ହାଇଦ୍ରାବାଦ: ବଲିଉଡ ଭେଟରାନ ଅଭିନେତା ଧର୍ମେନ୍ଦ୍ର 87 ବର୍ଷ ବୟସରେ ମଧ୍ୟ ବହୁତ ଆକ୍ଟିଭ ରହିଛନ୍ତି । ଏବେ ମଧ୍ୟ ସେ ଫିଲ୍ମରେ କାମ କରୁଛନ୍ତି । ଏଥିସହ ଧର୍ମେନ୍ଦ୍ର ସୋସିଆଲ ମିଡିଆରେ ମଧ୍ୟ ବହୁତ ସକ୍ରିୟ ଏବଂ ତାଙ୍କ ପ୍ରଶଂସକଙ୍କ ସହ ଉଭୟ ବ୍ୟକ୍ତିଗତ ଏବଂ ବୃତ୍ତିଗତ ବିଷୟରେ ସେୟାର କରିଥାନ୍ତି । ଏହାରି ମଧ୍ୟରେ ବର୍ତ୍ତମାନ ଧର୍ମେନ୍ଦ୍ର ଏକ ହୃଦୟସ୍ପର୍ଶୀ ପୋଷ୍ଟ ସେୟାର କରିଛନ୍ତି । ଯେଉଁଥିରେ ସେ ତାଙ୍କ ଦ୍ବିତୀୟ ପତ୍ନୀ ଏବଂ ତାଙ୍କ 2 ଝିଅକୁ କ୍ଷମା ମାଗିଛନ୍ତି । ସେପଟେ ବାପାଙ୍କ ପୋଷ୍ଟ ଉପରେ ବଡ ଝିଅ ଇଶା ଦେଓଲ ପ୍ରତିକ୍ରିୟା ଦେଇଛନ୍ତି ।
ଧର୍ମେନ୍ଦ୍ର ନିଜ ଇନଷ୍ଟାଗ୍ରାମରେ ଏକ ଇମୋସନାଲ ପୋଷ୍ଟ ସେୟାର କରିଛନ୍ତି । ଯେଉଁଥିରେ ଝିଅ ଇଶା ଦେଓଲଙ୍କ ସହ ଧର୍ମେନ୍ଦ୍ରଙ୍କୁ ଦେଖିବାକୁ ମିଳିଛି । ଏହି ଫଟୋ ସେୟାର କରି ସେ ଲେଖିଛନ୍ତି, ''ଇଶା, ଅହାନା, ହେମା ଏବଂ ମୋର ସମସ୍ତ ପ୍ରିୟ ସନ୍ତାନ । ମୁଁ ତଖତାନି ଏବଂ ବୋହ୍ରାଙ୍କୁ ବହୁତ ଭଲ ପାଏ ଏବଂ ତୁମ ସମସ୍ତଙ୍କୁ ମୁଁ ହୃଦୟରୁ ସମ୍ମାନ କରେ । ବୟସ ଏବଂ ଅସୁସ୍ଥତା ମୋତେ କହୁଛି ଯେ ମୁଁ ତୁମ ସହ ବ୍ୟକ୍ତିଗତ ଭାବରେ କଥା ହୋଇପାରିଥାନ୍ତି । କିନ୍ତୁ କରିପାରିଲି ନାହିଁ । ମୁଁ ଦୁଃଖିତ।''
ଧର୍ମେନ୍ଦ୍ରଙ୍କ ପୋଷ୍ଟର 10 ଘଣ୍ଟା ପରେ ବଡ ଝିଅ ଇଶା ଦେଓଲ ଏକ ପୋଷ୍ଟ ସେୟାର କରି ପ୍ରତିକ୍ରିୟା ଦେଇଛନ୍ତି । ଇଶା ନିଜ ଇନଷ୍ଟାଗ୍ରାମରେ ତାଙ୍କ ବିବାହର ଏକ ଫଟୋ ସେୟାର କରିଛନ୍ତି । ଲେଖିଛନ୍ତି, 'ଲଭ୍ ୟୁ ପାପା। ତୁମେ ଶ୍ରେଷ୍ଠ, ମୁଁ ତୁମକୁ ବିନା ସର୍ତ୍ତରେ ଭଲ ପାଏ ଏବଂ ତୁମେ ଏହା ଜାଣିଛ, ଖୁସି ହୁଅ ଏବଂ ସର୍ବଦା ଖୁସି ଏବଂ ସୁସ୍ଥ ରୁହ, ତୁମକୁ ବହୁତ ଭଲ ପାଇବା ।' ଫଟୋରେ ଇଶାଙ୍କ ବିବାହ ସମୟରେ ବାପା ଧର୍ମେନ୍ଦ୍ର ଏବଂ ମାଆ ହେମା ମାଲିନୀ ତାଙ୍କ ସହ ପୋଜ ଦେଇଥିବା ନଜର ଆସିଛନ୍ତି ।
ଏହା ମଧ୍ୟ ପଢନ୍ତୁ: ଆଲିଆଙ୍କ ସହ କ୍ୟୁଟ ଫଟୋ ସେୟାର କଲେ ଧର୍ମେନ୍ଦ୍ର, ଫ୍ୟାନ୍ସଙ୍କ କମେଣ୍ଟ ବର୍ଷା
ସୂଚନା ଥାଉ କି, ନିକଟରେ ଧର୍ମେନ୍ଦ୍ର ତାଙ୍କ ବଡ଼ ପୁଅ ସନ୍ନି ଦେଓଲଙ୍କ ବଡ ପୁଅ କରଣ ଦେଓଲଙ୍କ ବିବାହ ଉତ୍ସବରେ ଯୋଗ ଦେଇଥିଲେ। ନାତିଙ୍କ ବିବାହରେ ଧର୍ମେନ୍ଦ୍ର ବେଶ ଉପଭୋଗ କରିଥିଲେ ଏବଂ ନାତିଙ୍କ ବିବାହ ସମାରୋହର ଡ୍ୟାନ୍ସ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ସେପଟେ ଧର୍ମେନ୍ଦ୍ରଙ୍କ ୱାର୍କପ୍ରଣ୍ଟ କଥା କହିବାକୁ ଗଲେ, ଧର୍ମେନ୍ଦ୍ର 87 ବର୍ଷ ବୟସରେ ମଧ୍ୟ ବଲିଉଡରେ ବହୁତ ସକ୍ରିୟ ଅଟନ୍ତି । ସେ ବର୍ତ୍ତମାନ କରଣ ଜୋହରଙ୍କ ବହୁ ପ୍ରତୀକ୍ଷିତ ଚଳଚ୍ଚିତ୍ର 'ରକି ଔର ରାନୀ କି ପ୍ରେମ କାହାନୀ'ରେ ନଜର ଆସିବେ । ଏହା ବ୍ୟତୀତ ତାଙ୍କୁ 'ଅପନେ ୨'ରେ ମଧ୍ୟ ଦେଖିବାକୁ ମିଳିବ । ଏହି ଚଳଚ୍ଚିତ୍ର 2007ରେ ମୁକ୍ତିଲାଭ କରିଥିବା 'ଅପନେ'ର ସିକ୍ୱେଲ ହେବ । ଏହି ଚଳଚ୍ଚିତ୍ରରେ ଧର୍ମେନ୍ଦ୍ରଙ୍କ ନାତି କରଣ ଦେଓଲ ମଧ୍ୟ ନଜର ଆସିବେ ।
