତୁ ଏନସିବି କୋର୍ଟରେ ଏକ ଆବେଦନ କରି କହିଛନ୍ତି ଯେ ତଦନ୍ତ ଏପର୍ଯ୍ୟନ୍ତ ଶେଷ ହୋଇନାହିଁ। ତେଣୁ 90 ଦିନ ଅଧିକ ସମୟ ଦିଆଯିବା ଉଚିତ୍ । ଶୁଣାଣି ପରେ ଏନସିବିକୁ କୋର୍ଟ 60 ଦିନ ସମୟ ଦେଇଛନ୍ତି। ବର୍ତ୍ତମାନ 60 ଦିନ ପରେ, NCB କୁ ଏହି ମାମଲାରେ ଏକ ଚାର୍ଜ ସିଟ୍ ଦାଖଲ କରିବାକୁ ପଡିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
