ହାଇଦ୍ରାବାଦ:ନିକଟରେ ରିଲିଜ ହୋଇଥିବା ଆଦିପୁରୁଷରେ ବଲିଉଡ ଅଭିନେତା ସୈଫ ଅଲି ଖାନଙ୍କୁ ଦେଖିବାକୁ ମିଳିଥିଲା । ବିବାଦୀୟ ସଂଳାପ ଏବଂ ଭିଏପଏକ୍ସ ପାଇଁ ଫିଲ୍ମ ସାମଲୋଚନା ହେବା ସହ ବିରୋଧର ସମ୍ମୁଖୀନ ହୋଇଥିଲା । ଫଳରେ ଏହି ଫିଲ୍ମ ବକ୍ସ ଅଫିସରେ ଫ୍ଲପ୍ ହୋଇଥିଲା । ଏହାରି ମଧ୍ୟରେ ବର୍ତ୍ତମାନ ସୈଫଙ୍କୁ ଆଗାମୀ ଫିଲ୍ମ 'ଦେବରା'ରେ ଦେଖିବାକୁ ମିଳିବ । ଏହି ଫିଲ୍ମ ସହ ସେ ସାଉଥରେ ଡେବ୍ୟୁ କରିବାକୁ ଯାଉଛନ୍ତି । ପ୍ରଥମ ଥର ପାଇଁ ସେ Jr. ଏନଟିଆରଙ୍କ ସ୍କ୍ରିନ ସେୟାର କରିବେ । ଗତକାଲି ସୈଫଙ୍କ ଜନ୍ମଦିନରେ Jr. ଏନଟିଆର ଫିଲ୍ମରୁ ସୈଫଙ୍କ ପ୍ରଥମ ଲୁକ ପୋଷ୍ଟର ରିଲିଜ କରି ତାଙ୍କୁ ଜନ୍ମଦିନ ଭେଟି ଦେଇଛନ୍ତି ।
ଗତକାଲି ସୈଫ ଅଲି ଖାନ ତାଙ୍କ 53ତମ ଜନ୍ମଦିନ ପାଳନ କରିଛନ୍ତି । ଏହି ଅବସରରେ Jr. ଏନଟିଆର ଫିଲ୍ମରୁ ସୈଫଙ୍କ ପ୍ରଥମ ଲୁକ ପୋଷ୍ଟର ରିଲିଜ କରିଛନ୍ତି । ଏହି ପୋଷ୍ଟରରେ ସୈଫଙ୍କୁ ଏକ ନୂଆ ଅବତାରରେ ଦେଖିବାକୁ ମିଳିବ । Jr. ଏନଟିଆର ଟ୍ବିଟର ଏବଂ ଇନଷ୍ଟାଗ୍ରାମ ଷ୍ଟୋରୀରେ ସୈପଙ୍କ ପ୍ରଥମ ପୋଷ୍ଟର ରିଲିଜ କରି ଲେଖିଛନ୍ତି, BHAIRA(ଭୈରା) ହାପି ବର୍ଥ ଡେ ସୈଫ ସାର୍ ! ଦେବରା । ଭୈରା ଲୁକରେ ସୈଫ ଅଲି ଖାନ ଦମଦାର ଦେଖାଯାଉଛନ୍ତି । ଏହି ପୋଷ୍ଟର ରିଲିଜ ହେବା ମାତ୍ରେ ଫ୍ୟାନ୍ସ ଏହାକୁ ଲାଇକ କରିବା ସହ ସୈଫଙ୍କୁ ଶୁଭେଚ୍ଛା ଜଣାଇଛନ୍ତି । ପ୍ରତିକ୍ରିୟାରେ ଫ୍ୟାନ୍ସ ଲାଲ ହାର୍ଟ ଏବଂ ଫାୟାର ଇମୋଜି ଦେବା ସହ ଏହି ଲୁକକୁ ଦେଖି ଫିଲ୍ମକୁ ନେଇ ବେଶ ଉତ୍ସାହିତ ଅଛନ୍ତି ।