ଥିରୁଅନନ୍ତପୁରମ: ଏଣ୍ଟରଟେନମେଣ୍ଟ ଜଗତକୁ ପୁଣି ଝଟକା । ଗୋଟିଏ ପରେ ଗୋଟିଏ ତାରକାଙ୍କ ମୃତ୍ୟୁର ଖବର ପୁରା ଇଣ୍ଡଷ୍ଟ୍ରିକୁ ଚକିତ କରିଛି । କିଛି ସମୟ ପୂର୍ବରୁ ଅଭିନେତା ଗୁଫି ପୈନ୍ତାଲଙ୍କ ମୃତ୍ୟୁ ଖବର ଆସିଥିବା ବେଳେ ଏବେ ପୁଣି ମାଲାୟାଲମ ଇଣ୍ଡଷ୍ଟ୍ରିରୁ ଆଉ ଏକ ଦୁଃଖଦ ଖବର ଆସିଛି । ଏକ ସଡ଼କ ଦୁର୍ଘଟଣାରେ ଲୋକପ୍ରିୟ ମାଲାୟଲମ୍ ମିମିକ୍ରି କଳାକାର ତଥା ସିନେମା ଅଭିନେତା କୋଲାମ ସୁଧୀଙ୍କ ମୃତ୍ୟୁ ହୋଇଛି । ଏକ ଶୋ' ପରେ ସୁଧୀ ଅନ୍ୟ କଳାକାରଙ୍କ ସହ ଏକ କାରରେ ଘରକୁ ଫେରୁଥିବା ବେଳେ ଏକ ମାଲବୋଝେଇ ଗାଡି ସହ ତାଙ୍କ କାରର ଧକ୍କା ହୋଇଥିଲା । ଫଳରେ ହସ୍ପିଟାଲରେ ତାଙ୍କର ମୃତ୍ୟୁ ହୋଇଛି । ମୃତ୍ୟୁବେଳକୁ ତାଙ୍କୁ 39 ବର୍ଷ ବୟସ ହୋଇଥିଲା । ତାଙ୍କ ବିୟୋଗରେ କେରଳ ସିଏମ ପିନାରାଇ ବିଜୟ ସୁଧୀଙ୍କୁ ଶ୍ରଦ୍ଧାଞ୍ଜଳି ଜଣାଇବା ସହ ସମବେଦନା ଜଣାଇଥିବା ବେଳେ ଇଣ୍ଡଷ୍ଟ୍ରିର ତାରକାମାନେ ମଧ୍ୟ ତାଙ୍କ ବିୟୋଗରେ ଶୋକପ୍ରକାଶ କରିଛନ୍ତି ।
କାଇପମଙ୍ଗଲମ ପୋଲିସଙ୍କ ସୂଚନା ଅନୁସାରେ, ଏକ ଶୋ' ପରେ କୋଲାମ ସୁଧୀ କଳାକାର ବିନୁ ଆଡିମାଲି, ଉଲାସ ଏବଂ ମହେଶଙ୍କ ସହ ଏକ କାରରେ ଆସୁଥିଲେ । କାରଟି ଏକ ମାଲବୋଝେଇ ଗାଡି ସହ ତାଙ୍କ କାରର ଧକ୍କା ହୋଇଥିଲା । ଫଳରେ କାରରେ ଥିବା ସମସ୍ତ ବ୍ୟକ୍ତି ଆହତ ହୋଇଥିଲେ । ସେମାନଙ୍କୁ ତୁରନ୍ତ କୋଡୁଙ୍ଗଲୁର ଡାକ୍ତରଖାନା ମଧ୍ୟ ନିଆଯାଇଥିଲା । ଏହି ଦୁର୍ଘଟଣାରେ ସୁଧୀର ମୁଣ୍ଡରେ ଗଭୀର ଆଘାତ ଲାଗିଥିଲା । ଫଳରେ କୋଲାମ ସୁଧୀ ସେଠାରେ ଶେଷ ନିଃଶ୍ବାସ ତ୍ୟାଗ କରିଛନ୍ତି । ସେପଟେ ଅନ୍ୟ ଦୁଇଜଣ ଗୁରୁତର ଥିବାରୁ ସେମାନଙ୍କୁ କୋଚିର ଏକ ଘରୋଇ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି ।