ହାଇଦ୍ରାବାଦ:ବଲିଉଡ୍ କୁଇନ କଙ୍ଗନା ରଣାୱତ ସର୍ବଦା ନିଜ ବୟାନ ପାଇଁ ଚର୍ଚ୍ଚାରେ ରହିଥାଆନ୍ତି । ବେଳେବେଳେ ଅଭିନେତ୍ରୀଙ୍କୁ ନିଜ ବୟାନ ପାଇଁ ବିବାଦରେ ମଧ୍ୟ ଛନ୍ଦି ହେବାକୁ ପଡ଼େ । ବଲିଉଡ ସହ କଙ୍ଗନା ରାଜନୀତି ପ୍ରସଙ୍ଗରେ ମଧ୍ୟ ନିଜ ପ୍ରତିକ୍ରିୟା ଦେଇଥାଆନ୍ତି । ବର୍ତ୍ତମାନ ପ୍ରଧାନମନ୍ତ୍ରୀଙ୍କମୋଦିଙ୍କ ସହ ଜଡିତ ଏକ ପ୍ରସଙ୍ଗରେ କଙ୍ଗନା ରାଣାୱତ ପୁଣି ଥରେ ଟ୍ରୋଲର୍ସଙ୍କୁ କଡ଼ା ଜବାବ ଦେଇଛନ୍ତି ।
ମୋଦିଙ୍କ ସପକ୍ଷରେ ବାହାରି ଟ୍ରୋଲର୍ସଙ୍କୁ କଡା ଜବାବ ଦେଇଛନ୍ତି କଙ୍ଗନା ରାଣାୱତ । କଙ୍ଗନା ରାଣାୱତ୍ ଏକ୍ସରେ ଏକ ପୋଷ୍ଟ ସେୟାର କରି ଲେଖିଛନ୍ତି, "କି କଳିଯୁଗ ଆସିଲା । ଯିଏ ଆମିଷ ଖାଏ ନାହିଁ, କେବେ ଧୂମପାନ କରେ ନାହିଁ କିମ୍ବା ମଦ୍ୟପାନ କରେ ନାହିଁ । ଏଭଳି ଏକ ସୁନ୍ଦର ବ୍ୟକ୍ତିତ୍ୱ ୱାଇନ ଧରିଛନ୍ତି ବୋଲି କିପରି ଟ୍ରୋଲ୍ କରାଯାଉଛି । ମଦ୍ୟପାନ ମେଡିକାଲ୍, କ୍ଲିନିକାଲ୍ ଏବଂ ବୈଜ୍ଞାନିକ ଭାବରେ ମନୁଷ୍ୟଙ୍କ ପାଇଁ କ୍ଷତିକାରକ ବୋଲି ଦର୍ଶାଯାଇଛି । ଜୋ ବାଇଡେନ ତଳେ ବସି ଖାଇ ପାରିବେ । ତା’ହେଲେ ଆମ ପ୍ରଧାନମନ୍ତ୍ରୀଙ୍କୁ କାହିଁକି ଏପରି ବ୍ୟବହାର କରାଯାଉଛି ?"
ସୂଚନା ଥାଉ କି, ନିକଟରେ ମୋଦିଙ୍କ ଏକ ଭିଡିଓ ଭାଇରାଲ ହୋଇଛି । ଯେଉଁଥିରେ ସେ ତାଙ୍କ ହାତରେ ୱାଇନ୍ ଧରିଥିବାର ନଜର ଆସିଛନ୍ତି । ଏହାକୁ ନେଇ ପିଏମଙ୍କୁ ଖୁବ୍ ଟ୍ରୋଲ କରାଯାଇଛି । ଭିଡିଓରେ ମୋଦିଙ୍କ ସହ ଜୋ ବାଇଡେନ ମଧ୍ୟ ନଜର ଆସିଛନ୍ତି । ଉଭୟ କଥା ହେଉଥିବା ବେଳେ ମୋଦି ହସୁଥିବା ଦେଖିବାକୁ ମିଳିଛି । ଯାହାକୁ ନେଇ ଟ୍ରୋଲ୍ କରାଯାଉଛି । ବର୍ତ୍ତମାନ ଏନେଇ ପ୍ରତିକ୍ରିୟା ଦେଇଛନ୍ତି କଙ୍ଗନା । ସେପଟେ ନିକଟରେ ଦେଶର ରାଜଧାନୀ ଦିଲ୍ଲୀରେ ଆୟୋଜିତ ଜି-20 ସମ୍ମିଳନୀର ସଫଳତା ପାଇଁ ମୋଦିଙ୍କୁ ଛୁଟୁଛି ଶୁଭେଚ୍ଛାର ସୁଅ । ବିଶ୍ବର ତମାମ ବ୍ଯକ୍ତିବିଶେଷଙ୍କଠାରୁ ଆରମ୍ଭ କରି ସେଲିବ୍ରିଟି ମୋଦିଙ୍କୁ ପ୍ରଶଂସା କରିବା ସହ ଶୁଭେଚ୍ଛା ଜଣାଇଛନ୍ତି । କଙ୍ଗନା ବି ଏହି ସମ୍ମିଳନୀର ଭିଡିଓ ଏବଂ ମୋଦିଙ୍କ ଫଟୋ ସେୟାର ଅଭିନନ୍ଦନ ଜଣାଇଥିଲେ।
ଏହା ମଧ୍ୟ ପଢନ୍ତୁ:ଜବାନ ପାଇଁ ଘୁଞ୍ଚିବ କି 'ଚନ୍ଦ୍ରମୁଖୀ ୨'ର ରିଲିଜ୍ ଡେଟ୍ ?
କଙ୍ଗନା ରାଣାୱତଙ୍କ ଫିଲ୍ମ ୱାର୍କଫ୍ରଣ୍ଟ କଥା କହିବାକୁ ଗଲେ, ପି.ବାସୁ ନିର୍ଦ୍ଦେଶିତ ଫିଲ୍ମ ଚନ୍ଦ୍ରମୁଖୀ-2 ସହ କଙ୍ଗନା ରଣାୱତ ସାଉଥରେ ଡେବ୍ୟୁ କରିବାକୁ ଯାଉଛନ୍ତି । ସେ ପ୍ରଥମ ଥର ପାଇଁ ଏହି ଫିଲ୍ମରେ ରାଘବ ଲରେନ୍ସଙ୍କ ସହ ସ୍କ୍ରିନ୍ ସେୟାର କରିବେ । ଏହି ଚଳଚ୍ଚିତ୍ର ତାମିଲ, ହିନ୍ଦୀ, ତେଲୁଗୁ, ମାଲାୟାଲମ୍ ଏବଂ କନ୍ନଡ଼ରେ ମୁକ୍ତିଲାଭ କରିବ । ଏଥିସହ ସେ ଏମିରଜେନ୍ସି ଏବଂ ତେଜସରେ ମଧ୍ୟ ନଜର ଆସିବେ।
