ହାଇଦ୍ରାବାଦ:କନ୍ନଡ ଟିଭି ଇଣ୍ଡଷ୍ଟ୍ରିରୁ ଆସିଛି ଦୁଃଖଦ ଖବର । ଲୋକପ୍ରିୟ ଅଭିନେତା ସମ୍ପଥ ଜୟରାମଙ୍କ ଆତ୍ମହତ୍ୟା ଜନିତ ମୃତ୍ୟୁ ହୋଇଛି । 35 ବର୍ଷ ବୟସରେ ଅଭିନେତାଙ୍କ ପରଲୋକ ହୋଇଛି । ଗଣମାଧ୍ୟମ ରିପୋର୍ଟ ଅନୁଯାୟୀ, ଏପ୍ରିଲ 22ରେ, ସେ ନେଲାମଙ୍ଗଲାସ୍ଥିତ ତାଙ୍କ ବାସଭବନରୁ ତାଙ୍କ ମୃତଦେହ ଉଦ୍ଧାର ହୋଇଥିଲା । ତାଙ୍କ ମୃତ୍ୟୁ ଖବର ଶୁଣି ସାଉଥ୍ ଇଣ୍ଡଷ୍ଟ୍ରିରେ ଶୋକର ଛାୟା ଖେଳିଯାଇଛି ।
ସମ୍ପଥ ଜୟରାମ ଅନେକ ଟିଭି ସିରିଏଲ ଏବଂ କିଛି ଫିଚର ଫିଲ୍ମରେ ଅଭିନୟ କରି ବେଶ ଲୋକପ୍ରିୟତା ହାସଲ କରିଥିଲେ । ସମ୍ପଥ ମୁଖ୍ୟତଃ କନ୍ନଡ ଟିଭି ଇଣ୍ଡଷ୍ଟ୍ରିରେ କାମ କରୁଥିଲେ । ସେ ଦୀର୍ଘ ସମୟ ଧରି କାମ ପାଇନଥିଲେ ଯେଉଁଥିପାଇଁ ସେ ଡିପ୍ରେସନ୍ରେ ଥିଲେ । କାମ ନପାଇବାରୁ ସମ୍ପତ ଜୟରାମ ଏହି କଠୋର ପଦକ୍ଷେପ ନେଇଥିବା କୁହାଯାଉଛି । ତାଙ୍କ ମୃତ୍ୟୁ ସମ୍ପର୍କରେ ତାଙ୍କ ପରିବାର କିମ୍ବା ସାଙ୍ଗମାନଙ୍କଠାରୁ ଏପର୍ଯ୍ୟନ୍ତ କୌଣସି ସୂଚନା ମିଳିପାରିନାହିଁ । ତେବେ ସମ୍ପଥଙ୍କ ଦେହାନ୍ତରେ କନ୍ନଡ ତାରକାମାନେ ଶୋକ ପ୍ରକାଶ କରିବା ସହ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି ।
ଅଭିନେତାଙ୍କ ସହ-ତାରକା ରାଜେଶ ଧ୍ରୁବ ସୋସିଆଲ ମିଡିଆରେ ତାଙ୍କ ବନ୍ଧୁଙ୍କ ସହ ଜଡିତ ଏକ ହୃଦୟସ୍ପର୍ଶୀ ପୋଷ୍ଟ ସେୟାର କରି ଦୁଃଖ ପ୍ରକାଶ କରିଛନ୍ତି । କ୍ୟାପସନରେ ସେ ଲେଖିଥିଲେ, ଏତେଗୁଡ଼ିଏ ଫିଲ୍ମ... ତଥାପି ବହୁତ ସଂଘର୍ଷ ବାକି ଅଛି । ତୁମର ସ୍ୱପ୍ନକୁ ସାକାର କରିବାକୁ ଏପର୍ଯ୍ୟନ୍ତ ସମୟ ଅଛି । ତୁମକୁ ବହୁତ କିଛି ଦେଖିବା ବାକି ଅଛି । ଦୟାକରି ଫେରି ଆସ । ସେପଟେ 'ଅଗ୍ନିସାକ୍ଷୀ'ରେ ସମ୍ପଥଙ୍କ ସହ-ତାରକା ବିଜୟ ସୂର୍ଯ୍ୟ ମଧ୍ୟ କହିଛନ୍ତି ଯେ, ସେ ଦୀର୍ଘ ଦିନ ଧରି ଏକ ଭଲ ପ୍ରକଳ୍ପ ଖୋଜୁଥିଲେ । ଏହି କାରଣରୁ ସେ ଅଧିକ ଡିପ୍ରେସନରେ ମଧ୍ୟ ଥିଲେ । ଏହି କାରଣରୁ ଏଭଳି ଚରମ ନିଷ୍ପତ୍ତି ନେଇଥିବେ ବୋଲି କୁହାଯାଉଛି ।
ସୂଚନା ଥାଉ କି, ସମ୍ପଥ ଜୟରାମ ଅନେକ ଟିଭି ସିରିଏଲ ଏବଂ କିଛି ଫିଚର ଫିଲ୍ମର ଅଂଶବିଶେଷ ରହିଛନ୍ତି । ତାଙ୍କର ଡାଇଲଗ ଡେଲଭେରୀ ଏବଂ ଅଭିନୟ ଯୋଗୁଁ ଅଭିନେତା ଦର୍ଶକଙ୍କ ମଧ୍ୟରେ ବହୁତ ଲୋକପ୍ରିୟ ଥିଲେ । ଗତକାଲି ନିଜ ବାସଭବନରେ ସମ୍ପଥ ଜୟରାମ ଆତ୍ମହତ୍ୟା କରିଥିବା ପୋଲିସ ସନ୍ଦେହ କରିଛି । ବର୍ତ୍ତମାନ ତାଙ୍କ ମୃତଦେହ କର୍ଣ୍ଣାଟକର ନେଲାମାଙ୍ଗାଲାର ଏକ ଘରୋଇ ଡାକ୍ତରଖାନାରେ ରଖାଯାଇଛି । ସମ୍ପଥଙ୍କ ଶେଷକୃତ୍ୟ ତାଙ୍କ ପୈତୃକ ଗ୍ରାମ ଏନାରପୁରାରେ କରାଯିବ ବୋଲି କୁହାଯାଉଛି । ତେବେ ସମ୍ପଥଙ୍କ ଆକସ୍ମିକ ବିୟୋଗକୁ ଗ୍ରହଣ କରିପାରୁନାହାନ୍ତି ପରିବାର ଲୋକେ, ଫ୍ୟାନ୍ସ ଏବଂ ଫିଲ୍ମ ତାରକା । ଅଭିନେତାଙ୍କ ଦେହାନ୍ତରେ ତାଙ୍କୁ ଶ୍ରଦ୍ଧାଞ୍ଜଳୀ ଦେବା ସହ ପରିବାରକୁ ସମବେଦନା ଜଣାଇଛି ଫିଲ୍ମ ଜଗତ ।
