ହାଇଦ୍ରାବାଦ: ଜାପାନ ପାଇଁ ନୂଆବର୍ଷ ୨୦୨୪ ଭୟଙ୍କର ରହିଛି । ବର୍ଷର ପ୍ରଥମ ଦିନରେ ଶକ୍ତିଶାଳୀ ଭୂକମ୍ପ ଝଟକା ଦେଶବାସୀଙ୍କୁ ସ୍ତବ୍ଧ କରିଦେଇଛି । ଜାପାନରେ ପ୍ରକୃତି ତାଣ୍ଡବ ରଚିଛି । ବର୍ଷ ଆରମ୍ଭରେ ଦେଶରେ ଭୂମିକମ୍ପ ହୋଇଛି । ଫଳରେ 8 ଜଣଙ୍କ ମୃତ୍ୟୁ ହୋଇଥିବା ବେଳେ ବର୍ତ୍ତମାନ ବ୍ୟାପକ କ୍ଷୟକ୍ଷତି ହୋଇଥିବା ସୂଚନା ମିଳିଛି । ଏହାରି ମଧ୍ୟରେ ବର୍ତ୍ତମାନ ଜାପାନରୁ ସୁରକ୍ଷିତ ଭାବେ ଭାରତ ଫେରିଛନ୍ତି ସାଉଥ୍ ସୁପରଷ୍ଟାର ଜୁନିଅର ଏନଟିଆର । ଭାରତ ଫେରିବା ପରେ ସେ ଜାପାନର ସ୍ଥିତିକୁ ନେଇ ଚିନ୍ତାପ୍ରକଟ କରିବା ସହ ଶୀଘ୍ର ସବୁ ଠିକ ହୋଇଯାଉ ବୋଲି କାମନା କରିଛନ୍ତି ।
ଜୁନିଅର ଏନଟିଆର ନିଜ ପରିବାର ସହ କ୍ବାଲିଟି ଟାଇମ ବିତାଇବା ପାଇଁ ସର୍ବଦା ଦେଶ ବାହାରକୁ ଭ୍ୟାକେସନରେ ଯାଇଥାନ୍ତି । ନିକଟରେ ସେ ନୂଆବର୍ଷ ପାଳନ ପାଇଁ ପରିବାର ସହ ଜାପାନ ଯାଇଥିଲେ । ଜାପାନରେ ଭୂମିକମ୍ପର କିଛି ଘଣ୍ଟା ମଧ୍ୟରେ ସେ ଭାରତ ଫେରିଛନ୍ତି । ତେବେ ନିଜ ଦେଶକୁ ଫେରିବା ପରେ ଅଭିନେତା ଜାପାନ ସ୍ଥିତି ଜାଣି ଚିନ୍ତାପ୍ରକଟ କରିଛନ୍ତି । ସେ ଏକ୍ସରେ ଲେଖିଛନ୍ତି, 'ଜାପାନରୁ ମୁଁ ଆଜି ଘରକୁ ଫେରିଛି ଏବଂ ସେଠାରେ ହୋଇଥିବା ଭୂମିକମ୍ପ ମୋତେ ଆଶ୍ଚର୍ଯ୍ୟ କରିଛି । ପୂର୍ବ ସପ୍ତାହ ମୁଁ ସେଠାରେ ଥିଲି । ବର୍ତ୍ତମାନ ମୁଁ ଭାରତ ଫେରିଛି । ସମସ୍ତ ପ୍ରଭାବିତ ଲୋକଙ୍କ ପାଇଁ ମୁଁ ଦୁଃଖିତ । ଯେଉଁ ଲୋକ ଭୂକମ୍ପରୁ ବଞ୍ଚିବାରେ ସକ୍ଷମ ହୋଇଛନ୍ତି ସେମାନଙ୍କ ପାଇଁ ମୁଁ ଖୁସି । ମୁଁ ଆଶା କରୁଛି ଜାପାନରେ ସବୁକିଛି ଶୀଘ୍ର ଠିକ ହୋଇଯିବ । ମଜବୁତ ରୁହ, ଜାପାନ ।''