ହାଇଦ୍ରାବାଦ: ୫୪ତମ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ (ଆଇଏଫ୍ଏଫ୍ଆଇ) ସୋମବାରଠାରୁ ଆରମ୍ଭ ହୋଇଯାଇଛି । ଯାହାକି ସାରା ବିଶ୍ବର ଦର୍ଶକଙ୍କୁ ଆକର୍ଷିତ କରିଛି । IFFIର ଫରଫର୍ମାନ୍ସ ଦର୍ଶକଙ୍କୁ ବେଶ ଆକୃଷ୍ଟ କରିଛି । ଏଥିସହ ଅନେକ ବି-ଟାଉନ ତାରକା ରେଡ କାର୍ପେଟରେ ଜଲୱା ଦେଖାଇଛନ୍ତି । ତେବେ ଏହି ସମୟରେ ମାଧୁରୀଙ୍କୁ ଭାରତୀୟ ସିନେମାରେ ତାଙ୍କ ଅବଦାନ ପାଇଁ ବିଶେଷ ସମ୍ମାନରେ ସମ୍ମାନିତ କରାଯାଇଛି । ଏହି ପୁରସ୍କାରରେ ସମ୍ମାନିତ ହେବା ପରେ ମାଧୁରୀ କହିଛନ୍ତି, ''ଏହିପରି ସମ୍ମାନ ଏବଂ ପୁରସ୍କାର କଳାକାରମାନଙ୍କୁ ସେମାନଙ୍କ କାର୍ଯ୍ୟରେ ଉନ୍ନତ କରିବାକୁ ପ୍ରେରଣା ଯୋଗାଇଥାଏ ।''
କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରୀ ଅନୁରାଗ ଠାକୁର ମାଧୁରୀ ଦୀକ୍ଷିତଙ୍କୁ ଖାସ୍ ସମ୍ମାନରେ ସମ୍ମାନିତ କରିଛନ୍ତି । ଏହି ସମୟରେ ଅଭିନେତ୍ରୀଙ୍କ ଅଭିନୟ ଦକ୍ଷତା ଏବଂ ଚଳଚ୍ଚିତ୍ର ଇଣ୍ଡଷ୍ଟ୍ରିରେ ତାଙ୍କର ଅବଦାନକୁ ପ୍ରଶଂସା କରିଛନ୍ତି । ଏକ ଟ୍ବିଟ୍ କରି କେନ୍ଦ୍ରମନ୍ତ୍ରୀ ଲେଖିଛନ୍ତି ଯେ, ମାଧୁରୀ ଦୀକ୍ଷିତ ତାଙ୍କ ପ୍ରତିଭା ସହ ୪ ଦଶନ୍ଧି ଧରି ପରଦାରେ ଚାର୍ ଚାନ୍ଦ ଲାଗାଇଛନ୍ତି । 'ନିଶା' ଠାରୁ ଆରମ୍ଭ କରି ଚିତ୍ତାକର୍ଷକ 'ଚନ୍ଦ୍ରମୁଖୀ', ମହାନ୍ 'ବେଗମ୍ ପାରା' ଠାରୁ ଅବିସ୍ମରଣୀୟ 'ରଜୋ' ପର୍ଯ୍ୟନ୍ତ, ତାଙ୍କର ବହୁମୁଖୀତା ଅଭିନୟର କୌଣସି ତୁଳନା ନାହିଁ । ସେ ଆହୁରି ମଧ୍ୟ ଲେଖିଛନ୍ତି, ଭାରତର ୫୪ତମ ଆନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବରେ ଦକ୍ଷ ଅଭିନେତ୍ରୀଙ୍କୁ ଭାରତୀୟ ସିନେମାରେ ଅବଦାନ ପାଇଁ ବିଶେଷ ପୁରସ୍କାର ପ୍ରଦାନ କରି ଆମେ ଖୁସି ।