ମୁମ୍ବାଇ: ବିଭିନ୍ନ ପ୍ରସଙ୍ଗ ଉପରେ ସବୁବେଳେ ନିଜ ମତାମତ ଦେଇ ବିବାଦରେ ରହିଆସୁଛନ୍ତି ବଲିଉଡ କୁଇନ କଙ୍ଗନା ରାଣାୱତ । କେତେବେଳେ ବଲିଉଡରେ ଚାଲିଥିବା ରାଜନୀତି ତ ଆଉ କେତେବେଳେ ଅନ୍ୟ ପ୍ରସଙ୍ଗରେ ନିଜ ମତାମତ ଦେଇ ସୋସିଆଲ ମିଡିଆରେ ସେ ଅନେକ ପୋଷ୍ଟ ସେୟାର କରିଥାନ୍ତି । ନିକଟରେ ମନ୍ଦିର ଭିତରକୁ ସର୍ଟ୍ସ ପିନ୍ଧି ଯିବା ମହିଳାଙ୍କ ଉପରେ ବର୍ଷିଥିଲେ ଅଭିନେତ୍ରୀ । ଏଥି ମଧ୍ୟରେ ପୁଣି ଆଉ ଏକ ପୋଷ୍ଟ ସେୟାର କରିଛନ୍ତି ଅଭିନେତ୍ରୀ । ଯେଉଁଥିରେ ଆବର୍ଜନାରେ ପରିପୂର୍ଣ୍ଣ ଏକ ଅପରିଷ୍କାର ପରିବେଶରେ ମାଉଣ୍ଟ ଏଭରେଷ୍ଟ ବେସ କ୍ୟାମ୍ପ ଭରି ରହିଥିବା ଦେଖିବାକୁ ମିଳିଛି । ମାଉଣ୍ଟ ଏଭରେଷ୍ଟର ଏହି ବେସ କ୍ୟାମ୍ପ ଭିଡିଓ ସେୟାର କରି ଅଭିନେତ୍ରୀ ପ୍ରତିକ୍ରିୟା ଦେଇଛନ୍ତି । କହିଛନ୍ତି, ଏଭରେଷ୍ଟ ଟୁର୍ ବନ୍ଦ କରନ୍ତୁ, ମଣିଷଙ୍କ ଠାରୁ ଜଗତକୁ ରକ୍ଷା କର ।
ଟ୍ୱିଟରରେ କଙ୍ଗନା ମାଉଣ୍ଟ ଏଭରେଷ୍ଟ ବେସ କ୍ୟାମ୍ପର ଏକ କ୍ଷୁଦ୍ର ଭିଡିଓ ସେୟାର କରିଥିଲେ, ଯେଉଁଥିରେ ତମ୍ବୁ ବାହାରେ ବହୁ ଆବର୍ଜନା ରହିଥିଲା । ଭିଡିଓରେ ସେୟାର କରି ସେ ଲେଖିଛନ୍ତି, ଏଭରେଷ୍ଟ ଟୁର୍ ବନ୍ଦ କରନ୍ତୁ କିମ୍ବା ଏହାକୁ ଠିକ କରନ୍ତୁ । ଶିଖର ନିକଟରେ ଏଭଳି ଦୃଶ୍ୟ ଗ୍ରହଣୀୟ ନୁହେଁ । ଯେଉଁମାନେ ନିଜକୁ ଇଶ୍ବରଙ୍କ ପ୍ରିୟ ବୋଲି ଭାବୁଛି, ସେମାନେ ଏହାର ବାସ୍ତବତା ଯାଞ୍ଚ ଆବଶ୍ୟକ କରନ୍ତି । ଏହି ଦୃଶ୍ୟକୁ ଦେଖନ୍ତୁ ଏବଂ ଆପଣ ଜାଣିପାରିବେ ଯେ ମଣିଷ ବୋଧହୁଏ ଇଶ୍ବରଙ୍କ ଅତି ପ୍ରିୟ ଅଟେ, ସେମାନେ ସେମାନଙ୍କର ଦୁର୍ଗନ୍ଧଯୁକ୍ତ, ଦୁର୍ଗନ୍ଧମୟ, ଅପରିଷ୍କାର ପାଦଚିହ୍ନ ସବୁଆଡେ ଛାଡିଦିଅନ୍ତି । ସେ ଆହୁରି ମଧ୍ୟ କହିଛନ୍ତି ଯେ ଦୟାକରି ବିଶ୍ବକୁ ମାନବିକତା ଠାରୁ ରକ୍ଷା କରନ୍ତୁ ।