ବେଙ୍ଗାଲୁରୁ: ନିଶା ଘାରିଥିଲା ଅଭିନେତ୍ରୀଙ୍କୁ, ତାହା ପୁଣି ଏମିତି ସେମିତି ନୁହେଁ । ଓଜନ କମାଇବା ପାଇଁ କରାଇଥିଲେ କସ୍ମେଟିକ୍ସ ସର୍ଜରୀ। ହେଲେ ଏହି ସର୍ଜରୀ ତାଙ୍କ ପାଇଁ କାଳ ସାଜିଲା । ପ୍ଲାଷ୍ଟିକ୍ ସର୍ଜରୀ ପାଇଁ ଚାଲିଗଲା କନ୍ନଡ ଅଭିନେତ୍ରୀ ଚେତନାଙ୍କ ପ୍ରାଣ। ଏପରି ଅଭାବନୀୟ ଘଟଣା ଘଟିଛି ବେଙ୍ଗାଲୁରୁର ଏକ ଘରୋଇ ହସ୍ପିଟାଲରେ । ଚେତନାଙ୍କ ବିୟୋଗ ପରେ କନ୍ନଡ ଫିଲ୍ମ ଇଣ୍ଡଷ୍ଟ୍ରିରେ ଶୋକର ଛାୟା ଖେଳି ଯାଇଛି।
ରିପୋର୍ଟ ଅନୁଯାୟୀ, ଅଭିନେତ୍ରୀ ଚେତନା ରାଜ (Chethana Raj) ନିଜ ମୋଟାପଣ କମାଇବା ପାଇଁ ଗତକାଲି ଫ୍ୟାଟ ଫ୍ରି ସର୍ଜରୀ କରାଇଥିଲେ । ହଠାତ ତାଙ୍କର ସ୍ୱାସ୍ଥ୍ୟାବସ୍ଥା ବିଗିଡ଼ିବାରେ ଲାଗିଲା । ଗୁରୁତର ଅବସ୍ଥାରେ ତାଙ୍କୁ ଡାକ୍ତରଖାନାକୁ ନେଇଥିଲେ ମଧ୍ୟ କିଛି ସମୟ ପରେ ତାଙ୍କର ମୃତ୍ୟୁ ହୋଇଥିଲା । ସର୍ଜରୀ ସମୟରେ ଫୁସଫୁସରେ ପାଣି ଜମିଯିବାରୁ ତାହା ତାଙ୍କ ପାଇଁ କାଳ ସାଜିଲା ବୋଲି କୁହାଯାଉଛି ।