ମୁମ୍ବାଇ: ବଲିଉଡ ଅଭିନେତ୍ରୀ କଙ୍ଗନା ରଣାଓ୍ବତ ଏବଂ ବଲିଉଡ ଗୀତିକାର ଜାଭେଦ ଅଖତକଙ୍କ ମଧ୍ୟରେ ବାରମ୍ବାର ବାଦବିବାଦ ହେଉଥିବା କଥା ସାମ୍ନାକୁ ଆସିଥିବା ବେଳେ ଏଥର ଗୀତିକାରଙ୍କୁ ପ୍ରଶଂସା କରିଛନ୍ତି ବଲିଉଡ କୁଇନ କଙ୍ଗନା । ଜୟ ହିନ୍ଦ ଜାଭେଦ ଅଖତର ସାହେବ ବୋଲି ଟ୍ବିଟ କରି ହୃଦୟରୁ ପ୍ରଶଂସା କରିଛନ୍ତି କରିଛନ୍ତି କଙ୍ଗନା ।
ସୂଚନାଅନୁସାରେ, ଜାଭେଦ ଅଖତର ଏକ କାର୍ଯ୍ୟକ୍ରମରେ ଯୋଗଦେବା ପାଇଁ ଲାହୋର ଯାଇଥିଲେ । ତେବେ ସେଠାରେ ପାକିସ୍ତାନ ବିରୋଧୀ ବୟାନ ଦେଇଥିଲେ । ଆତଙ୍କବାଦୀଙ୍କୁ ଆଶ୍ରୟ ଦେଇଥିବାରୁ ପାକିସ୍ତାନକୁ ସମାଲୋଚନା କରିଥିଲେ । ବର୍ତ୍ତମାନ ଜାଭେଦଙ୍କ ଏହି ଭିଡିଓ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି ।
ପାକିସ୍ତାନକୁ ଏହା କହିଥିଲେ ଜାଭେଦ ଅଖତର:ଫୈଜ ଉତ୍ସବରେ ଯୋଗଦେଇ ଜାଭେଦ ଅଖତର କହିଥିଲେ, ଭାରତରେ ନୁସରତଙ୍କ ଭଳି ପାକିସ୍ତାନ ଗାୟକଙ୍କ କନସର୍ଟ ହୋଇଥାଏ । କିନ୍ତୁ ପାକିସ୍ତାନ କେବେ ବି ଲତା ମଙ୍ଗେସକରଙ୍କ କନସର୍ଟ ଆୟୋଜନ କରିନାହିଁ । ଆମେ ସମସ୍ତେ ମୁମ୍ବାଇର ଅଧିବାସୀ । ୨୬/୧୧ ମୁମ୍ବାଇ ଆକ୍ରମଣ ବିଷୟରେ ସମସ୍ତେ ଜାଣନ୍ତି । ସେମାନେ ନରଓ୍ବେ କିମ୍ବା ଇଜିପ୍ଟରୁ ଆସିନଥିଲେ । ସେହି ଆତଙ୍କବାଦୀ ଏବେ ବି ପାକିସ୍ତାନରେ ଖୋଲା ବୁଲୁଛନ୍ତି । ତେଣୁ ଯଦି ଭାରତୀୟ ରାଗୁଛନ୍ତି ତେବେ ପାକିସ୍ତାନଙ୍କୁ ଖରାପ ଲାଗିବା କଥାନୁହେଁ ।