ମୁମ୍ବାଇ: ଫିଲ୍ମ ଥଲାଇବାରେ ତାମିଲନାଡ଼ୁର ପୂର୍ବତନ ମୁଖ୍ୟମନ୍ତ୍ରୀ ଜୟଲଳିତାଙ୍କ ଭୂମିକା ନିର୍ବାହ କରିଥିବା କଙ୍ଗନା ରଣାୱତ ଏବେ ଆଉ ଜଣେ ବଡ଼ ରାଜନୀତିଜ୍ଞଙ୍କ ଚରିତ୍ରରେ ନଜର ଆସିଛନ୍ତି । ଏହି ବଡ଼ ରାଜନୀତିଜ୍ଞ ଜଣକ ହେଉଛନ୍ତି ଦେଶର ପ୍ରଥମ ମହିଳା ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ । କଙ୍ଗନା ରଣାଓ୍ବତଙ୍କ ଫିଲ୍ମ 'ଏମରଜେନ୍ସି' (Emergency)ର ଫାଷ୍ଟ ଲୁକ ପୋଷ୍ଟର ଗୁରୁବାର ଦିନ ରିଲିଜ ହୋଇଛି । ଏହି ଚଳଚ୍ଚିତ୍ରରେ କଙ୍ଗନା ରଣାୱତ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ଲୁକ୍ରେ ନଜର ଆସିଛନ୍ତି। ଏହି ଫିଲ୍ମ ଏକ ବହି ଉପରେ ଆଧାରିତ । ଏଥିରେ ଅପରେସନ ବ୍ଲୁ ଷ୍ଟାର ଓ ଇନ୍ଦିରା ଗାନ୍ଧୀଙ୍କ ଶାସନ କାଳରେ ଜାରି ହୋଇଥିବା ଜରୁରୀକାଳିନ ପରିସ୍ଥିତିକୁ ମୁଖ୍ୟ ଭାବେ ଦର୍ଶାଯାଇଛି ।
ଉଲ୍ଲେଖନୀୟ ଯେ, 'ଧାକଡ ଗର୍ଲ'ଙ୍କ ପ୍ରଡକ୍ସନ୍ ହାଉସ୍ ମଣିକର୍ଣ୍ଣିକା ଫିଲ୍ମସର ବ୍ୟାନରରେ ନିର୍ମିତ 'Emergency' ଚଳଚ୍ଚିତ୍ରର ଅଭିନେତ୍ରୀ ହେବା ସହିତ ସେ ଏହି ଚଳଚ୍ଚିତ୍ରର ନିର୍ଦ୍ଦେଶକ ଏବଂ ନିର୍ମାତା ମଧ୍ୟ ଅଟନ୍ତି । ଅଭିନେତ୍ରୀ ପୋଷ୍ଟର ଏବଂ ଟିଜର ନିଜ ଇନଷ୍ଟାଗ୍ରାମ ଆକାଉଣ୍ଟରେ ସେୟାର କରି କ୍ୟାପସନରେ ଲେଖିଛନ୍ତି- 'ସେ ଯାହାକୁ ସାର୍ ବୋଲି କହୁଥିଲେ।' ପୋଷ୍ଟରରେ ତାଙ୍କ ଲୁକ୍ ପୂରାପୂରି ଦମଦାର ରହିଛି ।