ହାଇଦ୍ରାବାଦ:ରିଲିଜ ହେଲା ସାଉଥ ମେଗାଷ୍ଟାର ରଜନୀକାନ୍ତଙ୍କ ଫିଲ୍ମ ଜେଲର । ଏହି ଫିଲ୍ମ ସାରା ବିଶ୍ୱରେ 4 ହଜାରରୁ ଅଧିକ ପରଦାରେ ମୁକ୍ତିଲାଭ କରିଛି । ଫିଲ୍ମକୁ ନେଇ ଫ୍ୟାନ୍ସଙ୍କ ମଧ୍ୟରେ କ୍ରେଜ ଦେଖିବାକୁ ମିଳିଛି । ସାଉଥର ବିଭିନ୍ନ ସ୍ଥାନରେ ସେଲିବ୍ରେସନର ମାହୋଲ ଦେଖିବାକୁ ମିଳିଛି । ନିଜ ପସନ୍ଦର ତାରକାକୁ ଦେଖିବାକୁ ଥିଏଟରେ ଜମୁଛି ଭିଡ଼ । ବର୍ତ୍ତମାନ ରଜନୀକାନ୍ତଙ୍କ ଅଭିନୀତ 'ଜେଲର'ର ଟ୍ୱିଟର ସମୀକ୍ଷା ଆସିଛି । ଟ୍ୱିଟରରେ ହୋଇଥିବା ସମୀକ୍ଷାରୁ ଏହା ସ୍ପଷ୍ଟ ହୋଇଛି ଯେ ଫିଲ୍ମଟି ବ୍ଲକବଷ୍ଟର ବୋଲି ପ୍ରମାଣିତ ହୋଇଛି ।
ରଜନୀକାନ୍ତଙ୍କ ଫିଲ୍ମ ପ୍ରଥମ ଦିନରୁ ବକ୍ସ ଅଫିସରେ ଧମାକା କରିଛି । ଫିଲ୍ମକୁ ଅନେକ ଦର୍ଶକ ବେଶ ପସନ୍ଦ କରିଛନ୍ତି । ତେବେ ପ୍ରଥମ ଦିନର ପ୍ରଥମ ଶୋ' ଦେଖିସାରିଥିବା ଲୋକେ ବର୍ତ୍ତମାନ ଟ୍ବିଟର ଜରିଆରେ ନିଜର ପ୍ରତିକ୍ରିୟା ଦେଇଛନ୍ତି । ଜଣେ ପ୍ରଶଂସକ ଲେଖିଛନ୍ତି, ଭାରତୀୟ ସିନେମାର ସର୍ବୋତ୍ତମ କ୍ଲାଇମାକ୍ସ ଏପର୍ଯ୍ୟନ୍ତ ଦେଖିବାକୁ ମିଳିଛି । ଏଥିସହିତ ଆଉ ଜଣେ ପ୍ରଶଂସକ ଫିଲ୍ମରେ ଥିବା କମେଡିକୁ ମଧ୍ୟ ପ୍ରଶଂସା କରି କହିଛନ୍ତି ଯେ ଫିଲ୍ମ ଦେଖି ବହୁତ ମଜା ଲାଗିଲା । ସେହିପରି ଅନ୍ୟ ଜଣେ ଲେଖିଛନ୍ତି, ଶିବାଜୀ ପରେ ରଜନୀକାନ୍ତଙ୍କ ଏହି ଚଳଚ୍ଚିତ୍ର ଦମଦାର ରହିଛି । ସେ ଆହୁରି ଲେଖିଛନ୍ତି, 'ଫିଲ୍ମର ଦ୍ୱିତୀୟ ଭାଗ ପ୍ରଥମ ଭାଗ ଅପେକ୍ଷା ବହୁତ ଭଲ, କ୍ଲାଇମାକ୍ସ ଦମଦାର ଅଟେ । ଦୀର୍ଘ ଦିନ ପରେ ରଜନୀକାନ୍ତ ପ୍ରେକ୍ଷାଳୟକୁ ଚମାକାଇ ଦେଇଛନ୍ତି । କ’ଣ କମବ୍ୟାକ୍ ।'