ହାଇଦ୍ରାବାଦ: ସାଉଥ ସୁପରଷ୍ଟାର ଥାଲାପତି ବିଜୟଙ୍କ ବିରୋଧରେ ଅଭିଯୋଗ ହୋଇଛି । ଧୂମ୍ରପାନ କରି ଏହାକୁ ପ୍ରୋତ୍ସାହନ କରିବାକୁ ନେଇ ଅଭିନେତାଙ୍କ ନାଁରେ ମାମଲା ରୁଜୁ ହୋଇଛି । ସୂଚନା ଅନୁସାରେ, ଥାଲାପତି ବିଜୟ ଫିଲ୍ମ 'ଲିଓ' ସହ ବଡ ପରଦାରେ ନଜର ଆସିବାକୁ ଯାଉଛନ୍ତି । ତେବେ ଅଭିନେତାଙ୍କ ଜନ୍ମଦିନରେ 'ଲିଓ'ର ପ୍ରଥମ ଗୀତ 'ନା ରେଡ୍ଡି' ରିଲିଜ କରାଯାଇଥିଲା । ଏହି ଗୀତରେ ବିଜୟ ଧୂମ୍ରପାନ କରୁଥିବା ଦେଖିବାକୁ ମିଳିଛି । ଏହାକୁ ବିରୋଧ କରି ଜଣେ ଆରଟିଓ କାର୍ଯ୍ୟକର୍ତ୍ତା ତାଙ୍କ ବିରୋଧରେ ଥାନାରେ ଅଭିଯୋଗ କରିଛନ୍ତି ।
ଗୀତ ସେଲବମ ନାମକ ଆରଟିଓ କାର୍ଯ୍ୟକର୍ତ୍ତା ଅଭିନେତାଙ୍କ ବିରୋଧରେ ପ୍ରମାଣ ସହ ପୋଲିସରେ ଅଭିଯୋଗ କରିଛନ୍ତି । ଏହି କାର୍ଯ୍ୟକର୍ତ୍ତା ଜୁନ 25ରେ ଅଭିନେତାଙ୍କ ବିରୋଧରେ ଅନଲାଇନ ଅଭିଯୋଗ କରିଥିଲେ ଏବଂ ଗତକାଲି(ସୋମବାର) ସକାଳ 10 ଟାରେ ଥାନାରେ ଏକ ମାମଲା ରୁଜୁ କରିଥିଲେ । ଏହି କାର୍ଯ୍ୟକର୍ତ୍ତା ନାର୍କୋଟିକ୍ସ ନିୟନ୍ତ୍ରଣ ଅଧିନିୟମ ଅନୁଯାୟୀ ଅଭିନେତାଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ଦାବି କରିଛନ୍ତି । ବିଜୟଙ୍କ ଆଗାମୀ ଚଳଚ୍ଚିତ୍ର 'ଲିଓ'ରୁ ନିକଟରେ ରିଲିଜ ହୋଇଥିବା ଗୀତ 'ନା ରେଡ୍ଡି'ରେ ଖୋଲାଖୋଲି ଭାବେ ଧୂମ୍ରପାନକୁ ବିରୋଧ କରି ଏହି ଅଭିଯୋଗ ଦାଖଲ କରାଯାଇଛି ।
ଲିଓରୁ ବହୁ ପ୍ରତୀକ୍ଷିତ ପ୍ରଥମ ଗୀତ 'ନା ରେଡ୍ଡି' ଜୁନ 22ରେ ଥାଲାପତି ବିଜୟଙ୍କ ଜନ୍ମଦିନ ଅବସରରେ ରିଲିଜ ହୋଇଥିଲା । ଟିଜର ଭିଡିଓ ଏବଂ ତାଙ୍କର ପ୍ରଥମ ଲୁକ୍ ସହ ଇଣ୍ଟରନେଟରେ ଧମାକା କରିବା ପରେ ଫିଲ୍ମର ଗୀତ ବିଜୟଙ୍କ ପ୍ରଶଂସକଙ୍କୁ ଜନ୍ମଦିନ ଭେଟି ଦିଆଯାଇଥିଲା । ଏହି ଗୀତଟିକୁ ନିଜେ ଥାଲାପତି ଗାଇଥିବା ବେଳେ ଅନିରୁଦ୍ଧ ରବିଚାନ୍ଦ ଏହାର ରଚନା କରିଛନ୍ତି । ଗୀତରେ ବିଜୟ ନିଜ ପାଟିରେ ସିଗାରେଟ୍ ରଖି ତାଙ୍କ ପଛରେ ଏକ ବିରାଟ ଡ୍ୟାନ୍ସ କ୍ରୁଙ୍କ ସହ ନାଚୁଥିବା ଦେଖିବାକୁ ମିଳିଛି । ଯାହାକୁ ଏବେ ବିରୋଧ କରାଯାଇଛି ।
ସୂଚନା ଥାଉକି, 'ଲିଓ'ର ନିର୍ଦ୍ଦେଶନା ଦେଇଛନ୍ତି ଲୋକେଶ କନାଗରାଜ । ଲୋକେଶ ନିଜେ ଏହି ଫିଲ୍ମ ଲେଖିଛନ୍ତି ଏବଂ ନିର୍ଦ୍ଦେଶନା ଦେଇଛନ୍ତି । ଏହା ଏକ ଆକ୍ସନ୍ ଫିଲ୍ମ, ଯାହା 19 ଅକ୍ଟୋବର 2023ରେ ସିନେମାହଲରେ ରିଲିଜ ହେବ । ଏଥିରେ ବଲିଉଡ ଅଭିନେତା ସଞ୍ଜୟ ଦତ୍ତ ଖଳନାୟକଙ୍କ ଭୂମିକାରେ ନଜର ଆସିବାକୁ ଥିବାବେଳେ ଅଭିନେତ୍ରୀ ତ୍ରିଶା କୃଷ୍ଣନ, ଗୌତମ ବାସୁଦେବ ମେନନ୍, ମିସ୍କିନ୍, ଅର୍ଜୁନ ଏବଂ ପ୍ରିୟା ଆନନ୍ଦ ପ୍ରମୁଖ ଅଭିନୟ କରିଛନ୍ତି । ଏହି ଚଳଚ୍ଚିତ୍ରରେ ଯୁବ ସଂଗୀତ ନିର୍ଦ୍ଦେଶକ ଅନିରୁଦ୍ଧ ରବିଚନ୍ଦ୍ରଙ୍କ ସଙ୍ଗୀତ ରହିବ ଏବଂ ଲଲିତ କୁମାର ଏବଂ ଜଗଦୀଶ ପଲାନିସାମି ଏହି ଚଳଚ୍ଚିତ୍ରର ନିର୍ମାତା ଅଟନ୍ତି । ଏଥିସହ ତାଙ୍କର ପରବର୍ତ୍ତୀ ଚଳଚ୍ଚିତ୍ର 'ଥାଲାପତି 68' ଭେଙ୍କଟ ପ୍ରଭୁ ନିର୍ଦ୍ଦେଶନା ଦେବେ । ରିପୋର୍ଟ ଅନୁଯାୟୀ, ଥାଲାପତି 68 ଏପର୍ଯ୍ୟନ୍ତ ତାଙ୍କ ସର୍ବୋତ୍ତମ ଚଳଚ୍ଚିତ୍ର ହେବ, ଯେଉଁଥିରେ ହାଇଟେକ ପ୍ରଡକ୍ସନ ସାମିଲ ହୋଇଛି । ଏହି ଚଳଚ୍ଚିତ୍ର ଆସନ୍ତା ବର୍ଷ ରିଲିଜ ହେବ ।
